ಡೆಹ್ರಾಡೂನ್: ಉತ್ತರಾಖಂಡ ರಾಜ್ಯದಲ್ಲಿ ನಡು ರಸ್ತೆಯಲ್ಲಿಯೇ ಎರಡು ಕರಡಿಗಳ ಭಯಾನಕ ಕಾಳಗದ ವಿಡಿಯೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಪಿಥೋರಗಢ ಜಿಲ್ಲೆಯ ಥಾಲ್-ದಿದಿಹಾತ್ ರಸ್ತೆ ಮಧ್ಯದಲ್ಲಿ ಎರಡು ಕರಡಿಗಳು ಬಿಗ್ ಫೈಟ್ ನಡೆದಿದೆ.
ಈ ಅಪರೂಪದ ಮತ್ತು ನಾಟಕೀಯ ಕ್ಷಣವನ್ನು ಸ್ಥಳೀಯರು ಮೊಬೈಲ್ ಫೋನ್ಗಳಲ್ಲಿ ಸೆರೆಹಿಡಿದಿದ್ದಾರೆ. ಈ ವಿಡಿಯೋ ಸಾಮಾಜಿಕ ಮಾಧ್ಯಮಗಳಲ್ಲಿ ವೈರಲ್ ಆಗುತ್ತಿದೆ.
ಎರಡು ಕರಡಿಗಳು ರಸ್ತೆಯ ಮಧ್ಯದಲ್ಲಿ ಒಂದು ನಿಮಿಷಕ್ಕೂ ಹೆಚ್ಚು ಕಾಲ ಪರಸ್ಪರ ಕುಸ್ತಿಯಾಡುತ್ತಿರುವುದು ವಿಡಿಯೋದಲ್ಲಿ ಕಂಡುಬಂದಿದೆ. ಸ್ವಲ್ಪ ಹೊತ್ತಿನ ಕಾದಾಟದ ನಂತರ ಒಂದು ಕರಡಿ ಅಂತಿಮವಾಗಿ ರಸ್ತೆಯಿಂದ ಕೆಳಗೆ ಇಳಿದು ಕಣ್ಮರೆಯಾಯಿತು. ಇನ್ನೊಂದು ರಸ್ತೆಯ ಪಕ್ಕದಲ್ಲಿ ನಿಂತಿತ್ತು.
ರಸ್ತೆ ಮಧ್ಯೆದಲ್ಲಿ ಈ ಕರಡಿಗಳ ಕಾಳಗ ರಾತ್ರಿ ವೇಳೆಯಲ್ಲಿ ಸಂಚರಿಸುವ ಬೈಕ್ ಮತ್ತಿತರ ವಾಹನಗಳ ಸವಾರರಲ್ಲಿ ಭೀತಿಯನ್ನು ಸೃಷ್ಟಿಸಿದೆ. ಘಟನೆಯ ನಂತರ ಮಾರ್ಗದಲ್ಲಿ ಹೆಚ್ಚಿನ ಕಣ್ಗಾವಲು ಮತ್ತು ಬಿಗಿ ಭದ್ರತಾ ಕ್ರಮ ಕೈಗೊಳ್ಳುವಂತೆ ಸ್ಥಳೀಯರು ಸರ್ಕಾರವನ್ನು ಒತ್ತಾಯಿಸಿದ್ದಾರೆ.
ಪ್ರಯಾಣಿಕರಿಗೆ ಯಾವುದೇ ಅಹಿತಕರ ಘಟನೆಯಾದಂತೆ ತಡೆಗಟ್ಟಲು ಈ ಪ್ರದೇಶದಲ್ಲಿ ಪ್ರಾಣಿಗಳ ಓಡಾಟದ ಮೇಲೆ ಹೆಚ್ಚಿನ ನಿಗಾ ವಹಿಸಬೇಕು ಎಂದು ಅವರು ಅರಣ್ಯ ಇಲಾಖೆಯನ್ನು ಒತ್ತಾಯಿಸಿದ್ದಾರೆ.