ವಾಷಿಂಗ್ಟನ್/ದುಬೈ: ದುಬೈನಿಂದ ಇಸ್ರೇಲ್ ರಾಜಧಾನಿ ಟೆಲ್ ಅವಿವ್‌ಗೆ ಹೊರಟಿದ್ದ ಫ್ಲೈದುಬೈ (FlyDubai) ವಿಮಾನವನ್ನು ಪತನಗೊಳಿಸಲು ಯತ್ನಿಸಿದ ಸಹ-ಪೈಲಟ್‌ಗೆ ಇರಾನ್ ದೇಶದೊಂದಿಗೆ ಸಂಪರ್ಕವಿರಬಹುದು ಎಂದು ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಗಂಭೀರ ಆರೋಪ ಮಾಡಿದ್ದಾರೆ.
ವೈಟ್ ಹೌಸ್‌ನಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, "ಘಟನೆಯ ತನಿಖೆ ಇನ್ನೂ ಪ್ರಾಥಮಿಕ ಹಂತದಲ್ಲಿದೆ. ಆದರೆ. ಆರಂಭಿಕ ಗುಪ್ತಚರ ವರದಿಗಳು ಇರಾನ್ ಲಿಂಕ್ ಇರುವ ಸಾಧ್ಯತೆಯನ್ನು ತಳ್ಳಿಹಾಕುತ್ತಿಲ್ಲ. ಒಂದು ವೇಳೆ ತನಿಖೆಯಲ್ಲಿ ಟೆಹ್ರಾನ್ (ಇರಾನ್) ಭಾಗಿಯಾಗಿರುವುದು ಸಾಬೀತಾದರೆ, ಆ ದೇಶ ಭಾರಿ ಬೆಲೆ ತೆರಬೇಕಾಗುತ್ತದೆ ಎಂದು ಎಚ್ಚರಿಕೆ ನೀಡಿದ್ದಾರೆ.
ನಾನು ಕೇಳುತ್ತಿರುವ ಮಾಹಿತಿಯ ಆಧಾರದ ಮೇಲೆ ಉತ್ತರ ಹೌದು ಎಂದು ಹೇಳುತ್ತೇನೆ. ಆದರೆ ಈ ಬಗ್ಗೆ ನಾವು ಇನ್ನೂ ಪರಿಶೀಲಿಸುತ್ತಿದ್ದೇವೆ, ಆದರೆ ಇರಾನ್ ಸಂಪರ್ಕಕ್ಕೆ ಸಂಬಂಧಿಸಿದ ಯಾವುದೇ ವಿವರಗಳು ಇನ್ನೂ ಬಹಿರಂಗಗೊಂಡಿಲ್ಲ ಎಂದು ಹೇಳಿದ್ದಾರೆ.
ಈ ದಾಳಿಯ ಹಿಂದೆ ಇರಾನ್ ಕೈವಾಡವಿರುವುದು ದೃಢಪಟ್ಟರೆ ಅಮೆರಿಕ ಟೆಹ್ರಾನ್ ವಿರುದ್ಧ ಪ್ರತೀಕಾರ ಕ್ರಮ ಕೈಗೊಳ್ಳಲಿದೆಯೇ ಎಂಬ ಪ್ರಶ್ನೆಗೆ ಉತ್ತರಿಸಿ, “ಅವರಿಗೆ ತುಂಬಾ ಕಠಿಣವಾಗಿ ಹೊಡೆತ ಬೀಳಲಿದೆ, ಚಿಂತಿಸಬೇಡಿ” ಎಂದು ತಿಳಿಸಿದರು..
“ಅವರನ್ನೇ ಕೇಳಿ. ಏನಾಯಿತು ಎಂಬುದು ಅವರಿಗೆ ಗೊತ್ತಿದೆ. ಅವರಿಗೆ ತುಂಬಾ ಕಠಿಣವಾಗಿ ಹೊಡೆತ ಬೀಳಲಿದೆ” ಎಂದಿದ್ದಾರೆ.
ಸಂಯುಕ್ತ ಅರಬ್ ಎಮಿರೇಟ್ಸ್‌ನಿಂದ ಟೆಲ್ ಅವೀವ್‌ಗೆ ತೆರಳುತ್ತಿದ್ದ ಫ್ಲೈದುಬೈ ವಿಮಾನದಲ್ಲಿ 174 ಮಂದಿ ಪ್ರಯಾಣಿಕರಿದ್ದರು. ಇವರಲ್ಲಿ ಬಹುತೇಕರು ಇಸ್ರೇಲಿಯರು.
