ಶ್ರೀನಗರ: ಕಣಿವೆ ರಾಜ್ಯ ಜಮ್ಮು ಮತ್ತು ಕಾಶ್ಮೀರದಲ್ಲಿ ಉಗ್ರರ ಆಟಾಟೋಪ ಮಿತಿ ಮೀರಿದ್ದು, ಶ್ರೀನಗರದ ಎಂಎಲ್ ಸಿ ಮನೆಗೆ ನುಗ್ಗಿದ ಉಗ್ರರು ಅವರ ಮನೆಯಲ್ಲಿದ್ದ ಶಸ್ತ್ರಾಸ್ತ್ರಗಳನ್ನು ಹೊತ್ತೊಯ್ದಿದ್ದಾರೆ.

ಕಾಂಗ್ರೆಸ್ ಎಂಎಲ್ ಸಿ ಮುಜಾಫರ್ ಫರ್ರೇ ಅವರ ಶ್ರೀನಗರದ  ಜವಾಹರ್ ನಗರಲ್ಲಿರುವ ಮನೆಗೆ ನಿನ್ನೆ ತಡರಾತ್ರಿ ಶಂಕಿತ ಉಗ್ರರು ನುಗ್ಗಿದ್ದು, ಈ ವೇಳೆ ಮನೆಯಲ್ಲಿದ್ದ ಸುಮಾರು 4 ಎಕೆ 47 ರೈಫಲ್ ಗಳನ್ನು ಹೊತ್ತೊಯ್ದಿದ್ದಾರೆ ಎಂದು ತಿಳಿದುಬಂದಿದೆ.

ಉಗ್ರರು ಮನೆಗೆ ನುಗ್ಗಿದೆ ಸಂದರ್ಭದಲ್ಲಿ ಭದ್ರತಾ ಸಿಬ್ಬಂದಿಗಳು ಇರಲಿಲ್ಲ ಎಂದು ಹೇಳಲಾಗುತ್ತಿದೆ. ಪ್ರಸ್ತುತ ಪ್ರಕರಣ ದಾಖಲಿಸಿಕೊಂಡಿರುವ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ. ಅಲ್ಲದೆ ಶ್ರೀನಗರದಾದ್ಯಂತ ಹೈಅಲರ್ಟ್ ಘೋಷಣೆ ಮಾಡಲಾಗಿದ್ದು, ಶ್ರೀನಗರದಿಂದ ಹೊರ ಜಿಲ್ಲೆಗಳಿಗೆ ಸಂಪರ್ಕ ಕಲ್ಪಿಸುವ ರಸ್ತೆಗಳಲ್ಲಿ ನಾಕಾಬಂದಿ ಹೇರಲಾಗಿದೆ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ. ಅಂತೆಯೇ ಭಾರತೀಯ ಸೇನೆಗೂ ಈ ಸಂಬಂಧ ಮಾಹಿತಿ ರವಾನಿಸಲಾಗಿದೆ.

ಇನ್ನು ಕಾಶ್ಮೀರದ ರತ್ನುಚಕ್ ಮಿಲಿಯರಿ ಕ್ಯಾಂಪ್ ಬಳಿ ನಿನ್ನೆ ರಾತ್ರಿ ಸುಮಾರು 2 ಗಂಟೆ ಹೊತ್ತಲ್ಲಿ ಅಪರಿತಕ ವ್ಯಕ್ತಿಗಳು ಸುಳಿದಾಡಿದ್ದರು. ಸುಮಾರು ನಾಲ್ಕು ಮಂದಿಯ ಪೈಕಿ ಇಬ್ಬರು ವ್ಯಕ್ತಿ ಗೇಟ್ ಬಳಿ ಬಂದು ಒಳನುಗ್ಗಲು ಯತ್ನಿಸಿದ್ದರು. ಆದರೆ ಸೈನಿಕರು ಗುಂಡಿನ ದಾಳಿ ಆರಂಭಿಸುತ್ತಿದ್ದಂತೆಯೇ ಎಲ್ಲರೂ ಅಲ್ಲಿಂದ ಪರಾರಿಯಾದರು. ಪ್ರಸ್ತುತ ಪರಾರಿಯಾದ ಅಪರಿಚಿತರಿಗಾಗಿ ಶೋಧ ನಡೆಸಲಾಗುತ್ತಿದೆ.