ಸಿಯೋಲ್: ಉತ್ತರ ಕೊರಿಯಾದ ಸಂಸ್ಥಾಪಕ ಕಿಮ್ ಇಲ್ ಸುಂಗ್ ಅವರ ಕಿರಿಯ ಸಹೋದರ ಕಿಮ್ ಯೋಂಗ್ ಜು ನಿಧನರಾಗಿದ್ದಾರೆ.

ಕಿಮ್ ಇಲ್ ಸುಂಗ್ ಅವರ ಮೊಮ್ಮಗ ಉತ್ತರ ಕೊರಿಯಾದ ಅಧ್ಯಕ್ಷ ಕಿಮ್ ಜಾಂಗ್ ಉನ್ ತಮ್ಮ ಕಿರಿಯ ತಾತನ ಸಾವಿನ ಬಗ್ಗೆ ತೀವ್ರ ಸಂತಾಪ ವ್ಯಕ್ತಪಡಿಸಿದ್ದಾರೆ. ಅಲ್ಲದೆ ಸಂತಾಪ ಸೂಚಿಸುವ ಮಾಲೆಯನ್ನು ಕಳುಹಿಸಿದ್ದಾರೆ ಎಂದು ಅಧಿಕೃತ ಕೊರಿಯನ್ ಕೇಂದ್ರ ಸುದ್ದಿ ಸಂಸ್ಥೆ ವರದಿ ಮಾಡಿದೆ.

ಕಿಮ್ ಯೋಂಗ್ ಜು(ಕಾರ್ಮಿಕರ) ಪಕ್ಷದ ಮಾರ್ಗಗಳು ಮತ್ತು ನೀತಿಗಳನ್ನು ಕಾರ್ಯಗತಗೊಳಿಸಲು ಶ್ರದ್ಧೆಯಿಂದ ಶ್ರಮಿಸಿದ್ದರು. ಸಮಾಜವಾದಿ ನಿರ್ಮಾಣವನ್ನು ವೇಗಗೊಳಿಸಲು ಮತ್ತು ಕೊರಿಯನ್-ಶೈಲಿಯ ರಾಜ್ಯ ಸಾಮಾಜಿಕ ವ್ಯವಸ್ಥೆಯನ್ನು ಅಭಿವೃದ್ಧಿಪಡಿಸಲು ಕೊಡುಗೆ ನೀಡಿದ್ದರು. ಪಕ್ಷ ಮತ್ತು ರಾಜ್ಯದ ಪ್ರಮುಖ ಹುದ್ದೆಗಳಲ್ಲಿ ಹಲವು ವರ್ಷಗಳಿಂದ ಕೆಲಸ ಮಾಡಿದರು ಎಂದು ಕೆಸಿಎನ್ಎ ಹೇಳಿದೆ.

ಕಿಮ್ ಯೋಂಗ್ ಜು ಯಾವಾಗ ಮೃತಪಟ್ಟರು ಎಂಬ ನಿಖರ ಮಾಹಿತಿ ಇಲ್ಲ. ಸಿಯೋಲ್‌ನ ಏಕೀಕರಣ ಸಚಿವಾಲಯದ ಪ್ರಕಾರ, ಜು 1920ರಲ್ಲಿ ಜನಿಸಿದರು ಅಂದರೆ ಅವರ ಮರಣದ ಸಮಯದಲ್ಲಿ ಅವರು 100 ಅಥವಾ 101 ವರ್ಷ ವಯಸ್ಸಿನವರಾಗಿದ್ದರು.

1948ರಲ್ಲಿ ಕಿಮ್ ಇಲ್ ಸುಂಗ್ ದೇಶವನ್ನು ಸ್ಥಾಪಿಸಿದಾಗಿನಿಂದ ಕಿಮ್ ಕುಟುಂಬದ ಮೂರು ತಲೆಮಾರುಗಳು ಉತ್ತರ ಕೊರಿಯಾವನ್ನು ಆಳಿದೆ. ಕಿಮ್ ಇಲ್ ಸುಂಗ್ 1994ರಲ್ಲಿ ನಿಧನರಾದಾಗ, ಅವರ ಹಿರಿಯ ಮಗ ಕಿಮ್ ಜೊಂಗ್ ಇಲ್ ಅವರು ಅಧಿಕಾರ ವಹಿಸಿಕೊಂಡಿದ್ದರು.