ನವದೆಹಲಿ: ಏರ್ ಇಂಡಿಯಾ ವಿಮಾನ ಸಿಬ್ಬಂದಿ ಮೇಲೆ ಹಲ್ಲೆ ನಡೆಸಿದ ಪ್ರಕರಣಕ್ಕೆ ಸಂಬಂಧಿಸಿದಂತೆ ತೀವ್ರ ವಿವಾದಕ್ಕೀಡಾಗಿದ್ದ ಶಿವಸೇನಾ ಸಂಸದ ರವೀಂದ್ರ ಗಾಯಕ್ವಾಡ್ ಅವರು ಇದೇ ಮೊದಲ ಬಾರಿಗೆ ಲೋಕಸಭೆ ಕಲಾಪಕ್ಕೆ ಹಾಜರಾಗಿದ್ದು, ಹಲ್ಲೆ ಪ್ರಕರಣ ಸಂಬಂಧ ವಿವರಣೆಯನ್ನು ನೀಡಿದ್ದಾರೆ. 

ಲೋಕಸಭೆಗೆ ಹಾಜರಾದ ಬಳಿಕ ವಿಮಾನದಲ್ಲಿ ನಡೆದ ಘಟನೆಯ ವಿವರಣೆಯನ್ನು ಗಾಯಕ್ವಾಡ್ ನೀಡಿದರು, ವಿಮಾನದ ಸಿಬ್ಬಂದಿಗಳು ನನ್ನ ಮೇಲೆ ಕೂಗಾಡಿದ್ದರು. ಮಾಧ್ಯಮಗಳು ಹಾಗೂ ಸಂಸದರು ನನ್ನ ಮೇಲೆ ಹರಿಹಾಯುತ್ತಿದ್ದಾರೆ. ನಾನು ಮಾಡಿದ ಅಪರಾಧವಾದರೂ ಏನು...?  ನನ್ನಿಂದ ಯಾರಿಗಾದರೂ ನೋವಾಗಿದ್ದರೆ ನಾನು ಕ್ಷಮೆಯಾಚಿಸುತ್ತೇನೆ. ಏರ್ ಇಂಡಿಯಾ ಅಧಿಕಾರಿಗಳಂತೂ ನಾನು ಕ್ಷಮೆಯಾಚಿಸುತ್ತಿಲ್ಲ ಎಂದು ಹೇಳಿದರು. ಇದೇ ವೇಳೆ ಪ್ರಕರಣ ಸಂಬಂಧ ಸಂಪೂರ್ಣವಾಗಿ ತನಿಖೆ ನಡೆಸಬೇಕೆಂದು ಸಂಸತ್ತಿನಿಂದ ಮುಂದೆ ಮನವಿಯಿಟ್ಟರು. 

ಈ ವೇಳೆ ಗಾಯಕ್ವಾಡ್ ವಿರುದ್ಧ ಕಿಡಿಕಾರಿದ ವಿಮಾನಯಾನ ಸಚಿವ ಅಶೋಕ್ ಗಜಪತಿ ರಾಜು ಅವರು, ಸುರಕ್ಷತೆ ವಿಚಾರದಲ್ಲಿ ಯಾವುದೇ ಕಾರಣಕ್ಕೂ ರಾಜಿಯಾಗಲು ಸಾಧ್ಯವಿಲ್ಲ. ಕಾನೂನು ಕ್ರಮ ಕೈಗೊಳ್ಳಲಿದೆ ಎಂದು ಹೇಳಿದರು.