ಇತ್ತೀಚಿನ ವರ್ಷಗಳಲ್ಲಿ ಪ್ರವಾಸದ ಸ್ವರೂಪದಲ್ಲಿ ದೊಡ್ಡ ಬದಲಾವಣೆ ಕಂಡುಬಂದಿದೆ. ಈ ಹಿಂದೆ ಜನರು ದೂರದ ಪ್ರವಾಸಕ್ಕೆ ವಿಮಾನ ಅಥವಾ ರೈಲು ಪ್ರಯಾಣವನ್ನು ಹೆಚ್ಚು ಆಯ್ಕೆಮಾಡುತ್ತಿದ್ದರು. ಆದರೆ, ಈಗ ಪ್ರವಾಸಿ ತಾಣಗಳು, ಪಾರಂಪರಿಕ ಸ್ಥಳಗಳು ಮತ್ತು ನೈಸರ್ಗಿಕ ಸುಂದರ ಪ್ರದೇಶಗಳು ಜನಪ್ರಿಯವಾಗುತ್ತಿರುವುದರಿಂದ ರಸ್ತೆ ಪ್ರಯಾಣದ ಆಕರ್ಷಣೆ ಹೆಚ್ಚುತ್ತಿದೆ.

ಸಾರ್ವಜನಿಕ ಸಾರಿಗೆ ತಲುಪದ ಅನೇಕ ಸ್ಥಳಗಳಿಗೆ ಹೋಗಲು ರಸ್ತೆ ಪ್ರಯಾಣವೇ ಉತ್ತಮ ಆಯ್ಕೆಯಾಗಿದೆ. ಈ ಪ್ರಯಾಣವು ನಮಗೆ ಪ್ರವಾಸಿ ತಾಣಗಳಲ್ಲಿ ಸಾಕಷ್ಟು ಸಮಯ ಕಳೆಯಲು, ಸಾಹಸ ಮತ್ತು ಪ್ರಕೃತಿಯ ಸಮೀಪವೇ ಇರುವ ಅನುಭವವನ್ನು ನೀಡುತ್ತದೆ. ಹೀಗಾಗಿ ಜನರು ಇದೀಗ ದ್ವಿಚಕ್ರ ವಾಹನ ಹಾಗೂ ಕಾರುಗಳಲ್ಲಿ ಲಾಂಗ್ ಡ್ರೈವ್ ಹೋಗಲು ಇಷ್ಟಪಡುತ್ತಿದ್ದಾರೆ.

ಈ ಲಾಂಗ್ ಡ್ರೈವ್ ಅಥವಾ ದೀರ್ಘಾವಧಿ ರಸ್ತೆ ಪ್ರಯಾಣವು ಕೇವಲ ಒಂದು ಪ್ರಯಾಣವಲ್ಲ, ಅದೊಂದು ಅದ್ಭುತ ಅನುಭವ. ಆದರೆ, ಈ ಅನುಭವವು ಸುಗಮವಾಗಿರಲು ವ್ಯವಸ್ಥಿತ ತಯಾರಿ ಅತ್ಯಗತ್ಯ.

ಲಾಂಗ್ ಡ್ರೈವ್ ಹೆಸರೇ ಹೇಳುವಂತ ಇದಕ್ಕೆ ಸಾಕಷ್ಟು ಸಮಯ ಬೇಕಾಗುತ್ತದೆ. ವಿಮಾನ ಅಥವಾ ರೈಲಿನಲ್ಲಿ ಬೇಗನೇ ತಲುಪುವ ದೂರವನ್ನು ಕಾರಿನ ಮೂಲಕ ತಲುಪಬೇಕೆಂದರೆ ಹೆಚ್ಚು ಸಮಯ ಬೇಕಾಗುತ್ತದೆ. ಈ ಕುರಿತು ಕೆಲವು ಟಿಪ್ಸ್ ಗಳು ಇಲ್ಲಿವೆ...

ಲಾಂಗ್ ಡ್ರೈವ್ ವಿಮಾನ ಅಥವಾ ರೈಲು ಪ್ರಯಾಣಕ್ಕಿಂತ ಹೆಚ್ಚು ಸಮಯ ತೆಗೆದುಕೊಳ್ಳುತ್ತದೆ. ಆದ್ದರಿಂದ ಪ್ರಯಾಣದ ದಿನಾಂಕ, ಮಾರ್ಗ, ತಂಗುವ ಸ್ಥಳಗಳು ಮತ್ತು ದೈನಂದಿನ ಪ್ರಯಾಣದ ದೂರವನ್ನು ಮುಂಚಿತವಾಗಿ ಯೋಜಿಸುವುದು ಅತ್ಯಂತ ಮುಖ್ಯ.

