ನವದೆಹಲಿ: ಬಾಲ್ಯದಲ್ಲಿ ನನಗೂ ಒಬ್ಬ ಕ್ರಿಕೆಟರ್ ಆಗಬೇಕೆಂಬ ಆಸೆಯಿತ್ತು ಎಂದು ಗೂಗಲ್ ಸಿಇಒ ಸುಂದರ್ ಪಿಚೈ ಹೇಳಿದ್ದಾರೆ. ಮೊದಲಿಗೆ ಸುನೀಲ್ ಗವಾಸ್ಕರ್ ಆಮೇಲೆ ನಾನು ಸಚಿನ್ ತೆಂಡೂಲ್ಕರ್‌ನ್ನು ಅತಿಯಾಗಿ ಇಷ್ಟ ಪಡತೊಡಗಿದೆ ಎಂದು ಪಿಚೈ ಹೇಳಿದ್ದಾರೆ. ದೆಹಲಿಯ ಶ್ರೀರಾಂ ಕಾಲೇಜ್ ಆಫ್ ಕಾಮರ್ಸ್ ವಿದ್ಯಾರ್ಥಿಗಳೊಂದಿಗೆ ನಡೆದ ಸಂವಾದದಲ್ಲಿ ಅವರು ಈ ಮಾತುಗಳನ್ನು ಹೇಳಿದ್ದಾರೆ.

ಟೆಸ್ಟ್ ಪಂದ್ಯ ಮತ್ತು ಏಕದಿನ ಪಂದ್ಯವನ್ನು ಒಂದೇ ರೀತಿಯಲ್ಲಿ ಆಸ್ವಾದಿಸುತ್ತೇನೆ. ಆದರೆ ಚುಟುಕು ಕ್ರಿಕೆಟ್ ಟ್ವೆಂಟಿ-20ಯಲ್ಲಿ ನನಗಷ್ಟು ಆಸಕ್ತಿಯಿಲ್ಲ. ಟೆಸ್ಟ್ ಕ್ರಿಕೆಟ್ ತುಂಬಾ ಚೆನ್ನಾಗುರುತ್ತದೆ. ಅದನ್ನು ನೋಡುವುದಕ್ಕಾಗಿ ನಾನು ಬಿಡುವು ಮಾಡಿಕೊಳ್ಳುತ್ತೇನೆ. ಟ್ವೆಂಟಿ -20 ನೋಡಿ ಬೆಳೆದವನಲ್ಲ ನಾನು. ಆದ್ದರಿಂದ ಅದನ್ನು ಆಸ್ವಾದಿಸುವುದು ನನ್ನಿಂದ ಸಾಧ್ಯವಾಗುವುದಿಲ್ಲ ಎಂದು ಅವರು ಹೇಳಿದ್ದಾರೆ.

ಕ್ರಿಕೆಟ್ ಮಾತ್ರವಲ್ಲದೆ ಫುಟ್‌ಬಾಲ್ ಕೂಡಾ ನನಗಿಷ್ಟ. ಮೆಸ್ಸಿ ಮತ್ತು ಬಾರ್ಸಿಲೋನಾ ತಂಡದ ಅಭಿಮಾನಿ ನಾನು. ಮಧ್ಯರಾತ್ರಿ ನಿದ್ದೆ ಮಾಡದೆ ಕುಳಿತು ಫುಟ್ಬಾಲ್ ನೋಡುತ್ತಿದ್ದೆ ಎಂದು ಪಿಚೈ ತಮ್ಮ ಕ್ರೀಡಾ ಆಸಕ್ತಿ ಬಗ್ಗೆ ಹೇಳಿದ್ದಾರೆ.