ಇಸ್ಲಾಮಾಬಾದ್: ಅಮೆರಿಕದ ನೂತನ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಕೆಟ್ಟ ನಡತೆಯ ವ್ಯಕ್ತಿಯಾಗಿದ್ದು, ಆತನಿಂದ ವಿಶ್ವದ ಮುಸ್ಲಿಮರಿಗೆ ಸದಾಕಾಲ ಬೆದರಿಕೆ ಇರುತ್ತದೆ ಎಂದು ಕುಖ್ಯಾತ ಉಗ್ರಗಾಮಿ ಸಂಘಟನೆ ಜೈಷ್ ಇ ಮೊಹಮದ್ ಹೇಳಿದೆ.
ಬುಧವಾರ ಪಾಕಿಸ್ತಾನದಲ್ಲಿರುವ ತನ್ನ ಹಿಂಬಾಲಕರಿಗೆ ಸಂದೇಶ ರವಾನಿಸಿರುವ ಜೆಇಎಮ್, ಅಮೆರಿಕ ನೂತನ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಬಗ್ಗೆ ಎಚ್ಚರಿಕೆಯಿಂದ ಇರುವಂತೆ ಹೇಳಿದೆ. ತನ್ನ ಮುಖವಾಣಿ ಅಲ್ ಕಲಮ್ ನಲ್ಲಿ ಈ ಬಗ್ಗೆ ಉಲ್ಲೇಖ ಮಾಡಿರುವ ಜೆಇಎಂ, ಮುಸ್ಲಿಮರಲ್ಲಿ ಭಯ ಹುಟ್ಟಿಸುವ ಉದ್ದೇಶದಿಂದಲೇ ಅಂತಾರಾಷ್ಟ್ರೀಯ ಮಾಧ್ಯಗಳು ಟ್ರಂಪ್ ಗೆಲುವನ್ನು ವಿಜೃಂಭಣೆಯಿಂದ ವರದಿ ಮಾಡುತ್ತಿವೆ. ಸ್ವತಃ ಅಮೆರಿಕವೇ ಟ್ರಂಪ್ ಗೆಲುವನ್ನು ನಿರ್ಲಕ್ಷಿಸಿದ್ದರೂ, ವಿಶ್ವದ ಇತರೆ ದೇಶಗಳು ಮಾತ್ರ ಟ್ರಂಪ್ ಜಯವನ್ನು ವಿಜೃಂಭಣೆಯಿಂದ ವರದಿ ಮಾಡುತ್ತಿವೆ ಎಂದು ಹೇಳಿದೆ.
ಇನ್ನು ಟ್ರಂಪ್ ಅವರದ್ದು ಕೆಟ್ಟ ನಡತೆಯಾಗಿದ್ದು, ಎಂದಿಗೂ ಆತ ಮುಸ್ಲಿಮರಿಗೆ ಬೆದರಿಕೆಯೇ. ಆತ ಭಾವನಾತ್ಮಕ ಮತ್ತು ಉದ್ವೇಗಿಯಾಗಿದ್ದು, ಮುಸ್ಲಿಂ ಮತ್ತು ಇಸ್ಲಾಂ ಧರ್ಮದ ವಿರೋಧಿ. ಭಯೋತ್ಪಾದನೆಯ ವಿರುದ್ಧ ಹೋರಾಟದ ಹೆಸರಲ್ಲಿ ಆತ ಮುಸ್ಲಿಮರ ವಿರುದ್ಧ ಯುದ್ಧ ಸಾರಿದ್ದ. ಇದು ಆತನ ಹಲವು ಭಾಷಣಗಳಿಂದ ಸ್ಪಷ್ಟವಾಗುತ್ತದೆ. ಅಮೆರಿಕ ಅಧೀನದಲ್ಲಿರುವ ಮುಸ್ಲಿಂ ರಾಷ್ಟ್ರಗಳ ನಾಯಕರನ್ನು ಬದಲಿಸುವ ಮೂಲಕ ಜಿಹಾದ್ ಗೆ ಬಲ ನೀಡಬೇಕಿದೆ ಎಂದು ಜೆಇಎಂ ಹೇಳಿದೆ.