ನವದೆಹಲಿ: ಪತ್ನಿ ಸತ್ತು ಹಲವು ದಿನಗಳೇ ಕಳೆದರೂ ಕೊಳೆತ ಶವದೊಂದಿಗೆಯೇ 90 ವರ್ಷದ ವೃದ್ಧನೊಬ್ಬ ಜೀವನ ನಡೆಸುತ್ತಿದ್ದ ಘಟನೆಯೊಂದು ಆಗ್ನೇಯ ದೆಹಲಿಯ ಕಲ್ಕಜಿ ಪ್ರದೇಶದಲ್ಲಿ ನಡೆದಿದೆ.
ಆನಾರೋಗ್ಯದಿಂದ ಬಳಲುತ್ತಿದ್ದ ಗೋಪಿ ಜೆಥಾನಿ (85) ಎಂಬ ವೃದ್ಧೆ ಕೆಲ ದಿನಗಳ ಹಿಂದೆ ಮೃತಪಟ್ಟಿದ್ದಾರೆ. ದಂಪತಿಗಳು ಫ್ಲ್ಯಾಟ್ ನಲ್ಲಿ ಜೀವನ ನಡೆಸುತ್ತಿದ್ದು, ಇವರಿಗೆ ಮಕ್ಕಳಿಲ್ಲದಿರುವುದು ತನಿಖೆ ವೇಳೆ ತಿಳಿದುಬಂದಿದೆ. ಈ ಕಾರಣದಿಂದಲೇ ಆಕೆಯ ಪತಿ ಗೋವಿಂದ್ ರಾಮ್ (90) ಅವರು ಈ ವಿಚಾರವನ್ನು ಯಾರಿಗೂ ತಿಳಿಸದೆಯೇ ಸತ್ತ ಪತ್ನಿಯ ಶವದೊಂದಿಗೆ ಜೀವನ ನಡೆಸುತ್ತಿದ್ದ ಎಂದು ಪೊಲೀಸರು ಹೇಳಿದ್ದಾರೆ.
ದಂಪತಿಗಳ ಫ್ಲ್ಯಾಟ್ ನಿಂದ ದುರ್ವಾಸನೆ ಬರುತ್ತಿದ್ದರಿಂದ ನೆರೆಮನೆಯವರು ಮಾಹಿತಿ ನೀಡಿದ್ದರು. ಪ್ರಸ್ತುತ ಪ್ರಕರಣ ದಾಖಲಿಸಿಕೊಳ್ಳಲಾಗಿದ್ದು, ಗೋಪಿ ಜೆಥಾನಿಯವರ ಸಾವು ಸಹಜ ಸಾವೇ ಅಥವಾ ಉದ್ದೇಶ ಪೂರ್ವಕವಾಗಿ ಕೊಲೆ ಮಾಡಲಾಗಿದೆಯೇ ಎಂಬುದರ ಕುರಿತಂತೆ ತನಿಖೆ ನಡೆಸಲಾಗುತ್ತಿದೆ ಎಂದು ಅವರು ಹೇಳಿದ್ದಾರೆ.
ನನ್ನ ಪತ್ನಿ ಕಳೆದ ಕೆಲ ದಿನಗಳಿಂದಲೂ ಹಾಸಿಗೆ ಹಿಡಿದಿದ್ದಳು. ನಿನ್ನೆ ಹಾಸಿಗೆಯಿಂದ ಕೆಳಗೆ ಬಿದ್ದಿದ್ದಳು. ನಂತರ ಮೇಲೆ ಏಳಲೇ ಇಲ್ಲ ಎಂದು ಗೋವಿಂದ್ ರಾಮ್ ಅವರು ವಿಚಾರಣೆ ವೇಳೆ ಹೇಳಿದ್ದಾರೆ. ಪ್ರಸ್ತುತ ರಾಮ್ ಅವರು ನಿಶ್ಯಕ್ತಿಯಿಂದ ಬಳಲುತ್ತಿದ್ದು, ಚಿಕಿತ್ಸೆಗಾಗಿ ಏಮ್ಸ್'ಗೆ ಕಳುಹಿಸಲಾಗಿದೆ ಎಂದು ಡಿಸಿಫಿ ರೋಮಿಲ್ ಬಾನಿಯಾ ಅವರು ತಿಳಿಸಿದ್ದಾರೆ.