ನವದೆಹಲಿ: ದೇಶದಲ್ಲಿ ಎಲ್ಲಿದೆ ಅಸಹಿಷ್ಣುತೆ? ದೇಶದಲ್ಲಿ ಇದೀಗ ಶಾಂತಿ ಹಾಗೂ ಸಾಮರಸ್ಯವಿದ್ದು, ಭಾರತದಲ್ಲಿ ಅಸಹಿಷ್ಣುತೆ ಇಲ್ಲ ಎಂದು ಕೇಂದ್ರ ವಿತ್ತ ಸಚಿವ ಅರುಣ್ ಜೇಟ್ಲಿ ಅವರು ಮಂಗಳವಾರ ಹೇಳಿದ್ದಾರೆ.

ದೇಶದಲ್ಲಿ ನಡೆಯುತ್ತಿರುವ ಸಾಹಿತಿಗಳ ಹತ್ಯೆ ಹಾಗೂ ಅಸಹಿಷ್ಣುತೆ ವಿರುದ್ಧ ವಿರೋಧ ವ್ಯಕ್ತಪಡಿಸಿದ್ದ ಕಾಂಗ್ರೆಸ್ ನಾಯಕರು ನಿನ್ನೆಯಷ್ಟೇ ಕಾಲ್ನಡಿಗೆ ಮೂಲಕ ರಾಷ್ಟ್ರಪತಿಯವರನ್ನು ಭೇಟಿ ಮಾಡಿ ಮಾತುಕತೆ ನಡೆಸಿದ್ದರು.

ಈ ಹಿನ್ನೆಲೆಯಲ್ಲಿ ಇಂದು ಖಾಸಗಿ ಸುದ್ದಿವಾಹಿನಿಯೊಂದರಲ್ಲಿ ಪ್ರತಿಕ್ರಿಯೆ ನೀಡಿರುವ ಅರುಣ್ ಜೇಟ್ಲಿ ಅವರು, ದೇಶದಲ್ಲಿ ಇದೀಗ ಶಾಂತಿ ಹಾಗೂ ಸಾಮರಸ್ಯವಿದೆ. ಈ ಹಿಂದೆ ನಡೆದಂತಹ ಘಟನೆಗಳು ಮತ್ತೆ ದೇಶದಲ್ಲಿ ನಡೆಯಬಾರದು. ಹಿಂದೆ ನಡೆದ ಘಟನೆಗಳನ್ನೇ ಹಿಡಿದು ಮತ್ತೆ ದೇಶದಲ್ಲಿ ಗಲಭೆ ಸೃಷ್ಟಿಸುವ ಕೆಲಸವನ್ನು ಯಾವ ಪಕ್ಷದವರೂ ಮಾಡಬಾರದು. ದೇಶದಲ್ಲಿ ಅಸಹಿಷ್ಣುತೆಯ ವಾತಾವರಣ ನಿರ್ಮಾಣವಾಗಿದೆ ಎಂದು ಹೇಳುತ್ತಿರುವ ಕಾಂಗ್ರೆಸ್ ಪಕ್ಷದವರು ಎಲ್ಲಿ ಅಸಹಿಷ್ಣುತೆಯ ವಾತಾವರಣವಿದೆ ಎಂದು ಹೇಳಲಿ. ದಾದ್ರಿ ಪ್ರಕರಣ ಹಾಗೂ ಸಾಹಿತಿ ಹತ್ಯೆ ಪ್ರಕರಣ ನಡೆದದ್ದು, ಕಾಂಗ್ರೆಸ್ ಮತ್ತು ಇತರೆ ಪಕ್ಷಗಳ ಆಡಳಿತವಿರುವ ರಾಜ್ಯಗಳಲ್ಲಿ ಎಂದು ಹೇಳಿದ್ದಾರೆ.