ರಕ್ತಸಿಕ್ತರಾಗಿದ್ದ ಭಾರತೀಯ ಕ್ಯಾಪ್ಟನ್ ಸ್ಮಿತ್ ಮಚ್ಚರ್ ಕಾಕ್‌ಪಿಟ್ ಬಾಗಿಲು ತೆರೆಯುವಲ್ಲಿ ಯಶಸ್ವಿಯಾಗಿದ್ದು, ಬಳಿಕ ಪ್ರಯಾಣಿಕರು ಒಳಗೆ ಪ್ರವೇಶಿಸಿ ಸಹ ಪೈಲಟ್‌ನೊಂದಿಗೆ ಸೆಣಸಾಡಿದರು.
ವಿಮಾನ ಅತೀವ ವೇಗದಲ್ಲಿ ಕೆಳಕ್ಕೆ ಇಳಿಯುತ್ತಿದ್ದ ಸಂದರ್ಭದಲ್ಲಿ ಅದನ್ನು ಸ್ಥಿರಗೊಳಿಸುವಲ್ಲಿ ನೆರವಾದರು. ಈ ವೇಳೆ ವಿಮಾನದ ರಡ್ಡರ್ ಕೂಡ ಹಾನಿಗೊಳಗಾಯಿತು ಎಂದು ಪ್ರಯಾಣಿಕರು ತಿಳಿಸಿದ್ದಾರೆ.
“ನಾವು ಅಸಹಾಯಕರಾಗಿದ್ದೆವು. ಗಾಳಿಯಲ್ಲಿ ನೇತಾಡುತ್ತಿರುವಂತೆ ಭಾಸವಾಗುತ್ತಿತ್ತು. ಯಾರನ್ನು ನಂಬಬೇಕು ಎಂಬುದೇ ಗೊತ್ತಾಗಲಿಲ್ಲ. ಆದರೆ, ಬದುಕುಳಿಯಬೇಕೆಂಬ ಸಹಜ ಪ್ರವೃತ್ತಿಯಿಂದ ಎಲ್ಲರೂ ಕಾರ್ಯನಿರ್ವಹಿಸಿದೆವು ಎಂದು ಘಟನೆಯಲ್ಲಿ ಮಧ್ಯಪ್ರವೇಶಿಸಿದ್ದ ಅಸಾಫ್ ರಾಜುವಾನ್ ಹೇಳಿರುವುದಾಗಿ ಇಸ್ರೇಲ್ ಅಧ್ಯಕ್ಷರ ಕಚೇರಿ ಬಿಡುಗಡೆ ಮಾಡಿದ ಹೇಳಿಕೆಯಲ್ಲಿ ತಿಳಿಸಲಾಗಿದೆ.
ತನಿಖೆಯ ಕುರಿತು ಮಾಹಿತಿ ಹೊಂದಿರುವ ಪ್ರಾದೇಶಿಕ ಅಧಿಕಾರಿಯೊಬ್ಬರ ಪ್ರಕಾರ, ಓಮನ್ ಪ್ರಜೆಯಾಗಿರುವ ಶಂಕಿತನನ್ನು ಬಂಧಿಸಲಾಗಿದೆ. ದಾಳಿಯ ಹಿಂದಿನ ಉದ್ದೇಶವನ್ನು ಪತ್ತೆಹಚ್ಚಲು ಸೌದಿ ಅರೇಬಿಯಾ, ಇಸ್ರೇಲ್ ಸೇರಿದಂತೆ ಹಲವು ದೇಶಗಳೊಂದಿಗೆ ಸಹಕರಿಸುತ್ತಿದೆ. ಯುಎಇ, ಅಮೆರಿಕ ಮತ್ತು ಓಮನ್ ಕೂಡ ತನಿಖೆಯಲ್ಲಿ ಭಾಗಿಯಾಗಿವೆ ಎಂದು ತಿಳಿಸಿದ್ದಾರೆ.
ಭಯೋತ್ಪಾದನೆಯಿಂದ ಹಿಡಿದು ಮಾನಸಿಕ ಅಸ್ವಸ್ಥತೆಯವರೆಗೆ ಎಲ್ಲ ಸಾಧ್ಯತೆಗಳನ್ನೂ ಪರಿಶೀಲಿಸಲಾಗುತ್ತಿದೆ. ಸದ್ಯಕ್ಕೆ ಯಾವುದನ್ನೂ ತಳ್ಳಿಹಾಕಲಾಗಿಲ್ಲ ಎಂದು ಹೆಸರು ಬಹಿರಂಗಪಡಿಸಲು ಇಚ್ಛಿಸದ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಇಸ್ರೇಲ್ ಪ್ರಧಾನಿ ಬೆಂಜಮಿನ್ ನೆತನ್ಯಾಹು ಯಾವುದೇ ವಿವರಗಳನ್ನು ನೀಡದೆ, ಶಂಕಿತ ವ್ಯಕ್ತಿ ಇಸ್ಲಾಮಿಸ್ಟ್ ಸಿದ್ಧಾಂತದಿಂದ ಪ್ರಭಾವಿತನಾಗಿದ್ದ ಎಂದು ಹೇಳಿದ್ದಾರೆ.
