ಅಲಹಾಬಾದ್: ಆಯೋಧ್ಯೆಯಲ್ಲಿ ರಾಮ ಮಂದಿರ ವಿಚಾರವಾಗಿ ಪರ ವಿರೋಧ ಹೇಳಿಕೆಗಳು ಕೇಳುತ್ತಿರುತ್ತವೆ. ಆದರೆ ರಾಮ್ ನಾಮ್ ಮೇ ಶಕ್ತಿ ಹೈ ಎಂದು ಉತ್ತರಪ್ರದೇಶದ ಕೆಲ ಮುಸ್ಲಿಂ ಹುಡುಗರು ಹೇಳಿದ್ದಾರೆ.

ರಾಮನ ಹೆಸರನ್ನು ಬರೆಯುವುದರಿಂದ ತಮಗೆ ಆಂತರಿಕ ಶಕ್ತಿ ಮತ್ತು ಉತ್ಸಾಹ ಸಿಗುತ್ತಿದೆ ಎಂದು ಅಲಹಾಬಾದ್ ನ ಫೈಸಲ್ ಖಾನ್ ಹಾಗೂ ಆತನ ಮುಸ್ಲಿಂ ಗೆಳೆಯರು ಹೇಳುತ್ತಾರೆ. ಈ ಹುಡುಗರು ಕಳೆದ ಹಲವು ವರ್ಷಗಳಿಂದ ಶ್ರೀರಾಮನ ಹೆಸರನ್ನು ಕಾಗದದಲ್ಲಿ ಬರೆಯುತ್ತಾ ಬಂದಿದ್ದಾರೆ. ರಾಮನ ಹೆಸರು ಬರೆದ ಹಾಳೆಗಳನ್ನು ಇವರು ಪ್ರತೀ ವರ್ಷವೂ ಮಾಘ ಮೇಳದಲ್ಲಿ ಸಮರ್ಪಿಸುತ್ತಾ ಬಂದಿದ್ದಾರೆ.

ರಾಮನ ಹೆಸರನ್ನು ನಿತ್ಯ ಬರೆಯುವುದನ್ನು ಇವರು ಮರೆಯುವುದೇ ಇಲ್ಲ. ಹಿಂದಿ, ಇಂಗ್ಲಿಷ್ ಮತ್ತು ಉರ್ದು ಭಾಷೆಗಳಲ್ಲಿ ಇವರು ಕಳೆದ ಎಂಟು ವರ್ಷಗಳಿಂದ ರಾಮನ ಹೆಸರು ಬರೆಯುತ್ತಿದ್ದಾರೆ. ತಮ್ಮ ಮಾನಸಿಕ ಸ್ವಾಸ್ಥ್ಯ, ಏಕಾಗ್ರತೆ ಗಮನಾರ್ಹ ರೀತಿಯಲ್ಲಿ ಹೆಚ್ಚಾಗಿದೆ ಎಂದು ಈ ಹುಡುಗರು ಅಭಿಪ್ರಾಯಪಡುತ್ತಾರೆ.

ಈ ಮುಸ್ಲಿಮ್ ಹುಡುಗರು ತಮ್ಮ ಧರ್ಮ ಬಿಟ್ಟು ರಾಮನ ಹೆಸರು ಹಿಡಿದಿಲ್ಲ. ಪ್ರತೀ ದಿನವೂ ನಮಾಜ್ ಮಾಡುವುದನ್ನು ತಪ್ಪಿಸುವುದಿಲ್ಲ. ಇವರಿಗೆ ಕುರಾನ್'ನಷ್ಟೇ ಭಗವದ್ಗೀತೆ ಬಗ್ಗೆಯೂ ಜ್ಞಾನವಿದೆ. ಗೀತೆಯ ಅನೇಕ ಶ್ಲೋಕಗಳು ಇವರಿಗೆ ಕಂಠಪಾಠವಾಗಿವೆ.