ತಿರುವನಂತಪುರಂ (ಕೇರಳಂ): ಕೇರಳಂ ಮುಖ್ಯಮಂತ್ರಿ ಹಾಗೂ ಕಾಂಗ್ರೆಸ್ ನಾಯಕ ವಿ.ಡಿ. ಸತೀಶನ್ ಅವರು ಹಿಂದೆ ವಿರೋಧ ಪಕ್ಷದ ನಾಯಕರಾಗಿದ್ದಾಗ ಬಳಸುತ್ತಿದ್ದ ಮೊಬೈಲ್ ಸಂಖ್ಯೆಯು ನಿಷ್ಕ್ರಿಯಗೊಂಡಿರುವುದನ್ನು ಗಮನಿಸಿದ ಒಬ್ಬ ವಂಚಕ, ಅದೇ ನಂಬರ್ ಅನ್ನು ತನಗೆ ನೀಡುವಂತೆ ಬಿಎಸ್​ಎನ್​ಎಲ್ ಕಚೇರಿಗೆ ಅರ್ಜಿ ಸಲ್ಲಿಸಿ ಮೂರು ತಿಂಗಳು ಕಾಯ್ದು ಪಡೆದುಕೊಂಡಿದ್ದಾನೆ. ಅಷ್ಟೇ ಅಲ್ಲದೆ, ಟ್ರೂಕಾಲರ್ ನಲ್ಲಿ ಸಿಎಂ ಹೆಸರೇ ತೋರಿಸುತ್ತಿದ್ದರಿಂದ ಅದೇ ಬಂಡವಾಳ ಬಳಸಿ ಹಿರಿಯ ಸರ್ಕಾರಿ ಅಧಿಕಾರಿಗಳಿಗೆ ವಂಚನೆ ಎಸಗಿ ಕೊನೆಗೆ ಪೊಲೀಸರ ಅತಿಥಿಯಾಗಿದ್ದಾನೆ. ಆ ಕುರಿತ ವರದಿ ಇಲ್ಲಿದೆ:

3 ತಿಂಗಳು ಕಾಯ್ದು ಪಡೆದ 'ಲಕ್ಕಿ ನಂಬರ್'!

ತಿರುವನಂತಪುರಂ ವೆಂಬಾಯಂ ನಿವಾಸಿ ಶಾಮ್‌ನಾದ್ ಬಂಧಿತ ಆರೋಪಿ. ಈತ ವಿ. ಡಿ. ಸತೀಶನ್ ಅವರು ಈ ಹಿಂದೆ ಬಳಸುತ್ತಿದ್ದ ಮತ್ತು ಪ್ರಸ್ತುತ ನಿಷ್ಕ್ರಿಯಗೊಂಡಿದ್ದ ಬಿಎಸ್‌ಎನ್‌ಎಲ್ ಮೊಬೈಲ್ ಸಂಖ್ಯೆಯನ್ನು ಗುರುತಿಸಿ, ತಕ್ಷಣವೇ ಆತ ವೆಂಜರಮೂಡು ಬಿಎಸ್ಎನ್ಎಲ್ ಕಚೇರಿಗೆ ತೆರಳಿ, ಆ ನಂಬರ್ ತನ್ನ "ಲಕ್ಕಿ ನಂಬರ್" ಆಗಿರುವುದರಿಂದ ತನಗೇ ನೀಡಬೇಕು ಎಂದು ಅರ್ಜಿ ಸಲ್ಲಿಸಿದ್ದನು. ಅದರಲ್ಲೂ, ಸರ್ಕಾರಿ ನಿಯಮಾವಳಿಗಳ ಪ್ರಕಾರ ನಿಷ್ಕ್ರಿಯಗೊಂಡ ನಂಬರ್ ಅನ್ನು ಮರುಹಂಚಿಕೆ ಮಾಡಲು ಪ್ರಕ್ರಿಯೆಗಳಿರುತ್ತವೆ. ಇದಕ್ಕಾಗಿ ಆತ ಸತತ ಮೂರು ತಿಂಗಳುಗಳ ಕಾಲ ಕಾಯ್ದು ಕೊನೆಗೂ ಆ ಸಿಮ್ ಕಾರ್ಡ್ ಅನ್ನು ತನ್ನ ಹೆಸರಿಗೆ ಪಡೆದುಕೊಳ್ಳುವಲ್ಲಿ ಯಶಸ್ವಿಯಾಗಿದ್ದನು.

ಘಟಾನುಘಟಿಗಳ ಜೊತೆ ಆಟ ಆಡಿದ್ದು ಹೇಗೆ?

