ಮುಂಬೈ: ಮಹಾರಾಷ್ಟ್ರದ ರೈತರ ಸಾಲ ಮನ್ನಾ ಮಾಡಿರುವ ಕೀರ್ತಿಯನ್ನು ಕಸಿಯಲು ಬಿಜೆಪಿ ಯತ್ನಿಸುತ್ತಿದೆ ಎಂದು ಎನ್ ಡಿಎ ಮಿತ್ರ ಪಕ್ಷ ಶಿವಸೇನೆ ಆರೋಪಿಸಿದೆ. 

ಕೀರ್ತಿಯನ್ನು ಕಸಿದುಕೊಳ್ಳುವುದೂ ಸಹ ಈಗ ರಾಜಕೀಯ ಸಿದ್ಧಾಂತವಾಗಿಬಿಟ್ಟಿದೆ ಎಂದು ಶಿವಸೇನೆ ಬಿಜೆಪಿ ವಿರುದ್ಧ ಟೀಕಾಪ್ರಹಾರ ನಡೆಸಿದೆ. ಈ ಬಗ್ಗೆ ಸಾಮ್ನಾ ಪತ್ರಿಕೆಯಲ್ಲಿ ಲೇಖನ ಪ್ರಕಟಿಸಿರುವ ಶಿವಸೇನೆ, ಮಹಾರಾಷ್ಟ್ರದಲ್ಲಿ ರೈತರು ಹಲವು ಬೇಡಿಕೆಗಳನ್ನು ಮುಂದಿಟ್ಟು ನಡೆಸಿದ್ದ ಪ್ರತಿಭಟನೆ ವೇಳೆ, ರೈತರ ಸಾಲ ಮನ್ನ ಮಾಡುವುದಕ್ಕೆ ಬಿಜೆಪಿಯ ಮೇಲೆ ಶಿವಸೇನೆ ಸಹ ಒತ್ತಡ ಹೇರಿತ್ತು. ಆ ನಂತರವೇ ಮಹಾರಾಷ್ಟ್ರ ಸಿಎಂ ದೇವೇಂದ್ರ ಫಡ್ನವೀಸ್ ರೈತರ ಸಾಲ ಮನ್ನಾ ಮಾಡಿದ್ದಾರೆ ಎಂದು ಹೇಳಿದೆ. 

ಲಾಭ-ನಷ್ಟಗಳನ್ನು ಯೋಚಿಸಿ ರಾಜಕೀಯ ಮಾಡಲಾಗುತ್ತದೆ. ಜನರನ್ನು ಗೊಂದಲಕ್ಕೀಡು ಮಾಡುವುದಕ್ಕೆ ಯೋಜನೆಗಳನ್ನು ರೂಪಿಸಲಾಗುತ್ತದೆ. ಗರೀಭಿ ಹಠಾವೋ ಯೋಜನೆ ಏನಾಯಿತು? ಅಚ್ಚೆ ದಿನ್ ಈಗ ಒಳ್ಳೆಯ ಸಂಶೋಧನಾತ್ಮಕ ವಿಷಯವಾಗಿದೆ ಎಂದು ಸಾಮ್ನಾ ಬಿಜೆಪಿ ವಿರುದ್ಧ ಹರಿಹಾಯ್ದಿದೆ.