ವಾರಾಂತ್ಯ ಅಥವಾ 7–10 ದಿನಗಳ ರಜೆ ಯೋಜನೆ ಮಾಡಿಕೊಳ್ಳುವುದು ಉತ್ತಮ. ನಕ್ಷೆ ಅಥವಾ ನಾವಿಗೇಶನ್ ಆ್ಯಪ್ ಬಳಸಿ ಮಾರ್ಗದಲ್ಲಿ ಇರುವ ಪ್ರಮುಖ ಪ್ರವಾಸಿ ತಾಣಗಳು, ಹೋಟೆಲ್-ರೆಸ್ಟೋರೆಂಟ್ ಮತ್ತು ಪೆಟ್ರೋಲ್ ಬಂಕ್ ಗಳನ್ನು ಗುರುತಿಸಿ.

ಈ ಪ್ರವಾಸದ ವೇಳೆ ಪೆಟ್ರೋಲ್, ವಸತಿ ಮತ್ತು ಆಹಾರಕ್ಕೆ ಹೆಚ್ಚಿನ ಹಣ ವ್ಯಯಿಸಬೇಕಾಗುತ್ತದೆ. ತಂಡವಾಗಿ ಪ್ರಯಾಣಿಸಿದರೆ ವೆಚ್ಚವನ್ನು ಹಂಚಿಕೊಳ್ಳಬಹುದು. ಅನಿರೀಕ್ಷಿತ ಖರ್ಚುಗಳಿಗೆ ಹೆಚ್ಚುವರಿ ಹಣವನ್ನು ಇಟ್ಟುಕೊಳ್ಳುವುದು ಉತ್ತಮ.

ಪ್ರವಾಸಕ್ಕೆ ಹೊರಡುವ ಮೊದಲು ವಾಹನವನ್ನು ಸಂಪೂರ್ಣವಾಗಿ ಸರ್ವಿಸ್ ಮಾಡಿಸಿ. ಟೈರ್‌ಗಳ ಸ್ಥಿತಿ, ಬ್ರೇಕ್, ಬ್ಯಾಟರಿ, ಎಂಜಿನ್ ಆಯಿಲ್, ಲೈಟ್ಸ್ ಪರಿಶೀಲನೆ ಅತ್ಯಗತ್ಯ.

ವಾಹನ ದಾಖಲೆಗಳು, ಚಾಲನಾ ಪರವಾನಗಿ, ವಿಮೆ (ಇನ್ಸೂರೆನ್ಸ್) ಮತ್ತು ಗುರುತಿನ ಚೀಟಿಗಳನ್ನ ಕಡ್ಡಾಯವಾಗಿ ಇರಿಸಿಕೊಳ್ಳಿ. ರಾಜ್ಯ ಅಥವಾ ಅಂತಾರಾಷ್ಟ್ರೀಯ ಗಡಿ ದಾಟುವಾಗ ಈ ದಾಖಲೆಗಳು ಅತ್ಯಗತ್ಯವಾಗುತ್ತದೆ.

ದೂರ ಪ್ರಯಾಣ ಎಂದಾಗಷ್ಟು ಸಾಕಷ್ಟು ಮಂದಿ ಹೆಚ್ಚೆಚ್ಚು ಲಗೇಜ್ ಗಳನ್ನು ಹೊತ್ತೊಯ್ಯುತ್ತಾರೆ. ಆದರೆ, ಆರಾಮದಾಯಕವಾಗಿ ಪ್ರವಾಸ ಮಾಡಲು ಅಡ್ಡಿಯುಂಟು ಮಾಡುವ ಸಾಧ್ಯತೆಗಳಿರುತ್ತವೆ. ಲಗೇಜ್ ಹೆಚ್ಚಾಗಿದ್ದರೆ ಪ್ರಯಾಣದಲ್ಲಿ ಏನನ್ನೂ ಖರೀದಿಸಲು ಸಾಧ್ಯವಾಗುವುದಿಲ್ಲ. ಅಲ್ಲದೆ, ಕಾರಿನಲ್ಲಿ ಗಾಳಿ ಆಡಲು ಕಷ್ಟವಾಗಬಹುದು.

ರಸ್ತೆ ಪ್ರಯಾಣದಲ್ಲಿ ಆರೋಗ್ಯದ ಸುರಕ್ಷತೆ ಬಹಳ ಮುಖ್ಯ. ಪ್ರಥಮ ಚಿಕಿತ್ಸೆ ಕಿಟ್, ಅಗತ್ಯ ಔಷಧಿಗಳು ಮತ್ತು ತುರ್ತು ಸಂಪರ್ಕ ಸಂಖ್ಯೆಗಳು ಇಟ್ಟುಕೊಂಡಿ.

