ನ್ಯೂಯಾರ್ಕ್: ತಮ್ಮ ರಾಕೆಟ್ ಕಂಪನಿಯಾದ ಸ್ಪೇಸ್‌ಎಕ್ಸ್‌ನ ಭರ್ಜರಿ ಷೇರು ಮಾರುಕಟ್ಟೆ ಪ್ರವೇಶದೊಂದಿಗೆ ಎಲಾನ್ ಮಸ್ಕ್ ಈಗ ವಿಶ್ವದ ಮೊದಲ ಟ್ರಿಲಿಯನೇರ್ (ಒಂದು ಟ್ರಿಲಿಯನ್ ಡಾಲರ್ ಆಸ್ತಿ ಹೊಂದಿದ ವ್ಯಕ್ತಿ) ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
ಒಬ್ಬ ವ್ಯಕ್ತಿಯೇ ಇಷ್ಟೊಂದು ಸಂಪತ್ತನ್ನು ಹೊಂದಿರುವುದು ಹಿಂದೆ ಊಹೆಗೂ ನಿಲುಕದ ಸಂಗತಿಯಾಗಿತ್ತು. ಶುಕ್ರವಾರದವರೆಗೆ ಒಂದು ಟ್ರಿಲಿಯನ್ ಡಾಲರ್ ಎನ್ನುವುದು ಕೆಲವೇ ಕೆಲವು ದೊಡ್ಡ ರಾಷ್ಟ್ರಗಳ ಒಟ್ಟು ದೇಶೀಯ ಉತ್ಪನ್ನ (GDP) ಅಥವಾ ಅವರ ಭಾರೀ ಸಾಲದ ಮೊತ್ತಕ್ಕೆ ಮಾತ್ರ ಹೋಲಿಕೆಯಾಗುತ್ತಿತ್ತು. ಕಳೆದ ದಶಕದಲ್ಲಿ ಷೇರು ಮಾರುಕಟ್ಟೆಯಲ್ಲಿ ವಹಿವಾಟಾಗಿರುವ ಕೆಲವೇ ಕೆಲವು ಅತಿದೊಡ್ಡ ಕಂಪನಿಗಳ ಮೌಲ್ಯವೂ ಈ ಮಟ್ಟವನ್ನು ತಲುಪಿತ್ತು.
ಎಲಾನ್ ಮಸ್ಕ್ ಅವರ ಈ ಹೊಸ ದಾಖಲೆ, ವಿಶ್ವದ ಅತಿ ಶ್ರೀಮಂತರ ಸಂಪತ್ತು ವೇಗವಾಗಿ ಹೆಚ್ಚುತ್ತಿರುವ ಸಮಯದಲ್ಲಿ ಬಂದಿದೆ. ತಂತ್ರಜ್ಞಾನ ಕ್ಷೇತ್ರದ ದಿಗ್ಗಜರಿಂದ ಹಿಡಿದು ಸಿನಿಮಾ ಮತ್ತು ಮನರಂಜನಾ ಕ್ಷೇತ್ರದ ಗಣ್ಯರವರೆಗೆ ಕೋಟ್ಯಧಿಪತಿಗಳ ಸಂಖ್ಯೆ ವರ್ಷದಿಂದ ವರ್ಷಕ್ಕೆ ಏರುತ್ತಲೇ ಇದೆ. ಮತ್ತೊಂದೆಡೆ, ವಿಶ್ವದಾದ್ಯಂತ ಲಕ್ಷಾಂತರ ಜನರು ತಮ್ಮ ದೈನಂದಿನ ಖರ್ಚುಗಳನ್ನು ನಿಭಾಯಿಸಲು ಹೋರಾಡುತ್ತಿದ್ದಾರೆ.
ಹೀಗಾಗಿ, ಮೊದಲ ಟ್ರಿಲಿಯನೇರ್ ಹುಟ್ಟಿಕೊಂಡಿರುವುದು ಶ್ರೀಮಂತರು ಮತ್ತು ಬಡವರ ನಡುವಿನ ಅಂತರ ಎಷ್ಟರ ಮಟ್ಟಿಗೆ ಹೆಚ್ಚಿದೆ ಎಂಬುದಕ್ಕೆ ಮತ್ತೊಂದು ಆತಂಕಕಾರಿ ಉದಾಹರಣೆ ಎಂದು ಹಲವರು ಅಭಿಪ್ರಾಯಪಟ್ಟಿದ್ದಾರೆ.
"ಒಂದು ಟ್ರಿಲಿಯನ್" ಎನ್ನುವ ಸಂಖ್ಯೆಯೇ ಸಾಮಾನ್ಯವಾಗಿ ಅರ್ಥಮಾಡಿಕೊಳ್ಳಲು ಕಷ್ಟವಾಗುವಷ್ಟು ದೊಡ್ಡದು. ಇದು ಒಂದು ಬಿಲಿಯನ್ ಡಾಲರ್‌ಗಿಂತ ಸಾವಿರ ಪಟ್ಟು ದೊಡ್ಡದು ಮತ್ತು ಒಂದು ಮಿಲಿಯನ್ ಡಾಲರ್‌ಗಿಂತ ಹತ್ತು ಲಕ್ಷ ಪಟ್ಟು ಹೆಚ್ಚು.
