ವಾಷಿಂಗ್ಟನ್: ಪಾಕಿಸ್ತಾನಕ್ಕೆ ಅಣ್ವಸ್ತ್ರ ತಂತ್ರಜ್ಞಾನಗಳನ್ನು ಚೀನಾ ನೀಡುತ್ತಿದ್ದು, ಇದರಿಂದ ಅಮೆರಿಕ ಮತ್ತು ಭಾರತಕ್ಕೆ ಭದ್ರತಾ ಆತಂಕ ಎದುರಾಗಿದೆ ಎಂದು ಅಮೆರಿಕ ಸಂಸತ್ ಸದಸ್ಯರು ಬರಾಕ್ ಒಬಾಮ ಆಡಳಿತಕ್ಕೆ ಎಚ್ಚರಿಕೆ ನೀಡಿದ್ದಾರೆ.

ಪಾಕಿಸ್ತಾನಕ್ಕೆ ಚೀನಾ ಈಗಾಗಲೇ ಕ್ಷಿಪಣಿ ಉಡಾಹಕಗಳನ್ನು ನೀಡಿದ್ದು ಇದು ಪಾಕಿಸ್ತಾನ ಖಂಡಾಂತರ ಕ್ಷಿಪಣಿಗಳ ಸಾಮರ್ಥ್ಯ ಹೆಚ್ಚಿಸಲು ಸಹಕಾರಿಯಾಗಿದೆ. ಪಾಕ್ 2015ರಲ್ಲಿ ಜೇಲಂನ ತಿಲ್ಲಾ ಪರೀಕ್ಷಾ ಕೇಂದ್ರದಲ್ಲಿ ಇದರ ಪರೀಕ್ಷೆ ನಡೆಸಿದೆ.

ಚೀನಾದ 8x8 ಕ್ಷಿಪಣಿ ಉಡಾಹಕಗಳನ್ನು ಪಾಕಿಸ್ತಾನ ಸೇನೆ ಬಳಸುತ್ತಿದೆ. ಇವು ರಷ್ಯಾದ ಎಂಎಝಡ್ 543 ಮತ್ತು ಎಂಎಝಡ್ 7310ಗೆ ಸರಿಸಮನಾದ ಸಾಮರ್ಥ್ಯ ಹೊಂದಿದೆ. ಇವುಗಳ ಮೂಲಕ ಅಣು ಬಾಂಬ್ ದಾಳಿಯನ್ನು ನಡೆಯಬಹುದಾಗಿದೆ ಎಂದು ಸಂಸತ್ ಸದಸ್ಯರು ಎಚ್ಚರಿಸಿದ್ದಾರೆ.

ಚೀನಾ ನೀಡುತ್ತಿರುವ ಸಹಕಾರದಿಂದ ಪಾಕಿಸ್ತಾನ ಅಣ್ವಸ್ತ್ರ ಸಾಮರ್ಥ್ಯ ಹೆಚ್ಚಾಗುತ್ತಿದೆ. ಇದರಿಂದ ಭಾರತ, ಆಫ್ಘಾನಿಸ್ತಾನ ಸೇರಿ ದಕ್ಷಿಣ ಏಷ್ಯಾ ರಾಷ್ಟ್ರಗಳ ಮೇಲೆ ಪಾಕ್ ದಾಳಿ ನಡೆಸುವ ಸಾಮರ್ಥ್ಯ ಹೊಂದಿದೆ. ಇದು ಏಷ್ಯಾದ ಹಲವು ರಾಷ್ಟ್ರಗಳಿಗೆ ಆತಂಕ ತಂದಿದೆ. ಪಾಕಿಸ್ತಾನದ ಶಾಹೀನ್ 3 ಖಂಡಾಂತರ ಕ್ಷಿಪಣಿ ಭಾರತಕ್ಕೆ ಹೆಚ್ಚು ಅಪಾಯಕಾರಿ ಎಂದು ಅಮೆರಿಕ ಸಂಸತ್ ಎಚ್ಚರಿಸಿದೆ.