ಬೀಜಿಂಗ್: ಪ್ರಬಲ ಅಮೆರಿಕ- ಇಸ್ರೇಲ್ ವಿರುದ್ಧ ಸುಮಾರು 40 ದಿನಗಳ ಕಾಲ ಹೋರಾಡಿದ ಇರಾನ್ ಸೇನೆಗೆ ಚೀನಾ ಬೆಂಬಲ ನೀಡಿದೆ ಎಂಬ ಮಾತುಗಳು ಕೇಳಿಬರುತ್ತಿವೆ. ಚೀನಾದ ಸಂಸ್ಥೆಗಳು ಇರಾನ್ ಮಿಲಿಟರಿಗೆ ಉಪಗ್ರಹ ಚಿತ್ರಣ ಮತ್ತು ಸೆಮಿಕಂಡಕ್ಟರ್ ಚಿಪ್ ತಯಾರಿಕಾ ಉಪಕರಣಗಳನ್ನು ಒದಗಿಸಿವೆ ಎಂದು ವರದಿಯಾಗಿದೆ.

ಈ ಬಗ್ಗೆ ಚೀನಾದ ರಕ್ಷಣಾ ಸಚಿವಾಲಯ ಗುರುವಾರ ಸ್ಪಷ್ಟನೆ ನೀಡಿದೆ. ಚೀನಾವನ್ನು ಗುರಿಯಾಗಿಟ್ಟುಕೊಂಡು ಊಹಾಪೋಹ ಮತ್ತು ಸುಳ್ಳು ಮಾಹಿತಿಯನ್ನು ಹಬ್ಬಿಸಲಾಗುತ್ತಿದೆ. ಇದನ್ನು ಬಲವಾಗಿ ವಿರೋಧಿಸುತ್ತೇವೆ ಎಂದು ಚೀನಾ ರಕ್ಷಣಾ ಸಚಿವಾಲಯದ ವಕ್ತಾರ ಝಾಂಗ್ ಕ್ಸಿಯೋಗಾಂಗ್ ಹೇಳಿದ್ದಾರೆ.

ಸೆಮಿಕಂಡಕ್ಟರ್ ಮ್ಯಾನುಫ್ಯಾಕ್ಚರಿಂಗ್ ಇಂಟರ್ನ್ಯಾಷನಲ್ ಕಾರ್ಪೊರೇಷನ್ (SMIC) ಇರಾನ್ ಮಿಲಿಟರಿಗೆ ಚಿಪ್ ತಯಾರಿಕಾ ಉಪಕರಣ ಒದಗಿಸಿದೆ ಮತ್ತು ಚೀನಾದ ವಾಣಿಜ್ಯ ಉಪಗ್ರಹ ಕಂಪನಿಯು ಮಧ್ಯಪ್ರಾಚ್ಯದಲ್ಲಿ ಯುಎಸ್ ಮಿಲಿಟರಿ ನೆಲೆಗಳ ಪೋಟೋಗಳನ್ನು ಬಿಡುಗಡೆ ಮಾಡಿದೆ ಎಂಬ ವರದಿಗೆ ಈ ರೀತಿಯಲ್ಲಿ ಅವರು ಪ್ರತಿಕ್ರಿಯಿಸಿದ್ದಾರೆ.

ಇರಾನ್‌ಗೆ ನೆರವಾಗಲು ಚೀನಾ ಮತ್ತು ರಷ್ಯಾ ಕೈಗೊಂಡ ಕ್ರಮಗಳ ಬಗ್ಗೆ ನಮಗೆ ಗೊತ್ತಿದೆ. ಅಗತ್ಯವಿದ್ದರೆ ಪ್ರತಿಕ್ರಿಯಿಸುವುದಾಗಿ ಹೇಳಿರುವ ಯುಎಸ್ ಅಧಿಕಾರಿಗಳ ಹೇಳಿಕೆಗಳನ್ನು ಚೀನಾ ದೃಢವಾಗಿ ತಿರಸ್ಕರಿಸಿದೆ ಎಂದು ಜಾಂಗ್ ಹೇಳಿದರು.

ಇರಾನ್ ವಿಚಾರದಲ್ಲಿ ಚೀನಾದ ನಿಲುವು ನೇರವಾಗಿರುತ್ತದೆ. ನಾವು ಯಾವಾಗಲೂ ವಸ್ತುನಿಷ್ಠ ಮತ್ತು ನಿಷ್ಪಕ್ಷಪಾತ ನಿಲುವನ್ನು ಎತ್ತಿ ಹಿಡಿದಿದ್ದೇವೆ. ಚೀನಾ ಶಾಂತಿ ಮಾತುಕತೆಗಳನ್ನು ಪ್ರೋತ್ಸಾಹಿಸಲು ನಿರಂತರವಾಗಿ ಕೆಲಸ ಮಾಡಿದೆ ಮತ್ತು 'ಬೆಂಕಿಗೆ ತುಪ್ಪ ಸುರಿಸುವ ಕೆಲಸವನ್ನು ಎಂದಿಗೂ ಮಾಡಲ್ಲ ಎಂದಿದ್ದಾರೆ.

ಯಾರು ಒಂದನ್ನು ಹೇಳಿ, ಇನ್ನೊಂದನ್ನು ಮಾಡುತ್ತಿರುವವರು, ಅವರೇ ಯುದ್ಧ ಸೃಷ್ಟಿಸಿ, ಜಗತ್ತಿನಾದ್ಯಂತ ಬಿಕ್ಕಟ್ಟು ಸೃಷ್ಟಿಸಿದ್ದಾರೆ. ಅಂತಾರಾಷ್ಟ್ರೀಯ ಸಮುದಾಯ ಇದನ್ನು ಸ್ಪಷ್ಪವಾಗಿ ನೋಡಿದೆ ಎಂದು ಅವರು ಹೇಳಿರುವುದಾಗಿ ಸರ್ಕಾರಿ ಸ್ವಾಮ್ಯದ ಚೀನಾ ಡೈಲಿ ವರದಿ ಮಾಡಿದೆ.