ಮಧ್ಯಪ್ರದೇಶ: ಮಧ್ಯ ಪ್ರದೇಶದ ದಮೋಹ್ ಜಲ್ಲೆಯಲ್ಲಿ ಮಣ್ಣಿನಡಿಯಲ್ಲಿ ಹೂತಿದ್ದ ಪೈಪ್ ಮೂಲಕ ಅಡುಗೆ ಅನಿಲ ಪ್ರವಹಿಸಿ ಮನೆ ಸ್ಫೋಟಗೊಂಡ ಪರಿಣಾಮ 65ರ ಹರೆಯದ ಮಹಿಳೆಯೊಬ್ಬರು ಸಾವಿಗೀಡಾಗಿದ್ದಾರೆ. ಈ ಘಟನೆಯಲ್ಲಿ ಇಬ್ಬರು ಗಾಯಗೊಂಡಿದ್ದಾರೆಎಂದು ಪೊಲೀಸರು ಹೇಳಿದ್ದಾರೆ.
ಅಡುಗೆ ಅನಿಲ ಸೋರಿಕೆಯಾಗಿ ಬೋರ್‌ವೆಲ್ ಪೈಪ್ ಮೂಲಕ ಮನೆಯೊಳಗೆ ಬಂದು ಸ್ಫೋಟವಾಗಿದೆ. ಸ್ಫೋಟದಲ್ಲಿ ಮನೆ ಭಾಗಶಃ ಹಾನಿಯಾಗಿದ್ದು ಇಬ್ಬರಿಗೆ ಗಾಯಗಳಾಗಿದೆ ಎಂದು ಪ್ರಸ್ತುತ ಘಟನೆಯ ಪ್ರಾಥಮಿಕ ತನಿಖಾ ವರದಿಯಿಂದ ತಿಳಿದುಬಂದಿದೆ ಎಂದು ದಮೋಹ್ ಜಿಲ್ಲಾಧಿಕಾರಿ ಶ್ರೀನಿವಾಸ್ ಶರ್ಮಾ ಹೇಳಿದ್ದಾರೆ.
ಶುಕ್ರವಾರ ಈ ಘಟನೆ ನಡೆದಿದ್ದು, ಅನಿಲ ಹೇಗೆ ಸೋರಿಕೆಯಾಯಿತು ಎಂಬುದರ ಬಗ್ಗೆ ತಜ್ಞರು ತನಿಖೆ ನಡೆಸುತ್ತಿದ್ದಾರೆ.
ವಿಶೇಷ ಸಶಸ್ತ್ರಪಡೆ 25 ಬೆಟಾಲಿಯನ್ ಭೋಪಾಲ್ ನ ವೃಂದಾವನ್ ಅಹಿರ್‌ವಾರ್ ಮತ್ತು ಇವರ ಪತ್ನಿ ಶೀಲಾ ರಾಣಿ ಅವರು ಗಾಯಾಳುಗಳಾಗಿದ್ದು, ಅಹಿರ್‌ವಾರ್ ಅವರ ತಾಯಿ ರಾಜ್ ಪ್ಯಾರಿ ಸಾವಿಗೀಡಾಗಿದ್ದಾರೆ ಎಂದು ಪೊಲೀಸರು ಹೇಳಿದ್ದಾರೆ.