ಪಾಟ್ನಾ: 2015ರಲ್ಲಿ ನಡೆದ ಬಂದ್ ವೇಳೆಯಲ್ಲಿನ ಹಿಂಸಾಚಾರ ಪ್ರಕರಣ ಸಂಬಂಧ ಆರ್ ಜೆಡಿ ಮುಖ್ಯಸ್ಥ ಲಾಲು ಪ್ರಸಾದ್ ಯಾದವ್ ವಿರುದ್ಧದ ಪ್ರಕರಣಗಳನ್ನು ನಿತೀಶ್ ಕುಮಾರ್ ನೇತೃತ್ವದ  ಬಿಹಾರ ಸರ್ಕಾರ ವಾಪಸ್ ಪಡೆದಿದೆ.

ಕಳೆದ ವರ್ಷ ಜುಲೈ 27ರಂದು ಆರ್‌ಜೆಡಿ ಕರೆ ನೀಡಿದ್ದ ರಾಜ್ಯ ಬಂದ್ ವೇಳೆ ಸಾಕಷ್ಟು ಹಿಂಸಾಚಾರ ನಡೆದಿತ್ತು. ಅಲ್ಲದೆ ಆರ್ ಜೆಡಿ ಪಕ್ಷದ ನಾಯಕರು ಸರ್ಕಾರಿ ನೌಕರರ ಕರ್ತವ್ಯಕ್ಕೆ  ಅಡ್ಡಿಪಡಿಸಿದ್ದರು ಎಂಬ ಆರೋಪ ಕೇಳಿಬಂದಿತ್ತು. ಈ ಸಂಬಂಧ ಅಂದು ಪಾಟ್ನಾ ಹೈಕೋರ್ಟ್ ಸ್ವಯಂ ಪ್ರೇರಿತವಾಗಿ ದಾಖಲಿಸಿದ್ದ ಪ್ರಕರಣಗಳನ್ನು ಬುಧವಾರ ನಿತೀಶ್ ಕುಮಾರ್ ಅವರು  ಹಿಂಪಡೆದಿದ್ದಾರೆ. ಲಾಲು ಪ್ರಸಾದ್ ಯಾದವ್, ಅವರ ಪುತ್ರ ತೇಜಸ್ವಿ ಯಾದವ್(ಬಿಹಾರದ ಉಪ ಮುಖ್ಯಮಂತ್ರಿ) ಮತ್ತು ತೇಜ್ ಪ್ರತಾಪ್ ಯಾದವ್(ಆರೋಗ್ಯ ಸಚಿವ) ಸೇರಿ ಪಕ್ಷದ 262  ನಾಯಕರ ವಿರುದ್ಧ ದಾಖಲಾಗಿದ್ದ ವಿಧ್ವಸಂಕ ಕೃತ್ಯ ಮತ್ತು ಸರ್ಕಾರಿ ಅಧಿಕಾರಿಗಳ ಕರ್ತವ್ಯಕ್ಕೆ ಅಡ್ಡಿಪಡಿಸಿದ ಪ್ರಕರಣವನ್ನು ಬಿಹಾರ ಸರ್ಕಾರ ಹಿಂಪಡೆದಿದೆ.

ಸರ್ಕಾರದ ಕ್ರಮವನ್ನು ಟೀಕಿಸಿದ ಬಿಜೆಪಿ
ಇದೇ ವೇಳೆ ಲಾಲು ಪ್ರಸಾದ್ ಮತ್ತು ಅವರ ಪಕ್ಷದ ವಿರುದ್ಧದ ಪ್ರಕರಣ ಹಿಂಪಡೆದಿದ್ದಕ್ಕೆ ಬಿಹಾರದ ಮುಖ್ಯಮಂತ್ರಿ ನಿತೀಶ್ ಕುಮಾರ್ ಅವರನ್ನು ಬಿಜೆಪಿ ಟೀಕಿಸಿದೆ. ಈ ನಿರ್ಧಾರ ಕೈಗೊಳ್ಳುವ  ಮುನ್ನ, ಸ್ವಯಂಪ್ರೇರಿತವಾಗಿ ಪ್ರಕರಣ ದಾಖಲಿಸಿದ್ದ ಪಾಟ್ನಾ ಹೈಕೋರ್ಟ್ ಬಳಿ ಸರ್ಕಾರ ಅನುಮತಿ ಕೋರಿದೆಯೇ? ಸರ್ಕಾರದ ಕ್ರಮ ನ್ಯಾಯಾಂಗ ನಿಂದನೆಯಲ್ಲವೇ? ಇಂಥ ಸಾವಿರಾರು  ಪ್ರಕರಣಗಳು ರಾಜ್ಯದಲ್ಲಿ ದಾಖಲಾಗಿದ್ದು, ಅವುಗಳನ್ನೂ ಸರ್ಕಾರ ಹಿಂಪಡೆಯುತ್ತದೆಯೇ? ಎಂದು ಬಿಜೆಪಿ ಹಿರಿಯ ನಾಯಕ ಸುಶೀಲ್ ಕುಮಾರ್ ಮೋದಿ ಪ್ರಶ್ನಿಸಿದ್ದಾರೆ.