ಲಂಡನ್: ಜಗತ್ತಿನಾದ್ಯಂತ ತೀವ್ರ ಆತಂಕ ಸೃಷ್ಟಿಸಿರುವ ಕೋವಿಡ್-19 ಹೊಸ ರೂಪಾಂತರಿ ಓಮಿಕ್ರಾನ್ ವೈರಸ್ ಬ್ರಿಟನ್ ನಲ್ಲಿ ಇಬ್ಬರಿಗೆ ದೃಢಪಟ್ಟಿದೆ ಎಂದು ಯುಕೆ ಸರ್ಕಾರ ತಿಳಿಸಿದೆ. ಅಲ್ಲದೆ ತನ್ನ ಪ್ರಯಾಣದ ಕೆಂಪು ಪಟ್ಟಿಗೆ ಇನ್ನೂ ನಾಲ್ಕು ಆಫ್ರಿಕನ್ ದೇಶಗಳನ್ನು ಸೇರಿಸಿದೆ ಎಂದು ಶನಿವಾರ ಪ್ರಕಟಣೆ ತಿಳಿಸಿದೆ.
ಯುಕೆ ಹೆಲ್ತ್ ಸೆಕ್ಯುರಿಟಿ ಏಜೆನ್ಸಿ(ಯುಕೆಎಚ್ಎಸ್ಎ) ಚೆಲ್ಮ್ಸ್ಫೋರ್ಡ್, ಎಸೆಕ್ಸ್ ಮತ್ತು ನಾಟಿಂಗ್ಹ್ಯಾಮ್ನಲ್ಲಿ ಹೊಸ ಕೋವಿಡ್ ಪ್ರಕರಣಗಳು ಪತ್ತೆಯಾಗಿವೆ ಎಂದು ಬ್ರಿಟನ್ ಆರೋಗ್ಯ ಕಾರ್ಯದರ್ಶಿ ಸಾಜಿದ್ ಜಾವಿದ್ ಅವರು ಹೇಳಿದ್ದಾರೆ.
ಇದನ್ನು ಓದಿ: ಓಮಿಕ್ರಾನ್ ಕೋವಿಡ್ ರೂಪಾಂತರಿ ವಿರುದ್ಧ ಲಸಿಕೆ ಬಗ್ಗೆ ಬ್ರಿಟನ್ ವಿಜ್ಞಾನಿಗಳು ಹೇಳ್ತಿರೋದೇನು? ಹೀಗಿದೆ ವಿವರ...
ಸೋಂಕಿತ ಇಬ್ಬರೂ ಅವರ ಮನೆಯಲ್ಲಿಯೇ ಸ್ವಯಂ ಕ್ವಾರಂಟೈನ್ ಆಗಿದ್ದು, ಅವರ ಸಂಪರ್ಕಕ್ಕೆ ಬಂದವರನ್ನು ಪತ್ತೆಹಚ್ಚಲಾಗುತ್ತಿದೆ ಎಂದು ಅವರು ತಿಳಿಸಿದ್ದಾರೆ.
ಅಲ್ಲದೆ, ಭಾನುವಾರ ಮುಂಜಾನೆ 4 ಗಂಟೆಯಿಂದ ಇನ್ನೂ ನಾಲ್ಕು ದೇಶಗಳಾದ ಅಂಗೋಲಾ, ಮೊಜಾಂಬಿಕ್, ಮಲಾವಿ ಮತ್ತು ಜಾಂಬಿಯಾಗಳನ್ನು ಪ್ರಯಾಣದ "ಕೆಂಪು ಪಟ್ಟಿಗೆ" ಸೇರಿಸಲಾಗುತ್ತಿದೆ ಎಂದು ಸರ್ಕಾರ ಹೇಳಿದೆ.