ಲಖನೌ: ಉತ್ತರ ಪ್ರದೇಶದ ಹಮೀರ್ ಪುರದಲ್ಲಿರುವ ದೇವಲಾಯವನ್ನು ಪ್ರವೇಶಿಸಲು ಯತ್ನಿಸಿದ ದಲಿತನೊಬ್ಬನ ಮೇಲೆ ಗಂಭೀರ ಹಲ್ಲೆ ನಡೆಸಿ, ಬೆಂಕಿ ಹಚ್ಚಿದ ಘಟನೆ ವರದಿಯಾಗಿದೆ.

ಕಾನ್ಪುರದಿಂದ 140 ಕಿ.ಮೀ. ದೂರದಲ್ಲಿರುವ ಹಮೀರ್ ಪುರದ ಬಿಲ್ಗಾಂವ್ ನಲ್ಲಿ ಮೈದಾನಿಬಾಬ ದೇವಸ್ಥಾನಕ್ಕೆ 90ರ ಹರೆಯದ ಚಿಮ್ಮ ಮತ್ತು ಅವರ ಪತ್ನಿ ಹಾಗೂ ಮಗ ದುರ್ಜನ್ ನೊಂದಿಗೆ ಹೋಗಿದ್ದರು. ಆಗ ಅವರನ್ನು ದೇವಸ್ಥಾನದ ಸಂಜಯ್ ತಿವಾರಿ ಎಂಬಾತ ತಡೆದು ನಿಲ್ಲಿಸಿದ್ದಾನೆ. ಆದರೆ ದಲಿತ ಕುಟುಂಬವು ದೇವಸ್ಥಾನ ಪ್ರವೇಶಿಸಲು ಯತ್ನಿಸಿದಾಗ ಏಕಾಏಕಿ ದಾಳಿ ನಡೆಸಿದ ಆರೋಪಿಯು, ಕೊಡಲಿಯಿಂದ ಹಲ್ಲೆ ನಡೆಸಿದ್ದು, ನಂತರ ವೃದ್ಧನ ಮೇಲೆ ಬೆಂಕಿ ಹಚ್ಚಿದಾನೆಂದು ತಿಳಿದು ಬಂದಿದೆ.

ಈ ಘಟನೆ ನಡೆಯುವ ವೇಳೆ ದೇವಸ್ಥಾನದಲ್ಲಿ ಇತರ ಭಕ್ತರೂ ಇದ್ದರು. ಚಿಮ್ಮ ಮತ್ತು ಅವರ ಕುಟುಂಬವನ್ನು ದೇವಸ್ಥಾನ ಪ್ರವೇಶಿಸದಂತೆ ತಿವಾರಿ ತಡೆದಿದ್ದನು.ತನ್ನ ಮಾತು ಕೇಳದೆ ದೇವಸ್ಥಾನ ಪ್ರವೇಶಿಸಲು ಯತ್ನಿಸಿದ ದಲಿತ ಕುಟುಂಬವನ್ನು ಕಂಡ ತಿವಾರಿ ಕೋಪೊದ್ರಿಕ್ತನಾಗಿ ವೃದ್ಧನ ಮೇಲೆ ಕೊಡಲಿಯಿಂದ ಹಲ್ಲೆ ನಡೆಸಿದನು. ನಂತರ ಸೀಮೆ ಎಣ್ಣೆ ಸುರಿದು ಬೆಂಕಿ ಹಚ್ಚಿದನು ಎಂದು ಪ್ರತ್ಯಕ್ಷದರ್ಶಿಗಳು ತಿಳಿಸಿದ್ದಾರೆ. ಪೊಲೀಸರು ಆರೋಪಿ ತಿವಾರಿ ಮತ್ತು ಆತನ ಇಬ್ಬರು ಸಹಚರರ ಬಂಧಿಸಿದ್ದು ಪ್ರಕರಣ ದಾಖಲಿಸಿದ್ದಾರೆ.