ಗಾಜಿಯಾಬಾದ್: ಇಡೀ ದೇಶವನ್ನು ಬೆಚ್ಚಿ ಬೀಳಿಸಿದ್ದ ನಿಥಾರಿ ಸರಣಿ ಅತ್ಯಾಚಾರ ಹಾಗೂ ಕೊಲೆ ಪ್ರಕರಣದ ಅಪರಾಧಿ ಸುರೇಂದ್ರ ಕೋಲಿಗೆ ನಂದಾ ದೇವಿ ಕೊಲೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸಿಬಿಐ ವಿಶೇಷ ಕೋರ್ಟ್ ಶುಕ್ರವಾರ ಗಲ್ಲು ಶಿಕ್ಷೆ ವಿಧಿಸಿದೆ.

2006ರಲ್ಲಿ ನಡೆದ ನಂದಾದೇವಿ ಕೊಲೆ ಪ್ರಕರಣ ಸುದೀರ್ಘ ವಿಚಾರಣೆ ನಡೆಸಿದ್ದ ಗಾಜಿಯಾಬಾದ್ ಸಿಬಿಐ ಕೋರ್ಟ್ ಕಳೆದ ಅಕ್ಟೋಬರ್ 5ರಂದು ಆರೋಪಿ ಸುರೇಂದ್ರ ಕೋಲಿ ತಪ್ಪಿತಸ್ಥ ಎಂದು ತೀರ್ಪು ನೀಡಿತ್ತು. ಆದರೆ ಶಿಕ್ಷೆಯ ಪ್ರಮಾಣವನ್ನು ಇಂದಿಗೆ ಕಾಯ್ದಿರಿಸಿತ್ತು.

ನಂದಾದೇವಿ ಮತ್ತು ರಿಂಪಾ ಹಲ್ದರ್ ಅವರ ಕೊಲೆ ಪ್ರಕರಣಗಳಲ್ಲಿ ಆರೋಪಿಯಾಗಿದ್ದ ಕೋಲಿ ಹಲವು ಬಾಲಕಿಯರ ಮೇಲೆ ಲೈಂಗಿಕ ಹಲ್ಲೆ ನಡೆಸಿ ಬಳಿಕ ಅವರನ್ನು ಕೊಲ್ಲುತ್ತಿದ್ದ ಎಂಬ ಆರೋಪ ಇತ್ತು. ಕೊಂದ ಬಳಿಕ ಅವರನ್ನು ಭಕ್ಷಿಸುತ್ತಿದ್ದ ಎಂಬ ಆರೋಪವೂ ಕೋಲಿ ಮೇಲೆ ಇದೆ. 

2004ರಿಂದ ಹಲವಾರು ಮಕ್ಕಳು ಕಣ್ಮರೆಯಾಗಿರುವ ಪ್ರಕರಣಗಳಲ್ಲಿ ಕೋಲಿ ಕೈವಾಡ ಇರುವ ಬಗ್ಗೆ ಇಬ್ಬರು ನಿಥಾರಿ ನಿವಾಸಿಗಳು ಸುಳಿವು ನೀಡಿದ ಬಳಿಕ ನಂದಾ ದೇವಿ ಕೊಲೆ ಪ್ರಕರಣ ಹಾಗೂ ಇತರ ಸರಣಿ ಹತ್ಯೆಗಳು ಬೆಳಕಿಗೆ ಬಂದಿದ್ದವು.