ಮಾನಿನಿ ಹೆಚ್ಚು ಹೊತ್ತು ಕಳೆಯುವುದು ಅಡುಗೆಮನೆಯಲ್ಲಿ. ಇಂಥ ಸಂದರ್ಭದಲ್ಲಿ ಕೆಲವು ಅವಘಡಗಳೂ ಸಂಭವಿಸಬಹುದು. ಆದರೆ, ದೊಡ್ಡ ಪ್ರಮಾಣದಲ್ಲಿ ಅಲ್ಲದಿದ್ದರೂ, ಸಣ್ಣ ಪ್ರಮಾಣದಲ್ಲಾದರೂ ಸಂಭವಿಸುತ್ತವೆ. ಹೀಗಾಗಿ ಎಚ್ಚರಿಕೆಯಿಂದಲೇ ಇರಬೇಕು.

• ಯಾವುದೇ ಪಾತ್ರೆಯ ಹಿಡಿಕೆಯು ಪ್ಲಾಸ್ಟಿಕ್ ಅಥವಾ ಕುಕ್ಕರಿನ ಹಿಡಿಯಂತಿದ್ದರೆ ದೊಡ್ಡ ಉರಿಯಲ್ಲಿ ಕಾಯಿಸುವ ಬದಲು ಸ್ವಲ್ಪ ಕಡಿಮೆ ಬೆಂಕಿಯಲ್ಲಿ ಇಡಿ. ಯಾಕೆಂದರೆ ಪ್ರಾರಂಭದ ದೊಡ್ಡ ಬೆಂಕಿಯಲ್ಲಿ ಬೇಗ ಹಾಳಾಗಿ ಹೋಗುತ್ತದೆ.
• ಪಾತ್ರೆಯ ಹಿಡಿ ಪಾತ್ರೆಗಿಂತ ಭಾರವಿದ್ದರೆ ಗ್ಯಾಸ್ ಮೇಲಿಟ್ಟಾಗ ತಕ್ಷಣ ಬಿದ್ದು ಒಳಗಿದ್ದ ಪದಾರ್ಥ ಚೆಲ್ಲಿ ಹೋಗುತ್ತದೆ. ಹಿಡಿಯ ಭಾಗ ಪಾತ್ರೆಗಿಂತ ಕಡಿಮೆ ಭಾರದ್ದಾಗಿರಲಿ.
• ಆದಷ್ಟು  ಹಲ್ವಾ, ಕಡುಬು ಮಾಡುವಾಗ ಮರದ ಹಿಡಿಯ ಸೌಟನ್ನು ಬಳಸಿ. ಇದರಿಂದ ಕೈಗೆ ಹಿತ.
• ಪಾತ್ರೆಗೆ ಹಿಡಿ ಇದ್ದ ಪ್ಲೇಟನ್ನು ಮುಚ್ಚಿದರೆ ಬಿಸಿಯಿರುವಾಗ ತೆಗೆಯಲು ಸುಲಭ. ಸ್ಟೀಲ್ ಹಿಡಿಯಾಗಿದ್ದರೆ ಚಿಕ್ಕ ಕರವಸ್ತ್ರವನ್ನು ಸಣ್ಣದಾಗಿ ಮಡಿಚಿ, ಹಿಡಿಯ ಮೇಲಿಟ್ಟರೆ ಮುಚ್ಚಳ ತೆಗೆಯಲು ಸುಲಭ.
• ಕೈಗೆ ಬೆಂಕಿ ತಗುಲಿದರೆ, ಹಚ್ಚಲು ಜೇನು ತುಪ್ಪ, ಬರ್ನೊಲ್ ಇದ್ದರೆ ಒಳ್ಳೆಯದು. ಚಾಕು ತಗುಲಿ ರಕ್ತ ಬಂದರೆ ಒರೆಸಲು ಕಾಟನ್, ಬ್ಯಾಂಡೇಜ್ ಇರಬೇಕು.
• ಪದಾರ್ಥಗಳನ್ನು ಕುಟ್ಟಿ ಪುಡಿಮಾಡಲು ಗಟ್ಟಿಯಾದ ಕಲ್ಲು ಇರಲಿ. ಹರಿತ ಚಾಕು, ಕತ್ತರಿ, ಎಲ್ಲಾ ಅದರ ಅದರ ಜಾಗದಲ್ಲಿ ಕೈಗೆಟಕುವಂತೆ ಇರಲಿ.
