ನವದೆಹಲಿ: ಆಂಧ್ರ ಪ್ರದೇಶದ ಪಾಲಿನ ನೀರನ್ನೇ ತೆಲಂಗಾಣ ಹಂಚಿಕೊಳ್ಳಬೇಕು ಎಂಬ ಕೃಷ್ಣಾ ನ್ಯಾಯಾಧಿಕರಣದ ಆದೇಶವನ್ನು ಪ್ರಶ್ನಿಸಿ ಸುಪ್ರೀಂ ಕೋರ್ಟ್ ಮೆಟ್ಟಿಲೇರಲು ಆಂಧ್ರ ಪ್ರದೇಶ  ಹಾಗೂ ತೆಲಂಗಾಣ ಸರ್ಕಾರಗಳು ನಿರ್ಧರಿಸಿವೆ ಎಂದು ತಿಳಿದುಬಂದಿದೆ.

ಕೃಷ್ಣಾ ನ್ಯಾಯಾಧಿಕರಣದ ತೀರ್ಪಿನ ಕುರಿತಂತೆ ಉಭಯ ರಾಜ್ಯಗಳು ಅಸಮಾಧಾನ ವ್ಯಕ್ತಪಡಿಸಿದ್ದು, ತೀರ್ಪಿನ ಕುರಿತು ಮರು ಪರಿಶೀಲನೆ ನಡೆಸುವಂತೆ ಕೋರಿ ಸುಪ್ರೀಂ ಕೋರ್ಟ್ ನಲ್ಲಿ ಅರ್ಜಿ  ಸಲ್ಲಿಸುವುದಾಗಿ ಹೇಳಿವೆ. ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ತೆಲಂಗಾಣ ರಾಜ್ಯ ಸರ್ಕಾರದ ಸಲಹೆಗಾರ ವಿದ್ಯಾಸಾಗರ್ ರಾವ್ ಅವರು, ಈ ಹಿಂದಿನ ಐ ತೀರ್ಪಿನಲ್ಲಿ ಅವಿಭಜಿತ ಆಂಧ್ರ ಪ್ರದೇಶಕ್ಕೆ  ಅನ್ಯಾಯವಾಗಿತ್ತು. ಇನ್ನೂ ಸುಮಾರು 200 ರಿಂದ 205 ಟಿಎಂಸಿ ನೀರು ಅವಿಭಜಿತ ಆಂಧ್ರ ಪ್ರದೇಶಕ್ಕೆ ಬರಬೇಕಿತ್ತು. ಹೀಗಾಗಿ ತೀರ್ಪು ಮರು ಪರಿಶೀಲಿಸುವಂತೆ ಕೋರಲಾಗಿತ್ತು.

ತೆಲಂಗಾಣ ರಾಜ್ಯ ರಚನೆ ಬಳಿಕ ಈ ಹಿಂದಿನ ಮನವಿ ಸೇರಿದಂತೆ ಯೋಜನಾವಾರು ನೀರು ಹಂಚಿಕೆ ಮಾಡುವಂತೆ ನ್ಯಾಯಾಧಿಕರಣದಲ್ಲಿ ಕೋರಲಾಗಿತ್ತು. ಆದರೆ ಕೃಷ್ಣಾ ನ್ಯಾಯಾಧಿಕರಣ ಈ  ಹಿಂದಿನ ಐತೀರ್ಪನ್ನೇ ಎತ್ತಿ ಹಿಡಿದು, ಆಂಧ್ರ ಪ್ರದೇಶಕ್ಕೆ ಹಂಚಿಕೆ ಮಾಡಲಾಗಿದ್ದ ನೀರಲ್ಲೇ ಪಾಲು ಪಡೆಯುವಂತೆ ಆದೇಶಿಸಿದೆ. ಇದರಿಂದಾಗಿ ಹೆಚ್ಚುವರಿ ನೀರು ಪಡೆಯುವ ನಮ್ಮ ಮೂಲ  ಬೇಡಿಕೆ ಇಡೇರಿಲ್ಲ. ಹೀಗಾಗಿ ತೀರ್ಪು ಮರು ಪರಿಶೀಲನೆ ನಡೆಸುವಂತೆ ಸುಪ್ರೀಂ ಕೋರ್ಟ್ ನಲ್ಲಿ ಅರ್ಜಿ ಸಲ್ಲಿಸಲಾಗುವುದು ಎಂದು ಹೇಳಿದ್ದಾರೆ.