ಮನೆ ನಿರ್ಮಾಣ ಹಾಗೂ ಅದರ ಆಂತರಿಕ ವಿನ್ಯಾಸ ಈಗ ಜನಪ್ರಿಯ. ಬದಲಾಗುತ್ತಿರುವ ಅಭಿರುಚಿ, ವಿಜ್ಞಾನ ಹಾಗೂ ಜೋತಿಷ್ಯ ಶಾಸ್ತ್ರದ ಆಧಾರದಲ್ಲಿಯೇ ಮನೆ ನಿರ್ಮಿಸುತ್ತಿದ್ದರೂ, ಕೆಲವು ಸಂಗತಿಗಳನ್ನು ನಾವು ಗಮನಿಸಲೇಬೇಕು. ಹಾಗಾದರಷ್ಟೇ ಮನೆಯ ಸೌಂದರ್ಯಕ್ಕೆ ಮತ್ತಷ್ಟು ಜೀವ ತುಂಬಲು ಸಾಧ್ಯ.

• ಮುಖ್ಯವಾಗಿ ನಾವೆಲ್ಲ ಲಿವಿಂಗ್ ರೂಂ ಎಂದು ಹೇಳುವ, ಅತಿಥಿಗಳು ಬಂದಾಕ್ಷಣ ಸ್ವಾಗತಿಸುವ ಕೋಣೆ ಹಲವು ವಿಶೇಷತೆ ಹೊಂದಿರಬೇಕು. ಗೋಡೆಯ ಬಣ್ಣವನ್ನಾಧರಿಸಿ, ಅಲ್ಲಿ ವಿವಿಧ ಕಲಾಕೃತಿಗಳನ್ನು ಅಳವಡಿಸಬೇಕು.
• ಗೋಡೆಗೆ ಹೆಚ್ಚಾಗಿ ಹಸಿರು ಬಣ್ಣ ಹೊಂದಿರುವ (ಪ್ರಾಕೃತಿಕ) ಚಿತ್ರಗಳನ್ನು ಅಳವಡಿಸುವುದು ಸೂಕ್ತ. ಹಸಿರು ಎಲ್ಲರ ಮನಸ್ಸಿಗೆ ಒಪ್ಪುವ ಬಣ್ಣ.
• ಪೇಂಟಿಂಗ್‌ಗಳು ಕೋಣೆಯ ಮೆರಗನ್ನು ಹೆಚ್ಚಿಸಲು ಸಹಕಾರಿ. ಆದರೆ, ಅವುಗಳ ಆಯ್ಕೆ ವೇಳೆಯಲ್ಲಿ ವೈವಿಧ್ಯತೆಯ ಚಿತ್ರಗಳಿಗೆ ಆದ್ಯತೆ ನೀಡಿ.
• ಮನೆಯಲ್ಲಿನ ಹಳೇ ಕಾಲದ ಪೋಟೋಗಳಿಗೆ (ಬ್ಲ್ಯಾಕ್ ಮತ್ತು ವೈಟ್ ಚಿತ್ರಗಳಿಗೆ) ಮೆರಗು ನೀಡುವ ಫ್ರೇಮ್‌ಗಳನ್ನು ಅಳವಡಿಸಿ ಗೋಡೆಗೆ ನೇತಾಕಿ. ಇದು ನಮ್ಮ ಅಭಿರುಚಿ ಮತ್ತು ಕುಟುಂಬದ ಹಿನ್ನೆಲೆಯನ್ನು ಕ್ಷಣಾರ್ಧದಲ್ಲಿಯೇ ಅತಿಥಿಗಳಿಗೆ ತಿಳಿಸಲು ಸಾಧ್ಯವಾಗುತ್ತದೆ.
• ಗೋಡೆಯ ಬಣ್ಣಕ್ಕೆ ವಿರುದ್ಧವಾದ ವರ್ಣ ಕಲಾಕೃತಿಗಳನ್ನೇ ಆಯ್ಕೆ ಮಾಡಿ.
• ನೀವಿದ್ದ ಪ್ರದೇಶದಲ್ಲಿ ಪೇಂಟಿಂಗ್ ಉತ್ಸವಗಳು ನಡೆಯುತ್ತಿದ್ದರೆ ಅಲ್ಲಿಗೆ ಭೇಟಿ ನೀಡಿ. ಉತ್ತಮವಾದುದನ್ನು ಖರೀದಿಸಿ.
• ಸಸ್ಯಗಳು, ಹೂವಿನ ಚಿತ್ರಗಳು, ಪರಿಸರಕ್ಕೆ ಸಂಬಂಧಿಸಿದ ಚಿತ್ರಗಳಿಗೆ ಪ್ರಾಧಾನ್ಯತೆ ನೀಡಿ. ವನ್ಯಮೃಗಗಳ ಚಿತ್ರಗಳೂ ಗೋಡೆಗೆ ಸೂಕ್ತ ಎನ್ನುವ ಭಾವನೆ ನಿಮ್ಮದಾಗಿದ್ದಲ್ಲಿ ಅವುಗಳನ್ನು ಖರೀದಿಸಿರಿ. ಆದರೆ, ವನ್ಯಜೀವಿಗಳ ಚಿತ್ರಗಳು ಮನೆಯ ವಾತಾವರಣಕ್ಕೆ ಹೊಂದಿಕೆಯಾಗದೆ ಇರುವುದರಿಂದ ಅವುಗಳಲ್ಲಿಯೇ ಸಾಫ್ಟ್ ಭಾವ ಹುಟ್ಟಿಸುವ ಚಿತ್ರಗಳನ್ನು ಖರೀದಿಸಿರಿ.
• ಮಕ್ಕಳ ಕೋಣೆಗಳಿಗೆ ಸಾಧ್ಯವಾದಷ್ಟು ಮನ ಅರಳಿಸುವ ಬಣ್ಣಗಳನ್ನೇ ಆಯ್ದುಕೊಳ್ಳಿ.
• ಸಾಧ್ಯವಾದಷ್ಟು ಚೂಪಾದ, ನುಣುಪಾದ ವಸ್ತುಗಳನ್ನು ಅವರ ರೂಂನಲ್ಲಿ ಅಳವಡಿಸಬೇಡಿ. ಮಕ್ಕಳ ರೂಂನಲ್ಲಿ ದೇಶಭಕ್ತಿ, ಶೌರ್ಯ, ಮಮತೆ, ದೈವಭಕ್ತಿ ಮೂಡಿಸುವ ಚಿತ್ರಗಳನ್ನು ಅಳವಡಿಸುವುದರಿಂದ ಅವರ ಚೈತನ್ಯಕ್ಕೆ ಸಹಕಾರಿಯಾಗುತ್ತದೆ.
• ಮಕ್ಕಳ ರೂಂನಲ್ಲಿ ಸಾಧ್ಯವಾದಷ್ಟು ಕಡಿಮೆ ಫರ್ನಿಚರ್ ಅಳವಡಿಸುವುದು ಸೂಕ್ತ. ಇದರಿಂದ ಮಗುವಿಗೆ ಹೆಚ್ಚು ಆಟವಾಡಲು ಸಹಕಾರಿ.