ಮುಂಬೈ: ಅಂಕಣಗಾರ್ತಿ ಶೋಭಾ ಡೇ ಮತ್ತೊಮ್ಮೆ ಟೀಕೆಗೆ ಗುರಿಯಾಗಿದ್ದಾರೆ. ಈ ಬಾರಿ ಶೋಭಾ ಮುಂಬೈ ಪೊಲೀಸ್ ವಿರುದ್ಧ ಟ್ವಿಟ್ಟರ್ ನಲ್ಲಿ ತಮಾಷೆ ಮಾಡಲು ಹೊರಟಿದ್ದರು. ಆದರೆ ಅದು ಸರಿ ಕಾಣದೆ ಪೊಲೀಸರು ಅಂಕಣಗಾರ್ತಿಗೆ ತೀಕ್ಷ್ಣ ಪ್ರತಿಕ್ರಿಯೆ ನೀಡಿದ್ದಾರೆ.
ನಿನ್ನೆ ಸಂಜೆ ಶೋಭಾ ಡೇ ಸ್ಥೂಲಕಾಯದ ಪೊಲೀಸರೊಬ್ಬರ ಚಿತ್ರವನ್ನು ಟ್ವಿಟ್ಟರ್ ನಲ್ಲಿ ಹಾಕಿ ಇಂದು ನಗರದಲ್ಲಿ ಭಾರೀ ಬಂದೋಬಸ್ತ್ ಎಂದು ಕ್ಯಾಪ್ಷನ್ ಹಾಕಿದ್ದರು. ಮೂರು ಗಂಟೆ ಕಳೆದ ನಂತರ ಮುಂಬೈ ಪೊಲೀಸರ ಅಧಿಕೃತ ಟ್ವಿಟ್ಟರ್ ಖಾತೆಯಿಂದ ಅದಕ್ಕೆ ಉತ್ತರ ಬಂತು. ''ನಾವು ತಮಾಷೆಯನ್ನು ಇಷ್ಟಪಡುತ್ತೇವೆ ಶೋಭಾ ಡೇಯವರೇ. ಆದರೆ ಇದು ಮಾತ್ರ ಸಂಪೂರ್ಣ ತಪ್ಪು. ಜವಾಬ್ದಾರಿಯುತ ಪ್ರಜೆಗಳಾದ ನಿಮ್ಮಂತವರಿಂದ ನಾವು ಒಳ್ಳೆಯದನ್ನು ನಿರೀಕ್ಷಿಸುತ್ತೇವೆ ಎಂದು ಟ್ವೀಟ್ ಮಾಡಲಾಗಿದೆ.
ಶೋಭಾ ಡೇ ಮಾಡಿದ ಟ್ವೀಟ್ ವೈರಲ್ ಆಗಿ ಅದಕ್ಕೆ ಸಾವಿರಕ್ಕೂ ಹೆಚ್ಚು ಕಮೆಂಟ್ ಗಳು ಬಂದಿವೆ. ಹೆಚ್ಚಿನ ಟ್ವೀಟ್ ಗಳು ಮುಂಬೈ ಪೊಲೀಸರನ್ನು ಬೆಂಬಲಿಸಿ ಶೋಭಾ ಡೇ ವಿರುದ್ಧ ಬೈದು ಬಂದಿವೆ. ಮುಂಬೈ ಪೊಲೀಸ್ ಪೇಜ್ ನಲ್ಲಿ ಶೋಭಾ ಡೇ ಟ್ವೀಟ್ ನ್ನು ಪಿನ್ ಮಾಡಿದ್ದಾರೆ.