ಲಂಡನ್: ಇತ್ತ ಪಾಕಿಸ್ತಾನದಲ್ಲಿ ಅಲ್ಲಿನ ಮಾಜಿ ಪ್ರಧಾನಿ ನವಾಜ್ ಷರೀಫ್ ಹಾಗೂ ಅವರ ಪುತ್ರಿಯನ್ನು ಬಂಧಿಸಲು ಸಿದ್ಧತೆ ನಡೆಸುತ್ತಿದ್ದರೆ, ಅತ್ತ ಲಂಡನ್ ನಲ್ಲಿ ಷರೀಫ್ ಮೊಮ್ಮಕ್ಕಳನ್ನು ಬಂಧಿಸಲಾಗಿದೆ ಎಂದು ಮೆಟ್ರೋಪಾಲಿಟನ್ ಪೊಲೀಸರು ತಿಳಿಸಿದ್ದಾರೆ.
ಲಂಡನ್ ನಲ್ಲಿರುವ ಷರೀಫ್ ಮೊಮ್ಮಕ್ಕಳ ನಿವಾಸದ ಬಳಿ ನೂಕುನುಗ್ಗಲು ಉಂಟಾದಾಗ ಹಲ್ಲೆ ನಡೆಸಿದ ಆರೋಪದಡಿ ಷರೀಫ್ ಮೊಮ್ಮಕ್ಕಳನ್ನು ಬಂಧಿಸಲಾಗಿದೆ. ಡಾನ್ ಪತ್ರಿಕೆಯ ವರದಿಯ ಪ್ರಕಾರ ಪಾಕಿಸ್ತಾನ್ ಮುಸ್ಲಿಂ ಲೀಗ್ ನವಾಜ್ ಪಕ್ಷದ ವಿರೋಧಿಗಳು ಷರೀಫ್ ಮೊಮ್ಮಕ್ಕಳ ನಿವಾಸದ ಎದುರು ಪ್ರತಿಭಟನೆ ನಡೆಸುತ್ತಿದ್ದರು. ಈ ವೇಳೆ ಪ್ರತಿಭಟನಾಕಾರನೊಬ್ಬ ಷರೀಫ್ ಮೊಮ್ಮಮ ಜುನೈದ್ ಸಫ್ದಾರ್ ಹಾಗೂ ಝಕಾರಿಯಾ ಹುಸೇನ್ ವಿರುದ್ಧ ವಾಗ್ದಾಳಿ ನಡೆಸಿದ್ದಾರೆ. ಇದರಿಂದ ಕೋಪಗೊಂಡ ಇಬ್ಬರೂ ಪ್ರತಿಭಟನೆಯಲ್ಲಿ ತಮ್ಮ ವಿರುದ್ಧ ಮಾತನಾಡಿದವರ ಮೇಲೆ ಹಲ್ಲೆ ನಡೆಸಿದ್ದಾರೆ.
ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಮರ್ಯಮ್ ನವಾಜ್, ಪ್ರತಿಭಟನಾ ನಿರತರು ನಡೆಸಿದ ವಾಗ್ದಾಳಿಗೆ ಯಾರಾದರೂ ಅದೇ ಕೆಲಸ ಮಾಡುತ್ತಿದ್ದರು ಎಂದು ತಮ್ಮ ಕುಟುಂಬ ಸದಸ್ಯರು ಮಾಡಿದ್ದನ್ನು ಸಮರ್ಥಿಸಿಕೊಂಡಿದ್ದಾರೆ.