• ಚಪಾತಿ ಮಾಡಿದ ಲಟ್ಟಣಿಗೆಯನ್ನು ಕೂಡಲೇ ಶುಚಿಗೊಳಿಸಿಡಿ. ಅದರ ಮೇಲೆ ಜಿರಳೆ ಹರಿಯುವ ಸಾಧ್ಯತೆ ಇರುತ್ತದೆ.
• ಮಿಕ್ಸಿ, ಗ್ರೈಂಡರ್, ಓವನ್, ಫ್ರಿಡ್ಜ್, ಟೋಸ್ಟರ್, ಮಥನ, ಬೀಟರ್ ಈ ಥರದ ಉಪಕರಣಗಳನ್ನು ಆದಷ್ಟು ಅಡುಗೆ ಕೋಣೆಯಲ್ಲಿದ್ದರೆ ಕೆಲಸ ಸುಲಭ. ಎಲೆಕ್ಟ್ರಾನಿಕ್ ವಸ್ತುವಿಗೂ ಪ್ರತ್ಯೇಕ ಪ್ಲಗ್ ಪಾಯಿಂಟ್ ಇರಲಿ.
• ಹಳೇ ಪೇಪರ್, ಹಳೇ ಬಟ್ಟೆಗಳು, ಕೈಗೆಟಕುವ ಹಾಗೆ ಇಟ್ಟಿದ್ದರೆ ಸುಲಭ (ಹುಡುಕುವಂತೆ ಇರಬಾರದು).
• ಕಸದ ಬುಟ್ಟಿಯಲ್ಲಿ ನೀರಿನ ಅಂಶವಿದ್ದ ಪದಾರ್ಥಗಳನ್ನು ಹಾಕದಿರುವುದು ವಾಸಿ. ಶುಭ್ರಗೊಳಿಸುವುದೂ ಸುಲಭವಾಗುತ್ತದೆ. ಹಸಿ ವಸ್ತುಗಳನ್ನು ಆದಷ್ಟು ಗಿಡದ ಬುಡಕ್ಕೆ ಹಾಕಿ ಅಥವಾ ಬಯೋಗ್ಯಾಸ್‌ಗೂ ಬಳಸಬಹುದು. 3 ಕೆ.ಜಿ. ಹಸಿ ತ್ಯಾಜ್ಯವನ್ನು ಹಾಕುವ ಡ್ರಮ್ ಖರೀದಿಸಿದರೆ 3 ಗಂಟೆಗೆ ಸಾಲುವಷ್ಟು ಗ್ಯಾಸ್ ಸರಬರಾಜಾಗುತ್ತದೆ.
• ಕಾಯಿ ತುರಿಯುವ ಮಣೆ, ತರಕಾರಿ ಮಣೆಯಲ್ಲೇ ಕೂತು ತರಕಾರಿ (ಕತ್ತಿ ಹೊಂದಿದ) ಹೆಚ್ಚುವ ಮಣೆ, ನಾನ್‌ಸ್ಟಿಕ್ ತೂಗು ಹಾಕಲು ವ್ಯವಸ್ಥೆ, ತುರಿಯುವ ಸಾಧನ ಹೀಗೆ ನಮ್ಮ ಅಡುಗೆಮನೆಯಲ್ಲಿ ಬಳಸುವ ಎಲ್ಲಾ ಸಾಮಾನುಗಳು ಅಡುಗೆಮನೆಯಲ್ಲೇ ಇಡುವಂತಿದ್ದರೆ ಸಮಯದ ಸದುಪಯೋಗವಾಗುತ್ತದೆ.
• ಅಡುಗೆಮನೆಯಲ್ಲಿ ದೊಡ್ಡ ಸಾಮಾನುಗಳನ್ನು ಇಡಬೇಡಿ. ಪಕ್ಕದ ಸ್ಟೋರ್ ರೂಮ್‌ಗೆ ವರ್ಗಾಯಿಸಿ. ಕಿಚನ್‌ನೋಡಲೂ ಅಂದವಾಗಿ ಕಾಣುತ್ತದೆ.