ನವದೆಹಲಿ: ಕೊರೋನಾ ವೈರಸ್ ಸೋಂಕಿಗೆ ಒಳಗಾಗಿರುವ ಬಾಲಿವುಡ್ ಗಾಯಕಿ ಕನಿಕಾ ಕಪೂರ್ ಅವರು ರೋಗಿಯಂತೆ ವರ್ತಿಸಬೇಕೇ ವಿನಃ ಸ್ಟಾರ್ ರೀತಿಯಲ್ಲ ಎಂದು ಲಖನೌ ಆಸ್ಪತ್ರೆ ತಿಳಿಸಿದೆ. 

ಲಖನೌನ ಸಂಜಯ್ ಗಾಂಧಿ ಆಸ್ಪತ್ರೆ ನಿರ್ದೇಶಕ ಡಾ.ಆರ್.ಕೆ.ಧೀಮನ್ ಮಾತನಾಡಿ, ಕನಿಕಾ ಅವರಿಗೆ ಆಸ್ಪತ್ರೆಯಿಂದ ಆಗುವ ಎಲ್ಲಾ ರೀತಿಯ ಉತ್ತಮ ವೈದ್ಯಕೀಯ ಚಿಕಿತ್ಸೆಗಳನ್ನು ನೀಡಲಾಗುತ್ತಿದೆ. ಇದೀಗ ಕನಿಕಾ ಅವರು ರೋಗಿಯಂತೆಯೇ ವಿನಃ ಸ್ಟಾರ್ ರೀತಿ ವರ್ತಿಸಬಾರದು ಎಂದು ಹೇಳಿದ್ದಾರೆ. 

ಕನಿಕಾ ಅವರಿಗೆ ಯಾವುದೇ ಆಹಾರ ಪಥ್ಯವನ್ನೂ ಹೇಳಿಲ್ಲ. ಇದೀಗ ಅವರು ನಮಗೆ ಸಹಕಾರ ನೀಡಬೇಕಿದ್ದು, ರೋಗಿಯಂತೆ ನಡೆದುಕೊಳ್ಳಬೇಕಿದೆ. ಪ್ರತ್ಯೇಕ ಕೊಠಡಿಯಲ್ಲಿ ಪ್ರತ್ಯೇಕ ಶೌಚಾಲಯ, ಬೆಡ್, ಟಿವಿ ವ್ಯವಸ್ಥೆಯನ್ನು ಕಲ್ಪಿಸಲಾಗಿದೆ ಎಂದು ತಿಳಿಸಿದ್ದಾರೆ. 

ಶುಕ್ರವಾರವಷ್ಟೇ ಕನಿಕಾ ಅವರಲ್ಲಿ ಕೊರೋನಾ ವೈರಸ್ ದೃಢಪಟ್ಟಿತ್ತು. ಲಂಡನ್'ಗೆ ತೆರಳಿದ್ದ ಕನಿಕಾ ಅವರು ಮಾರ್ಚ್ 15 ರಂದು ಭಾರತಕ್ಕೆ ಬಂದಿದ್ದರು. ಬಳಿಕ ಕಾರ್ಯಕ್ರಮವೊಂದಕ್ಕೆ ಭೇಟಿ ನೀಡಿದ ಬಳಿಕ ವೈರಸ್ ಪತ್ತೆಯಾಗಿದ್ದು, ಸಾಕಷ್ಟು ಸುದ್ದಿಗೆ ಗ್ರಾಸವಾಗಿತ್ತು.