ನ್ಯೂಯಾರ್ಕ್: ತಾಯಿ ಜೊತೆ ಜಗಳವಾಡಿದ 5 ವರ್ಷದ ಬಾಲಕನೊಬ್ಬ ಜೇಬಿಗೆ 3 ಡಾಲರ್ ಇರಿಸಿಕೊಂಡು ಲ್ಯಾಂಬೊರ್ಗಿನಿ ಕಾರನ್ನು ಖರೀದಿಸಲು ತಾಯಿಯ ಕಾರನ್ನು ಚಲಾಯಿಸಿಕೊಂಡು ಹೋಗುತ್ತಿದ್ದಾಗ ಪೊಲೀಸರಿಗೆ ಸಿಕ್ಕಿಬಿದ್ದಿದ್ದಾನೆ.

ತನಗೆ ಲ್ಯಾಂಬೊರ್ಗಿನಿ ಕಾರು ಕೊಡಿಸುವಂತೆ ತಾಯಿಯನ್ನು ಬಾಲಕ ಕೇಳುತ್ತಿದ್ದ. ಇದಕ್ಕೆ ತಾಯಿ ಒಪ್ಪಿಗೆ ನೀಡದಿದ್ದಾಗ ಮುನಿಸಿಕೊಂಡ ಬಾಲಕ ತನ್ನ ತಾಯಿ ಕಾರನ್ನು ತೆಗೆದುಕೊಂಡು ಕ್ಯಾಲಿಫೋರ್ನಿಯಾಗೆ ಹೋಗುತ್ತಿದ್ದಾಗ ರಸ್ತೆ ಮಧ್ಯೆ ಕಾರನ್ನು ಅಡ್ಡಾದಿಡ್ಡಿ ಚಲಾಯಿಸಿದ್ದರಿಂದ ಪೊಲೀಸರು ಕಾರನ್ನು ತಡೆದು ನಿಲ್ಲಿಸಿದಾಗ ಅವರಿಗೆ ಶಾಕ್ ಎದುರಾಗಿತ್ತು. 

ನಂತರ ಬಾಲಕನನ್ನು ವಿಚಾರಿಸಿದಾಗ ಆತ ಲ್ಯಾಂಬೊರ್ಗಿನಿ ಕಾರನ್ನು ತರಲು ತೆರಳುತ್ತಿರುವುದಾಗಿ ತಿಳಿಸಿದ್ದಾನೆ. ಇದಕ್ಕೆ ಪೊಲೀಸರು ಬಾಲಕನಿಗೆ ಹೊಸ ಲ್ಯಾಂಬೊರ್ಗಿನಿ ಕಾರಿನ ಬೆಲೆ ಸುಮಾರು 2 ಲಕ್ಷ ಡಾಲರ್ ಎಂದು ಪೊಲೀಸರು ತಿಳಿಸಿದ್ದಾರೆ. 

ಈ ಬಗ್ಗೆ ಬಾಲಕನ ಪೋಷಕರಿಗೆ ಮಾಹಿತಿ ನೀಡಿದ್ದಾರೆ. ಅವರನ್ನು ವಿಚಾರಿಸಿದಾಗ ಈ ಮೊದಲು ಬಾಲಕ ಕಾರು ಚಲಾಯಿಸಿರಲಿಲ್ಲ ಮತ್ತು ಈ ರೀತಿ ವರ್ತಿಸಿರಲಿಲ್ಲ ಎಂದು ತಿಳಿಸಿದ್ದಾರೆ.