ನವದೆಹಲಿ: ಉತ್ತರಪ್ರದೇಶ ಸೇರಿದಂತೆ ಇತ್ತೀಚೆಗಷ್ಟೇ ಮುಕ್ತಾಯಗೊಂಡ ಪಂಚ ರಾಜ್ಯಗಳ ಚುನಾವಣೆಯಲ್ಲಿ ಕಾಂಗ್ರೆಸ್ ಸೋಲಿಗೆ ಪಕ್ಷದ ಹಲವು ಹಿರಿಯ ನಾಯಕರು ಪಕ್ಷದ ಉಪಾಧ್ಯಕ್ಷ ರಾಹುಲ್ ಗಾಂಧಿ ಅವರತ್ತ ಬೊಟ್ಟು ಮಾಡಿದ ವಿವಾದ ತಣ್ಣಗಾಗುವ ಮೊದಲೇ, ಸ್ವತಃ ರಾಹುಲ್ ಆಪ್ತ, ಪಕ್ಷದ ಪ್ರಧಾನ ಕಾರ್ಯದರ್ಶಿ ದಿಗ್ವಿಜಯ್ ಸಿಂಗ್ ಅವರು ರಾಹುಲ್ ವಿರುದ್ಧ ಬಹಿರಂಗವಾಗಿ ತಮ್ಮ ಅಸಮಾಧಾನವನ್ನು ವ್ಯಕ್ತಪಡಿಸಿದ್ದಾರೆ. 

ಇಂಡಿಯನ್ ಎಕ್ಸ್ ಪ್ರೆಸ್ ಐಡಿಯಾ ಎಕ್ಸ್ ಚೇಂಜ್ ಕಾರ್ಯಕ್ರಮದಲ್ಲಿ ಮಾತನಾಡಿರುವ ಅವರು, ಕಾಂಗ್ರೆಸ್ ಉಪಾಧ್ಯಕ್ಷ ರಾಹುಲ್ ಗಾಂಧಿಯವರು ನಿರ್ಣಾಯಕ ತೀರ್ಮಾನಗಳನ್ನು ಕೈಗೊಳ್ಳುವಲ್ಲಿ ವಿಫಲವಾಗುತ್ತಿದ್ದು, ಪ್ರಿಯಾಂಕಾ ಗಾಂಧಿಯವರು ರಾಜಕೀಯ ಚಟುವಟಿಕೆಗಳಲ್ಲಿ ತೊಡಗಿಕೊಂಡಿದ್ದೇ ಆದರೆ, ದೇಶದಲ್ಲಿರುವ ಎಲ್ಲಾ ಕಾಂಗ್ರೆಸ್ ಸದಸ್ಯರಿಗೆ ಸಂತೋಷವಾಗುತ್ತದೆ ಎಂದು ಹೇಳಿದ್ದಾರೆ. 

ಕಾಂಗ್ರೆಸ್ ಗೆ ಉಪಾಧ್ಯಕ್ಷ ರಾಹುಲ್ ಗಾಂಧಿ ಅವರ ಪಾತ್ರ ನಿರ್ಣಾಯಕವಾಗಿದ್ದು, ಅವರು ನಿರೀಕ್ಷಿತ ಮಟ್ಟದಲ್ಲಿ ಕಾರ್ಯನಿರ್ವಹಿಸುತ್ತಿಲ್ಲ. ಕಾಂಗ್ರೆಸ್ ಪಕ್ಷಕ್ಕೆ ಹೊಸ ಮಾದರಿ, ಹೊಸ ದಿಕ್ಸೂಚಿ, ನವ ಶೈಲಿಯ ಪ್ರಚಾರಗಳ ಅಗತ್ಯವಿದ್ದು, ವಿಶ್ವಾಸದೊಂದಿಗೆ ಆಧುನಿಕ ಕಾಂಗ್ರೆಸ್ ನ್ನು ನಿರ್ಮಾಣ ಮಾಡಬೇಕಿದೆ. 

ಪಕ್ಷದಲ್ಲಿ ರಾಹುಲ್ ಗಾಂಧಿಗಿಂತಲೂ ಉತ್ತಮವಾದ ವ್ಯಕ್ತಿಯಿಲ್ಲ. ಹೀಗಾಗಿ ರಾಹುಲ್ ಗಾಂಧಿಯವರೇ ಸೂಕ್ತ ರೀತಿಯ ಕ್ರಮಗಳನ್ನು ಕೈಗೊಳ್ಳಬೇಕು. ನನ್ನ ದೂರೇನಿದ್ದರೂ ರಾಹುಲ್ ಗಾಂಧಿಯವರ ಕುರಿತಂತೆಯೇ. ರಾಹುಲ್ ಅವರು ನಿರ್ಣಾಯಕವಾಗಿ ಯಾವುದೇ ನಿರ್ಧಾರಗಳನ್ನು ತೆಗೆದುಕೊಳ್ಳುತ್ತಿಲ್ಲ. ಈ ಬಗ್ಗೆ ನಾನು ರಾಹುಲ್ ಅವರ ಬಳಿ ಸಾಕಷ್ಟು ಬಾರಿ ಮಾತನಾಡಿದ್ದೇನೆ. ಕೆಲವೊಮ್ಮೆ ಅವರು ನನ್ನ ಮೇಲೆಯೇ ಕೋಪಗೊಂಡಿದ್ದಾರೆ. ಆದರೂ, ನಾನು ನನ್ನ ಅನಿಸಿಕೆಯನ್ನು ಹೇಳುತ್ತಲೇ ಇರುತ್ತೇನೆ. ಕಾಂಗ್ರೆಸ್ ಗಾಗಿ ನೆಹರೂ ಕುಟುಂಬ ಬಹಳ ಕೊಡುಗೆಯನ್ನು ನೀಡಿದೆ. ಸಮಸ್ಯೆ ಇರುವುದು ಪಕ್ಷದ ಬಲವರ್ಥನೆಯ ಕುರಿತೇ ಹೊರತು ನಾಯಕತ್ವದ ಕುರಿತಲ್ಲ ಎಂದು ತಿಳಿಸಿದ್ದಾರೆ.