ನವದೆಹಲಿ: ಗೋರಕ್ಷಣೆ ಕುರಿತಂತೆ ಆರ್'ಎಸ್ಎಸ್ ಮುಖ್ಯಸ್ಥ ಮೋಹನ್ ಭಾಗವತ್ ಅವರು ನೀಡಿದ್ದ ಹೇಳಿಕೆಯನ್ನುಜನತಾದಳ (ಸಂಯುಕ್ತ) ಪಕ್ಷ ಸೋಮವಾರ ಖಂಡಿಸಿದೆ. 

ಭಾಗವತ್ ಹೇಳಿಕೆ ಕುರಿತಂತೆ ಪ್ರತಿಕ್ರಿಯೆ ನೀಡಿರುವ ಜೆಡಿ(ಯು) ನಾಯಕ ಅಲಿ ಅನ್ವಾರ್ ಅವರು, ಆರ್'ಎಸ್ಎಸ್ ಸಂಘಟನೆಯ ಸಿದ್ಧಾಂತಗಳನ್ನು ಯಾರು ಪಾಲನೆ ಮಾಡುತ್ತಿದ್ದಾರೋ, ಅವರು ಹಿಂಸಾಚಾರದಲ್ಲಿ ಭಾಗಿಯಾಗುತ್ತಿದ್ದಾರೆಂದು ಹೇಳಿದ್ದಾರೆ. 

ವಿವಾದಗಳನ್ನು ಹುಟ್ಟುಹಾಕಿದವರು ಮೊದಲು ನಿಲ್ಲಿಸಬೇಕು. ಪ್ರಸ್ತುತ ಅವರ ಪಕ್ಷ ಅಧಿಕಾರದಲ್ಲಿದೆ. ಪಕ್ಷದ ಸಿದ್ಧಾಂತಗಳನ್ನು ಪಾಲನೆ ಮಾಡುತ್ತಿರುವವರೇ ಇದನ್ನೆಲ್ಲಾ ಮಾಡುತ್ತಿದ್ದು, ಈ ರೀತಿಯ ಹಿಂಸಾಚಾರಗಳು ಕೇವಲ ಕ್ಷಣಿಕವಷ್ಟೇ, ದ್ವೇಷಪೂರಿತ ವಾತಾವರಣ ಕೆಲ ಸಮಯ ಮಾತ್ರವಷ್ಟೇ ಉಳಿದಿರುತ್ತದೆ ಎಂದು ತಿಳಿಸಿದ್ದಾರೆ. 

ಮತ್ತೊಬ್ಬ ಜೆಡಿಯು ನಾಯಕ ಕೆ.ಸಿ ತ್ಯಾಗಿಯವರು ಮಾತನಾಡಿ, ಮೋಹನ್ ಭಾಗವತ್ ಅವರ ಸಂಘಟನೆ ಕಾರ್ಯಕರ್ತರು ಗೋರಕ್ಷಣೆ ಹೆಸರಿನಲ್ಲಿ ಮನುಷ್ಯರನ್ನೇ ಹತ್ಯೆ ಮಾಡುತ್ತಿದ್ದಾರೆ. ಇದು ನಿಜಕ್ಕೂ ಅರಾಜಕತೆ. ಸಮಾಜ ವಿರೋಧಿಗಳು ಕಾನೂನನ್ನು ತಮ್ಮ ಕೈಗೆ ಎತ್ತಿಕೊಂಡು ತಮಗೆ ಇಷ್ಟಬಂದಂತೆ ನಡೆದುಕೊಳ್ಳುತ್ತಿದ್ದಾರೆ. ಅಂತಹ ಜನರನ್ನುದ್ದೇಶಿಸಿ ಕೂಡ ಭಾಗವತ್ ಅವರು ಮಾತನಾಡಬೇಕಿದೆ ಎಂದು ಹೇಳಿದ್ದಾರೆ.