ಲಖನೌ: ಬಾಲಿವುಡ್'ನ ಪದ್ಮಾವತ್ ಚಿತ್ರದ ಖಿಲ್ಜಿಗೆ ತಮ್ಮನ್ನು ಹೋಲಿಕೆ ಮಾಡಿದ್ದ ನಟಿ ಜಯಪ್ರದಾ ಅವರಿಗೆ ಸಮಾಜವಾದಿ ಪಕ್ಷದ ಹಿರಿಯ ಮುಖಂಡ ಅಜಂಖಾನ್ ಅವರು ಭಾನುವಾರ ತಿರುಗೇಟು ನೀಡಿದ್ದಾರೆ. 

ಜಯಪ್ರದಾ ಅವರ ಹೇಳಿಕೆ ಕುರಿತು ಸಾರ್ವಜನಿಕ ಕಾರ್ಯಕ್ರಮವೊಂದರಲ್ಲಿ ಮಾತನಾಡಿರುವ ಅಜಂಖಾನ್, ಪದ್ಮಾವತ್ ಚಿತ್ರ ನಿರ್ಮಾಣಗೊಂಡಿದೆ. ಚಿತ್ರದಲ್ಲಿ ಖಿಲ್ಜಿ ಪಾತ್ರ ಅತ್ಯಂತ ಕೆಟ್ಟದಾಗಿದೆ ಎಂದು ಕೇಳಿದೆ. ಖಿಲ್ಜಿ ಬರುವುದಕ್ಕೂ ಮುನ್ನವೇ ಪದ್ಮಾವತಿಯವರು ಇಹಲೋಕ ತ್ಯಜಿಸಿದ್ದರು ಎಂಬುದನ್ನು ಕೇಳಿದ್ದೇನೆ. ಆದರೆ, ಕುಣಿಯುವ ಮಹಿಳೆಯೊಬ್ಬರು ಸೇವಕನ ಕುರಿತಂತೆ ಏನನ್ನೋ ಹೇಳಿದ್ದಾರೆ. ಈಗ ಹೇಳಿ ಇಂತಹ ಕುಣಿಯುವವರು ಮತ್ತು ಸಂಗೀತಗಾರರು ನನ್ನ ಮುಂದೆ ಬಂದಾಗ ನಾನು ಯಾವಾಗ ರಾಜಕೀಯ ಮಾಡಲಿ? ಎಂದು ಪ್ರಶ್ನಿಸಿದ್ದಾರೆ. 

ನಿನ್ನೆಯಷ್ಟೇ ಹೇಳಿಕೆ ನೀಡಿದ್ದ ಜಯಪ್ರದಾ ಅವರು, 2009ರಲ್ಲಿ ಉತ್ತರಪ್ರದೇದ ರಾಂಪುರ ವಿಧಾನಸಭಾ ಕ್ಷೇತ್ರದಿಂದ ಮರುಚುನಾವಣೆಗೆ ಸ್ಪರ್ಧಿಸಿದ್ದ ಸಂದರ್ಭದಲ್ಲಿ ಅಂಜಖಾನ್ ನನ್ನ ಹೆಸರನ್ನು ಹಾಳು ಮಾಡಲು ಇಲ್ಲ ಸಲ್ಲದ ಕುತಂತ್ರಗಳನ್ನು ನಡೆಸಿದ್ದರು, ಪದ್ಮಾವತ್ ಸಿನಿಮಾ ವೀಕ್ಷಣೆಯ ವೇಳೆ ಸಿನಿಮಾದಲ್ಲಿ ಖಿಲ್ಜಿ ಪಾತ್ರ, ಅಂದು ಚುನಾವಣೆಯ ವೇಳೆ ಅಜಂಖಾನ್ ನನಗೆ ಕಿರುಕುಳ ನೀಡಿದ್ದನ್ನು ನೆನಪಿಸಿತು ಎಂದು ಹೇಳಿದ್ದರು.