ನವದೆಹಲಿ: ಇನ್ನು ಮುಂದೆ ದೇಶದ ಎಲ್ಲ ಶಾಲೆಗಳಲ್ಲಿ ವಿದ್ಯಾರ್ಥಿಗಳಿಗೆ ನೀಡಲಾಗುವ ಮಧ್ಯಾಹ್ನದ ಊಟವನ್ನು ಪರೀಕ್ಷೆಗೆ ಒಳಪಡಿಸಲಾಗುತ್ತದೆ.

ಸರ್ಕಾರಿ ಪ್ರಯೋಗಶಾಲೆ ಅಥವಾ ಮಾನ್ಯತೆ ಪಡೆದ ಪ್ರಯೋಗಶಾಲೆಗಳು ಊಟದಲ್ಲಿ ಇರಬೇಕಾದ ಪೌಷ್ಟಿಕಾಂಶಗಳ ಬಗ್ಗೆ ಪರೀಕ್ಷೆ ನಡೆಸಿ ವರದಿ ನೀಡಲಿವೆ. ಇದರ ಜತೆಗೆ ಮಧ್ಯಾಹ್ನದ ಊಟ ನೀಡಲು ಅಸಾಧ್ಯವಾದರೆ ಮಕ್ಕಳಿಗೆ ಭತ್ಯೆ ಸಿಗಲಿದೆ. ಅದನ್ನು ಪ್ರತಿ ತಿಂಗಳ 15ರಂದು ನೀಡಬೇಕೆಂದು ಗಡುವನ್ನೂ ವಿಧಿಸಲಾಗಿದೆ. ಕೇಂದ್ರ ಸರ್ಕಾರ ಮಧ್ಯಾಹ್ನದ ಬಿಸಿಯೂಟದ ನಿಯಮಾವಳಿಗಳನ್ನು ಪರಿಷ್ಕರಿಸಿ ಗುರುವಾರ ಅಧಿಸೂಚನೆ ಹೊರಡಿಸಿದೆ.

ಅಂದ ಹಾಗೆ ಮಧ್ಯಾಹ್ನದ ಬಿಸಿ ಊಟ ನೀಡದೇ ಇದ್ದರೆ, ಮಕ್ಕಳಿಗೆ ಬಿಸಿ ಊಟದ ಭತ್ಯೆಯನ್ನು ರಾಜ್ಯ ಸರ್ಕಾರ ನೀಡಬೇಕು. ಪರಿಷ್ಕತ ನಿಯಮಗಳ ಪ್ರಕಾರ, ಮಧ್ಯಾಹ್ನದ ಬಿಸಿಯೂಟಕ್ಕೆ ಹಣದ ಕೊರತೆಯಾದಾಗ ಶಾಲೆಯಲ್ಲಿರುವ ಇತರ ಅನುದಾನವನ್ನು ಬಳಸಿಕೊಳ್ಳಲು ಆಯಾ ಶಾಲಾಮುಖ್ಯಸ್ಥರಿಗೆ ಅವಕಾಶ ಕಲ್ಪಿಸಲಾಗಿದೆ. ಶಾಲೆಯಲ್ಲಿ ಸತತ ಮೂರು ದಿನ ಬಿಸಿ ಊಟ ನೀಡದಿದ್ದರೆ, ಅಥವಾಒಂದು ತಿಂಗಳಲ್ಲಿ ಐದು ದಿನ ಬಿಸಿ ಊಟ ನೀಡಿದೇ ಇದ್ದರೆ, ಸಂಬಂಧಿಸಿ ದವರನ್ನು ಹೊಣೆಗಾರರನ್ನಾಗಿ ಮಾಡಿ ಕ್ರಮ ಕೈಗೊಳ್ಳುವ ಜವಾಬ್ದಾರಿಯನ್ನು ರಾಜ್ಯಸರ್ಕಾರಕ್ಕೆ ವಹಿಸಲಾಗಿದೆ. ಊಟಕ್ಕೆ ಪರೀಕ್ಷೆ: ಮದ್ಯಾಹ್ನದ ಬಿಸಿ ಊಟದ ಗುಣಮಟ್ಟ ಮತ್ತು ನಿಗದಿತ ಪೌಷ್ಟಿಕಾಂಶ ಕಾಯ್ದು ಕೊಳ್ಳಲು ತಿಂಗಳಿಗೊಂದು ಬಾರಿ ಪ್ರಯೋಗಾಲಯಗಳಲ್ಲಿ ಪರೀಕ್ಷಿಸುವು ದನ್ನು ಕಡ್ಡಾಯಗೊಳಿಸಲಾಗಿದೆ.