ಫೋರ್ಬ್ಸ್ ಅಂದಾಜಿನ ಪ್ರಕಾರ, ಎಲಾನ್ ಮಸ್ಕ್ ಅವರ ಒಟ್ಟು ಆಸ್ತಿ ಮೌಲ್ಯ 1.1 ಟ್ರಿಲಿಯನ್ ಡಾಲರ್‌ಗೆ ಏರಿಕೆಯಾಗಿದೆ. ಸ್ಪೇಸ್‌ಎಕ್ಸ್ ಕಂಪನಿಯ ಷೇರುಗಳು ಮಾರುಕಟ್ಟೆಯಲ್ಲಿ ಭಾರೀ ಏರಿಕೆ ಕಂಡಿದ್ದೇ ಇದಕ್ಕೆ ಪ್ರಮುಖ ಕಾರಣ.
ಒಂದು ಟ್ರಿಲಿಯನ್ ಅಮೆರಿಕನ್ ಡಾಲರ್ ನೋಟುಗಳನ್ನು ಒಂದರ ಹಿಂದೆ ಒಂದರಂತೆ ಜೋಡಿಸಿದರೆ, ಅವು ಸುಮಾರು 9.7 ಕೋಟಿ ಮೈಲುಗಳಷ್ಟು (ಸುಮಾರು 15.6 ಕೋಟಿ ಕಿಲೋಮೀಟರ್) ದೂರ ವ್ಯಾಪಿಸುತ್ತವೆ.
ಇದು ಭೂಮಿಯಿಂದ ಚಂದ್ರನಿಗೆ ಹೋಗಿ ಬರುವ ಸುಮಾರು 200 ಬಾರಿಯ ಪ್ರಯಾಣಗಳಿಗೆ ಸಮಾನವಾಗಿದೆ. ನಾಸಾ ಪ್ರಕಾರ, ಚಂದ್ರನು ಭೂಮಿಯಿಂದ ಸರಾಸರಿ 2,38,855 ಮೈಲು (ಸುಮಾರು 3,84,400 ಕಿ.ಮೀ.) ದೂರದಲ್ಲಿದ್ದಾನೆ. ಅಷ್ಟೇ ಅಲ್ಲದೆ, ಭೂಮಿ ಮತ್ತು ಸೂರ್ಯನ ನಡುವಿನ ಸುಮಾರು 9.3 ಕೋಟಿ ಮೈಲುಗಳ ದೂರವನ್ನೂ ಇದು ಮೀರಿಸುತ್ತದೆ.
ಅಮೆರಿಕ ಜನಗಣತಿ ಇಲಾಖೆ ಪ್ರಕಾರ, ಪ್ರಸ್ತುತ ಭೂಮಿಯ ಮೇಲೆ ಸುಮಾರು 820 ಕೋಟಿ ಜನರು ವಾಸಿಸುತ್ತಿದ್ದಾರೆ. ಒಂದು ಟ್ರಿಲಿಯನ್ ಡಾಲರ್ ನ್ನು ವಿಶ್ವದ ಎಲ್ಲ ಜನರಿಗೂ ಸಮಾನವಾಗಿ ಹಂಚಿದರೆ, ಪ್ರತಿಯೊಬ್ಬರಿಗೂ ಸುಮಾರು 122 ಡಾಲರ್ ದೊರೆಯುತ್ತದೆ.
ಮಸ್ಕ್ ಜನಿಸಿದ ದೇಶವಾದ ದಕ್ಷಿಣ ಆಫ್ರಿಕಾದ ವಾರ್ಷಿಕ ಜಿಡಿಪಿಯ ದುಪ್ಪಟ್ಟಿಗಿಂತಲೂ ಹೆಚ್ಚು ಮೊತ್ತ ಇದು. ಅಂತಾರಾಷ್ಟ್ರೀಯ ಹಣಕಾಸು ನಿಧಿ (ಐಎಂಎಫ್) 2026ರ ಅಂಕಿಅಂಶಗಳ ಪ್ರಕಾರ, ದಕ್ಷಿಣ ಆಫ್ರಿಕಾದ ಜಿಡಿಪಿ ಸುಮಾರು 480 ಬಿಲಿಯನ್ ಡಾಲರ್ ಇದೆ.
ಇಂದಿಗೂ ವಿಶ್ವದಲ್ಲಿ ಕೇವಲ 21 ದೇಶಗಳಷ್ಟೇ ಒಂದು ಟ್ರಿಲಿಯನ್ ಡಾಲರ್‌ಗಿಂತ ಹೆಚ್ಚಿನ ಜಿಡಿಪಿ ಹೊಂದಿವೆ. ಅಮೆರಿಕ 32.38 ಟ್ರಿಲಿಯನ್ ಡಾಲರ್ ಮತ್ತು ಚೀನಾ 20.85 ಟ್ರಿಲಿಯನ್ ಡಾಲರ್ ಜಿಡಿಪಿಯೊಂದಿಗೆ ಮೊದಲ ಎರಡು ಸ್ಥಾನಗಳಲ್ಲಿ ಇವೆ.