ದೂರದ ಪ್ರದೇಶಗಳಲ್ಲಿ ವಸತಿ ಸಮಸ್ಯೆಯಾಗಬಹುದು. ಆದ್ದರಿಂದ ಆನ್‌ಲೈನ್ ನಲ್ಲಿ ಹುಡುಕಿ, ಮಾಹಿತಿಗಳ ಆಧಾರದ ಮೇಲೆ ಮುಂಚಿತವಾಗಿ ಹೋಟೆಲ್ ಅಥವಾ ಹೋಮ್‌ಸ್ಟೇ ಬುಕ್ ಮಾಡಿಕೊಳ್ಳುವುದು ಉತ್ತಮ. ಇದು ಮಧ್ಯರಾತ್ರಿ ತಂಗುದಾಣ ಹುಡುಕುವ ತೊಂದರೆಯನ್ನು ತಪ್ಪಿಸುತ್ತದೆ.

ಲಾಂಗ್ ಡ್ರೈವ್ ವೇಳೆ ಸಂಗೀತ ಮಹತ್ವದ ಪಾತ್ರ ವಹಿಸುತ್ತದೆ. ವಿಭಿನ್ನ ಹಾಡುಗಳ ಪ್ಲೇಲಿಸ್ಟ್ ಪ್ರಯಾಣವನ್ನು ಆನಂದಕರವಾಗಿಸುತ್ತದೆ.

ಪ್ರಯಾಣಕ್ಕೂ ಮುನ್ನ ರಾತ್ರಿ ಉತ್ತಮ ನಿದ್ರೆ ಅಗತ್ಯ. ದಣಿವಿನಿಂದ ಚಾಲನೆ ಮಾಡುವುದು ಅಪಾಯಕಾರಿ. ಪ್ರಯಾಣ ಆರಂಭಿಸುವುದಕ್ಕೂ ಮುನ್ನ ನಾವಿಗೇಶನ್ ಆ್ಯಪ್ ಅಥವಾ GPS ಮುಂಚಿತವಾಗಿ ಸೆಟ್ ಮಾಡಿಕೊಳ್ಳುವುದು ಮುಖ್ಯ. ಇದರಿಂದ ದಾರಿತಪ್ಪುವಿಕೆ ತಪ್ಪುತ್ತದೆ.

ದೀರ್ಘ ಕಾಲ ಚಾಲನೆ ಮಾಡಿದರೆ ದಣಿವು ಮತ್ತು ನಿದ್ರೆಯ ಅನುಭವವಾಗಬಹುದು. ಹೀಗಾಗಿ ಆಗಾಗ್ಗೆ ಬ್ರೇಕ್ ತೆಗೆದುಕೊಂಡು ಕಾಲು ಮತ್ತು ಕೈಗಳಿಗೆ ವ್ಯಾಯಾಮ ಮಾಡಿ. ನೀರು ಮತ್ತು ಕಾಫಿ ಕುಡಿಯುವುದರಿಂದ ದೇಹದ ಶಕ್ತಿ ಹೆಚ್ಚಾಗುತ್ತದೆ.

ರಸ್ತೆ ಪ್ರಯಾಣದ ವಿಶೇಷತೆ ಎಂದರೆ ಮಾರ್ಗದಲ್ಲೇ ಹೊಸ ಸ್ಥಳಗಳನ್ನು ಅನ್ವೇಷಿಸುವ ಅವಕಾಶವನ್ನು ಇದು ನೀಡುತ್ತದೆ. ಆದರೆ, ಕತ್ತಲಾಗುವ ಮುನ್ನ ಮೂಲ ಮಾರ್ಗಕ್ಕೆ ಮರಳುವುದು ಸುರಕ್ಷಿತ.

ಲಾಂಗ್ ಡ್ರೈವ್ ಸಾಕಷ್ಟು ಸುಂದರ ಅನುಭವಗಳನ್ನು ನೀಡುತ್ತದೆ. ಈ ಅನುಭವಗಳನ್ನು ಫೋಟೋ, ವೀಡಿಯೋ ರೆಕಾರ್ಡ್ ಮಾಡಿಕೊಳ್ಳಿ. ಚಾನೆಲ್ ಇದ್ದರೆ ವ್ಲಾಗ್ ಮಾಡಿಕೊಳ್ಳಿ. ಪುಸ್ತಕವೊಂದರಲ್ಲಿ ಅನುಭವಗಳನ್ನು ಬರೆಯಿರಿ. ಇವು ಮುಂದಿನ ದಿನಗಳಲ್ಲಿ ಅಮೂಲ್ಯ ನೆನಪುಗಳಾಗುತ್ತವೆ.