ಬಾಗ್ದಾದ್: 2014ರಲ್ಲಿ ಇಸಿಸ್ ನಡೆಸಿದ ಹತ್ಯಾಕಾಂಡ ಸಂಬಂಧ ಬಂಧಿತರಾಗಿದ್ದ 36 ಮಂದಿ ಉಗ್ರರನ್ನು ಇರಾಕ್ ಸರ್ಕಾರ ಭಾನುವಾರ ಗಲ್ಲಿಗೇರಿಸಿದೆ.

2014ರಲ್ಲಿ ಇಸಿಸ್ ಉಗ್ರಗಾಮಿ ಸಂಘಟನೆ ಇರಾಕ್ ಸೇನೆಯ ವಶದಲ್ಲಿದ್ದ ಟಿಕ್ರಿತ್ ನಗರವನ್ನು ತನ್ನ ವಶಕ್ಕೆ ಪಡೆಯುವ ವೇಳೆ ವ್ಯಾಪಕ ಹಿಂಸಾಚಾರ ನಡೆಸಿತ್ತು. ಈ ವೇಳೆ ತನ್ನ ಕೈಗೆ ಸಿಕ್ಕ  ಇರಾಕ್ ನ ನೂರಾರು ಸೈನಿಕರನ್ನು ಅಮಾನುಷವಾಗಿ ಹತ್ಯೆಗೈದಿತ್ತು. ಸರ್ಕಾರಿ ಮೂಲಗಳ ಪ್ರಕಾರ ಹೀಗೆ ಇಸ್ಲಾಮಿಕ್ ಸ್ಟೇಟ್ ಉಗ್ರರ ಕೈಗೆ ಸಿಕ್ಕಿ ಸುಮಾರು 1700ಕ್ಕೂ ಅಧಿಕ ಇರಾಕ್ ಸೈನಿಕರು  ಧಾರುಣವಾಗಿ ಹತರಾಗಿದ್ದರು.

ಸೈನಿಕರನ್ನು ಸಾಲಾಗಿ ಮಲಗಿಸಿ ಅವರ ಮೇಲೆ ಧಾರುಣವಾಗಿ ಗುಂಡು ಹಾರಿಸಿ ಸಾಮೂಹಿಕವಾಗಿ ಹತ್ಯೆಗೈಯ್ಯಲಾಗಿತ್ತು. ಘಟನೆ ಬಳಿಕ ಇಸಿಸ್ ವಿರುದ್ಧ ಮುಗಿಬಿದ್ದಿದ್ದ ಇರಾಕ್ ಸೇನೆ 36ಕ್ಕೂ  ಹೆಚ್ಚು ಉಗ್ರರನ್ನು ಬಂಧಿಸಿತ್ತು. ಬಂಧಿತ ಉಗ್ರರ ಪೈಕಿ 36 ಮಂದಿ ಉಗ್ರರಿಗೆ ಇಂದು ದಕ್ಷಿಣ ಇರಾಕ್ ನ ನಸರಿಯಾಹ್ ಬಂಧೀಖಾನೆಯಲ್ಲಿ ಗಲ್ಲು ಶಿಕ್ಷೆ ವಿಧಿಸಲಾಗಿದೆ.