ವಿ. ಡಿ. ಸತೀಶನ್ ಅವರು ಪ್ರಭಾವಿ ನಾಯಕರಾಗಿದ್ದರಿಂದ ಅವರ ಹಳೆಯ ನಂಬರ್ ರಾಜ್ಯದ ಪ್ರಮುಖ ಸಚಿವರು, ಶಾಸಕರು, ಉನ್ನತ ಐಎಎಸ್-ಐಪಿಎಸ್ ಅಧಿಕಾರಿಗಳು ಹಾಗೂ ಹಿರಿಯ ರಾಜಕಾರಣಿಗಳ ಫೋನ್‌ಗಳಲ್ಲಿ ಇನ್ನೂ 'ವಿ.ಡಿ. ಸತೀಶನ್' ಹೆಸರಲ್ಲೇ ಸೇವ್ ಆಗಿತ್ತು. ಇದರ ಪೂರ್ಣ ಲಾಭ ಪಡೆದ ಆರೋಪಿ, ಆ ಹಳೆಯ ನಂಬರ್ ಸಕ್ರಿಯಗೊಳ್ಳುತ್ತಿದ್ದಂತೆ ಅದಕ್ಕೆ ವಾಟ್ಸಾಪ್ ಖಾತೆ ತೆರೆದು ವಿ.ಡಿ. ಸತೀಶನ್ ಅವರ ಫೋಟೋವನ್ನೇ ಡಿಪಿಯಾಗಿ ಇಟ್ಟುಕೊಂಡಿದ್ದನು. ಜೊತೆಗೆ, ಆ ನಂಬರ್‌ನಿಂದ ರಾಜ್ಯದ ಹಲವು ಘಟಾನುಘಟಿ ನಾಯಕರು ಹಾಗೂ ಅಧಿಕಾರಿಗಳಿಗೆ ಸಂದೇಶ ಕಳುಹಿಸಿ, ತಾನೇ ವಿ.ಡಿ. ಸತೀಶನ್ ಎಂದು ನಂಬಿಸಿ ವರ್ಗಾವಣೆ, ರಾಜಕೀಯ ಶಿಫಾರಸು ಹಾಗೂ ಹಣಕಾಸಿನ ನೆರವಿನ ಆಮಿಷ ಒಡ್ಡಿ ವಂಚಿಸಲು ಆರಂಭಿಸಿದ್ದನು.

ಹಾಗಾದ್ರೆ, ಸಿಕ್ಕಿಬಿದ್ದಿದ್ದು ಹೇಗೆ?

ಮುಖ್ಯಮಂತ್ರಿಗಳೇ ನೇರವಾಗಿ ತನಗೆ ಕರೆ ಮಾಡಿ ಸೂಚನೆ ನೀಡುತ್ತಿರುವುದರ ಬಗ್ಗೆ ಒಬ್ಬ ಸಿಐ (ಇನ್ಸ್ಪೆಕ್ಟರ್) ಅವರಿಗೆ ತೀವ್ರ ಅನುಮಾನ ಮೂಡಿದೆ. ಅವರು ತಕ್ಷಣವೇ ಮುಖ್ಯಮಂತ್ರಿಗಳ ಕಚೇರಿಯನ್ನು ಸಂಪರ್ಕಿಸಿ ಪರಿಶೀಲಿಸಿದಾಗ, ವಿ.ಡಿ. ಸತೀಶನ್ ಅವರು ಆ ನಂಬರ್ ಅನ್ನು ಸದ್ಯ ಬಳಸುತ್ತಿಲ್ಲ ಹಾಗೂ ಸಿಎಂ ಕಚೇರಿಯಿಂದ ಅಂತಹ ಯಾವುದೇ ಕರೆ ಹೋಗಿಲ್ಲ ಎಂಬ ಆಘಾತಕಾರಿ ಸತ್ಯ ಹೊರಬಿದ್ದಿದೆ. ಇನ್ನು, ಮುಖ್ಯಮಂತ್ರಿ ಕಚೇರಿ ನೀಡಿದ ದೂರಿನ ಮೇರೆಗೆ ಕಾರ್ಯಾಚರಣೆ ನಡೆಸಿದ ಪೊಲೀಸರು ಆರೋಪಿಯನ್ನು ಕಡ್ಡಾಯವಾಗಿ ಬಂಧಿಸಿದ್ದಾರೆ. ಈ ನಂಬರ್ ಬಳಸಿ ಈತ ಯಾರ ಯಾರಿಂದ ಎಷ್ಟು ಹಣ ವಂಚಿಸಿದ್ದಾನೆ ಹಾಗೂ ಬೇರೆ ನಾಯಕರ ಹಳೇ ನಂಬರ್‌ಗಳನ್ನೂ ಈತ ಇದೇ ರೀತಿ ದುರುಪಯೋಗಪಡಿಸಿದ್ದಾನೆಯೇ ಎಂಬ ಬಗ್ಗೆ ಪೊಲೀಸರು ತನಿಖೆ ಮುಂದುವರಿಸಿದ್ದಾರೆ.

ಏತನ್ಮಧ್ಯೆ, ಬಂಧಿತ ಆರೋಪಿ ಶಾಮ್‌ನಾದ್, ಸಾಮಾನ್ಯ ವಂಚಕನಲ್ಲ, ಈತ ಈಗಾಗಲೇ ಮಂಗಳಪುರಂ ಪೊಲೀಸ್ ಠಾಣೆಯ ರೌಡಿ ಪಟ್ಟಿಯಲ್ಲಿದ್ದಾನೆ. ಈ ಹಿಂದೆ ತಾನು ಪತ್ತನಂತಿಟ್ಟ ಮ್ಯಾಜಿಸ್ಟ್ರೇಟ್, ಸ್ಪೆಷಲ್ ಬ್ರಾಂಚ್ ಡಿವೈಎಸ್‌ಪಿ ಮತ್ತು ವಿಲೇಜ್ ಆಫೀಸರ್ ಎಂದು ಸುಳ್ಳು ಹೇಳಿ ಅಧಿಕಾರಿಗಳಿಗೆ ಹಾಗೂ ಸಾರ್ವಜನಿಕರಿಗೆ ವಂಚಿಸಿದ ಕಳ್ಳನೋಟು ಚಲಾವಣೆ ಪ್ರಕರಣ ಸೇರಿದಂತೆ ಈತನ ಮೇಲೆ ಈಗಾಗಲೇ 9ಕ್ಕೂ ಹೆಚ್ಚು ಕ್ರಿಮಿನಲ್ ಪ್ರಕರಣಗಳು ದಾಖಲಾಗಿವೆ.