ನವದೆಹಲಿ:ಕಾಂಗ್ರೆಸ್ ಪಕ್ಷ ಪಾಕಿಸ್ತಾನವನ್ನು ನಿರ್ದೋಷಿಯಂತೆ ಬಿಂಬಿಸಲು ಯತ್ನಿಸುತ್ತಿದೆ ಎಂದು ಆರೋಪಿಸಿರುವ ಕೇಂದ್ರ ಸಚಿವ ವೆಂಕಯ್ಯ ನಾಯ್ಡು, ಕಾಶ್ಮೀರದ ವಿಷಯದಲ್ಲಿ ಕಾಂಗ್ರೆಸ್ ಪಕ್ಷ ರಾಜಕೀಯ ಅವಕಾಶವಾದಿತನ ಪ್ರದರ್ಶಿಸುತ್ತಿದೆ ಎಂದು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಕಾಂಗ್ರೆಸ್ ಪಕ್ಷ ಕಾಶ್ಮೀರದ ವಿಷಯದಲ್ಲಿ ತನಗೆ ಸೂಕ್ಷ್ಮತೆ ಇಲ್ಲ ಎನ್ನುವುದನ್ನು ಮತ್ತೊಮ್ಮೆ ಸಾಬೀತುಪಡಿಸಿದೆ ಎಂದಿರುವ ವೆಂಕಯ್ಯ ನಾಯ್ಡು, ಈ ಬಗ್ಗೆ ಕಾಂಗ್ರೆಸ್ ಪಕ್ಷದವರ ಹೇಳಿಕೆ ಹಾಗೂ ವಿರೋಧಾಭಾಸಗಳು ರಾಜಕೀಯ ಅವಕಾಶವಾದಿತನವನ್ನು ಸ್ಪಷ್ಟವಾಗಿ ತಿಳಿಸುತ್ತಿದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ. ಕಾಶ್ಮೀರದ ವಿಷಯದಲ್ಲಿ ಕಾಂಗ್ರೆಸ್ ನ ಅಸ್ಥಿರವಾದ ನಿಲುವು ಸ್ಥಿರವಾಗಿದೆ ಎಂದು ವ್ಯಂಗ್ಯವಾಡಿರುವ ವೆಂಕಯ್ಯ ನಾಯ್ಡು , ಕಾಂಗ್ರೆಸ್ ನಾಯಕರಿಗೆ ರಾಷ್ಟ್ರೀಯ ಹಿತಕ್ಕಿಂತ ರಾಜಕೀಯ ಅವಕಾಶವಾದಿತನ ಹೆಚ್ಚಾಗಿದೆ ಎಂಬಂತೆ ತೋರುತ್ತಿದೆ ಎಂದಿದ್ದಾರೆ. ಕಾಂಗ್ರೆಸ್ ಪಕ್ಷವೇಕೆ ಪಾಕಿಸ್ತಾನವನ್ನು ನಿರಪರಾಧಿಯೆಂಬಂತೆ ಬಿಂಬಿಸಲು ಹೊರಟಿದೆ? ಕಾಶ್ಮೀರ ವಿಷಯದಲ್ಲಿ ಸೂಕ್ಷ್ಮವಾಗಿರುವಂತೆ ಕಾಂಗ್ರೆಸ್ ಗೆ ವೆಂಕಯ್ಯ ನಾಯ್ಡು  ಕರೆ ನೀಡಿದ್ದಾರೆ.