ನವದೆಹಲಿ: ಮಸ್ಕತ್ ನಲ್ಲಿ ನಡೆಯುತ್ತಿರುವ ಏಷ್ಯಾ ಕಪ್ ಪುರುಷರ ಹಾಕಿ ಪಂದ್ಯಾವಳಿಯಲ್ಲಿ ಭಾರತ-ಮಲೇಷಿಯಾ ನಡುವೆ ನಡೆದ ಪಂದ್ಯವು ಗೋಲುರಹಿತ ಡ್ರಾದಲ್ಲಿ ಅಂತ್ಯವಾಗಿದೆ.
ತನ್ನದೇ ತಪ್ಪಿನಿಂದ ಹಲವು ಬಾರಿ ಗೋಲು ಗಳಿಸುವ ಅವಕಾಶವನ್ನು ಭಾರತ ಕೈಚೆಲ್ಲುವ ಮೂಲಕ ಗೆಲುವಿನ ಅವಕಾಶವನ್ನು ಕಳೆದುಕೊಂಡಿದೆ. ಆದರೆ ಇದಾಗಲೇ ಸರಣಿಯಲ್ಲಿ ಪ್ರಾರಂಭದಿಂದ ವಿಜಯೀ ತಂಡವಾಗಿ ಮುಂದುವರಿದಿರುವ ಭಾರತ ಈ ಡ್ರಾ ಹೊರತಾಗಿಯೂ ಅಗ್ರಸ್ಥಾನದಲ್ಲಿದ್ದು ಸೆಮಿ ಫೈನಲ್ಸ್ ಪ್ರವೇಶ ಖಚಿತಪಡಿಸಿಕೊಂಡಿದೆ.
ಅತ್ತ ಮಲೇಷಿಯಾ ಸಹ ಇದುವರೆಗೆ ನಡೆದಿರುವ ಎಲ್ಲಾ ಮೂರು ಪಂದ್ಯಗಳಲ್ಲಿ ಜಯ ಸಾಧಿಸಿರುವ ಕಾರಣ ಈ ಪಂದ್ಯದಲ್ಲಿ ಗೋಲು ಗಳಿಸದೆ ಡ್ರಾ ಸಾಧಿಸಿದ್ದರೂ ಆ ತಂಡ ಸಹ ಸೆಮೀಸ್ ಪ್ರವೇಸಿಸಲು ಯಶಸ್ವಿಯಾಗಿದೆ.
ಈ ಹಿಂದೆ ಏಷ್ಯನ್ ಗೇಮ್ಸ್ ಸೆಮಿ ಫೈನಲ್ಸ್ ನಲ್ಲಿ ಭಾರತ ಮಲೇಷಿಯಾ ವಿರುದ್ಧ ಸೋಲು ಅನುಭವಿಸಿತ್ತು. ಆ ಸೋಲಿಗೆ ಸೇಡು ತೀರಿಸಿಕೊಳ್ಳುವ ತವಕದಲ್ಲಿದ್ದ ಭಾರತ ಹಾಕಿ ತಂಡಕ್ಕೆ ಇಲ್ಲಿ ಸಹ ಡ್ರಾ ಸಾಧಿಸಲಷ್ಟೇ ಸಾದ್ಯವಾಗಿದ್ದು ಗೆಲುವು ಮರಿಚೀಕೆಯಾಗಿಯೇ ಉಳಿದಿದೆ.
ಇನ್ನು ಸರಣಿಯಲ್ಲಿ ಭಾರತ ತಂಡ ತನ್ನ ಅಂತಿಮ ಲೀಗ್ ಪಂದ್ಯದಲ್ಲಿ ದಕ್ಷಿಣ ಕೊರಿಯಾವನ್ನು ಎದುರಿಸಲಿದೆ. ಹಾಗೆಯೇ ಮಲೇಷಿಯಾ ಪಾಕಿಸ್ತಾನದೊಡನೆ ಸೆಣೆಸಲು ಸಜ್ಜಾಗಿದೆ.