ಅಮೆರಿಕದಲ್ಲಿ ಮನೆಗಳ ಮಧ್ಯಮ ಮಾರಾಟ ಬೆಲೆ ಸುಮಾರು 4,03,200 ಡಾಲರ್ ಆಗಿದೆ. ಒಂದು ಟ್ರಿಲಿಯನ್ ಡಾಲರ್ ಇದ್ದರೆ, ಈ ಬೆಲೆಗೆ ಸುಮಾರು 25 ಲಕ್ಷ ಮನೆಗಳನ್ನು ಖರೀದಿಸಬಹುದು.
ಅಮೆರಿಕದಲ್ಲಿ ಪ್ರಸ್ತುತ ಒಂದು ಗ್ಯಾಲನ್ ಪೆಟ್ರೋಲ್ ಬೆಲೆ ಸರಾಸರಿ 4.11 ಡಾಲರ್ ಇದೆ. ಈ ಲೆಕ್ಕಾಚಾರದ ಪ್ರಕಾರ, ಒಂದು ಟ್ರಿಲಿಯನ್ ಡಾಲರ್‌ನಿಂದ ಸುಮಾರು 243 ಬಿಲಿಯನ್ ಗ್ಯಾಲನ್ ಪೆಟ್ರೋಲ್ ಖರೀದಿಸಬಹುದು. ಹೋಲಿಕೆಗಾಗಿ ಹೇಳುವುದಾದರೆ, ಕಳೆದ ವರ್ಷ ಅಮೆರಿಕದಲ್ಲಿ ಒಟ್ಟು ಬಳಕೆಯಾದ ಮೋಟಾರ್ ಪೆಟ್ರೋಲ್ ಸುಮಾರು 137 ಬಿಲಿಯನ್ ಗ್ಯಾಲನ್ ಮಾತ್ರ.
ಫೋರ್ಬ್ಸ್ ಪಟ್ಟಿಯ ಪ್ರಕಾರ, ವಿಶ್ವದ ಎರಡನೇ ಅತಿ ಶ್ರೀಮಂತ ವ್ಯಕ್ತಿ ಗೂಗಲ್ ಸಹ-ಸಂಸ್ಥಾಪಕ ಲ್ಯಾರಿ ಪೇಜ್. ಅವರ ಒಟ್ಟು ಆಸ್ತಿ ಮೌಲ್ಯ ಸುಮಾರು 295 ಬಿಲಿಯನ್ ಡಾಲರ್. ಅಂದರೆ, ಮಸ್ಕ್ ಅವರ ಟ್ರಿಲಿಯನ್ ಡಾಲರ್ ಆಸ್ತಿಗಿಂತ ಇದು 705 ಬಿಲಿಯನ್ ಡಾಲರ್ ಕಡಿಮೆ.
ವಾಸ್ತವವಾಗಿ, ಲ್ಯಾರಿ ಪೇಜ್, ಸರ್ಗೆ ಬ್ರಿನ್ (272 ಬಿಲಿಯನ್ ಡಾಲರ್), ಜೆಫ್ ಬೆಜೋಸ್ (247 ಬಿಲಿಯನ್ ಡಾಲರ್) ಮತ್ತು ಲ್ಯಾರಿ ಎಲಿಸನ್ (228 ಬಿಲಿಯನ್ ಡಾಲರ್) ಅವರ ಒಟ್ಟು ಆಸ್ತಿ ಮೌಲ್ಯವನ್ನು ಸೇರಿಸಿದರೂ ಅದು ಸುಮಾರು 1.04 ಟ್ರಿಲಿಯನ್ ಡಾಲರ್ ಮಾತ್ರ.
ಈ ಆಸ್ತಿಯ ಮೌಲ್ಯ ಪ್ರತಿದಿನ ಅಥವಾ ಕೆಲವೇ ಗಂಟೆಗಳಲ್ಲಿ ಹತ್ತಾರು ಬಿಲಿಯನ್ ಡಾಲರ್‌ಗಳಷ್ಟು ಏರಿಳಿತ ಕಾಣಬಹುದು. ಮಸ್ಕ್ ಅವರ ಆಸ್ತಿಯ ಮೌಲ್ಯವೂ ಕಳೆದ ಕೆಲವು ವರ್ಷಗಳಲ್ಲಿ ವೇಗವಾಗಿ ಏರಿಕೆಯಾಗಿದ್ದು, 2024ರಲ್ಲಿ 195 ಬಿಲಿಯನ್ ಡಾಲರ್ ಇದ್ದದ್ದು 2025ರಲ್ಲಿ 342 ಬಿಲಿಯನ್ ಡಾಲರ್‌ಗೆ ಏರಿತ್ತು. ಈಗ ಅದು ಒಂದು ಟ್ರಿಲಿಯನ್ ಡಾಲರ್ ಗಡಿ ದಾಟಿದೆ.