ನವದೆಹಲಿ: ಮೊಮ್ಮಗಳು ಪ್ರಿಯಾಂಕಾ ಗಾಂಧಿ ತಮ್ಮ ರಾಜಕೀಯ ಜೀವನದ ಉತ್ತರಾಧಿಕಾರಿಯಾಗಬೇಕೆಂಬುದು ಮಾಜಿ ಪ್ರಧಾನಿ ದಿವಂಗತ ಇಂದಿರಾಗಾಂಧಿ ಅವರ ಆಸೆಯಾಗಿತ್ತು ಎಂದು ಇಂದಿರಾ ಗಾಂಧಿ ಅವರ ಆಪ್ತ ಹಿರಿಯ ಕಾಂಗ್ರೆಸ್ ನಾಯಕ ಎಂ.ಎಲ್ ಪೊಟೆದಾರ್ ಹೇಳಿದ್ದಾರೆ.

ತಮ್ಮ ಮೊಮ್ಮಗಳು ಪ್ರಿಯಾಂಕಾ ಗಾಂಧಿ ಭವಿಷ್ಯದಲ್ಲಿ ಉತ್ತಮ ರಾಜಕೀಯ ನಾಯಕಿಯಾಗುತ್ತಾಳೆ, ಅವಳಲ್ಲಿ ಉತ್ತಮ ರಾಜಕೀಯ ನಾಯಕಿಯಾಗುವ ಎಲ್ಲಾ ಲಕ್ಷಣಗಳಿವೆ. ಪ್ರಿಯಾಂಕಾಳಲ್ಲಿ ತಮ್ಮ ರಾಜಕೀಯ ಜೀವನದ ಪ್ರತಿಬಿಂಬ ಕಾಣುತ್ತಿದೆ ಎಂದು ಇಂದಿರಾ ಗಾಂಧಿ ರಾಜಕೀಯ ಸಲಹೆಗಾರರಾಗಿದ್ದ ಪೊಟೇದಾರ್ ಅವರ ಬಳಿ ಹೇಳಿದ್ದರು.

ಇಂದಿರಾ ಗಾಂಧಿ ಹತ್ಯೆಗೂ ಕೆಲ ದಿನಗಳ ಮುನ್ನ ನಾವೆಲ್ಲಾ ಕಾಶ್ಮೀರದ ದೇವಾಲಯಕ್ಕೆ ತೆರಳಿದ್ದವು. ದೇವರ ದರ್ಶನದ ನಂತರ ಒಂದು ಮರದ ಕೆಳಗೆ ಕುಳಿತು ವಿಶ್ರಮಿಸುತ್ತಿದ್ದ ವೇಳೆ ಮಾತನಾಡಿದ ಇಂದಿರಾಗಾಂಧಿ ಅವರಿಗೆ ತಮ್ಮ ಸಾವಿನ ಸೂಚನೆೆ ದೊರೆತಿತ್ತೇನೋ. ಹಾಗಾಗಿಯೇ ಅವರು ತಮ್ಮ ರಾಜಕೀಯ ಜೀವನದ ಮುಂದಿನ ಉತ್ತರಾಧಿಕಾರಿ ಪ್ರಿಯಾಂಕಾ ಆಗಬೇಕು ಎಂಬ ಮಹಾದಾಸೆ ಹೊಂದಿದ್ದರು ಎಂದು ಪೊಟೇದಾರ್ ಹೇಳಿದ್ದಾರೆ.

ಇಂದಿರಾ ಸಾವಿನ ನಂತರ ಅವರ ಅಪೇಕ್ಷೆ ಏನೆಂಬುದನ್ನು ರಾಜೀವ್ ಗಾಂಧಿ ಹಾಗೂ ಸೋನಿಯಾ ಗಾಂಧಿ ಅವರಿಗೆ ತಿಳಿಸಿದ್ದೆ. ಆದರೆ ಇಬ್ಬರು ಈ ವಿಷಯವನ್ನು ಗಂಂಭೀರವಾಗಿ ಪರಿಗಣಿಸಲಿಲ್ಲ ಎಂದು ಬೇಸರ ವ್ಯಕ್ತ ಪಡಿಸಿರುವ ಪೊಟೇದಾರ್, ಇಂದಿರಾ ಗಾಂಧಿಯ ಪ್ರತಿಬಿಂಬ ಪ್ರಿಯಾಂಕಾ ಗಾಂಧಿಯಲ್ಲಿ ಕಾಣುತ್ತಿದೆ ಎಂದು ಹೇಳಿದ್ದಾರೆ.