ಆತನನ್ನು ಯಾರು ಮೂಲಭೂತವಾದದತ್ತ ಸೆಳೆದರು ಎಂದು ಫಾಕ್ಸ್ ನ್ಯೂಸ್ ಕೇಳಿದಾಗ, ತನಗೆ ತಿಳಿದಿಲ್ಲ ಎಂದು ನೆತನ್ಯಾಹು ಉತ್ತರಿಸಿದ್ದಾರೆ. ಆದರೆ, ಈ ಆರೋಪಕ್ಕೆ ಸಂಬಂಧಿಸಿದಂತೆ ನೆತನ್ಯಾಹು ಅವರ ಕಚೇರಿ ಹೆಚ್ಚಿನ ಪ್ರತಿಕ್ರಿಯೆ ನೀಡಲು ನಿರಾಕರಿಸಿದೆ.
ಇಸ್ರೇಲ್‌ನ ವಿಮಾನಯಾನ ನಿಯಮಗಳಲ್ಲಿದ್ದ ಒಂದು ಲೋಪದಿಂದಾಗಿ ಶಂಕಿತ ಸಹ ಪೈಲಟ್ ಇಸ್ರೇಲ್‌ಗೆ ತೆರಳುವ ವಿಮಾನದಲ್ಲಿ ಕೆಲಸ ಮಾಡಲು ಅವಕಾಶ ಪಡೆದಿರಬಹುದು ಎಂದು ನೆತನ್ಯಾಹು ಹೇಳಿದ್ದಾರೆ.
ಇಸ್ರೇಲ್‌ನೊಂದಿಗೆ ರಾಜತಾಂತ್ರಿಕ ಸಂಬಂಧ ಹೊಂದಿರದ ದೇಶಗಳ ಪೈಲಟ್‌ಗಳು ಇಸ್ರೇಲ್‌ಗೆ ಹಾರಾಟ ನಡೆಸುವುದನ್ನು ಸಾಮಾನ್ಯವಾಗಿ ನಿರ್ಬಂಧಿಸಲಾಗುತ್ತದೆ. ಓಮನ್‌ಗೆ ಇಸ್ರೇಲ್‌ನೊಂದಿಗೆ ರಾಜತಾಂತ್ರಿಕ ಸಂಬಂಧವಿಲ್ಲ.
ಶಂಕಿತ ಸಹ ಪೈಲಟ್‌ನ ಗುರುತನ್ನು ಅಧಿಕೃತವಾಗಿ ಬಹಿರಂಗಪಡಿಸಲಾಗಿಲ್ಲ. ವಿಮಾನದೊಳಗೆ ದಂತವೈದ್ಯ ಶೋಟಾ ಮುಸಾಯೆವ್ ಚಿತ್ರೀಕರಿಸಿದ ವಿಡಿಯೋದಲ್ಲಿ, ಸಹ ಪೈಲಟ್ ಮೊಣಕಾಲೂರಿ ಕುಳಿತಿರುವುದು ಮತ್ತು ಆತನ ಕೈಗಳನ್ನು ಹಿಂದಕ್ಕೆ ಕಟ್ಟಿ ಹಾಕಿರುವುದು ಕಂಡು ಬಂದಿದೆ.
ವಿಮಾನದ ಕ್ಯಾಪ್ಟನ್ ಸ್ಮಿತ್ ಮಚ್ಚರ್ ಘಟನೆಯಲ್ಲಿ ಧೈರ್ಯ ತೋರಿದ ನಾಯಕ ಎಂದು ವ್ಯಾಪಕವಾಗಿ ಪ್ರಶಂಸಿಸಲ್ಪಟ್ಟಿದ್ದು, ಅವರು ಚೇತರಿಸಿಕೊಳ್ಳುತ್ತಿದ್ದಾರೆ ಎಂದು ಯುಎಇಯಲ್ಲಿರುವ ಭಾರತೀಯ ರಾಯಭಾರ ಕಚೇರಿ ಗುರುವಾರ ತಿಳಿಸಿದೆ. ಸಹ ಪೈಲಟ್ ಯಾವ ಆಯುಧ ಬಳಸಿದ್ದ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ.
ಸಹ ಪೈಲಟ್ ವಿಚಾರಣೆಯಲ್ಲಿ ಇಸ್ರೇಲಿ ತನಿಖಾಧಿಕಾರಿಗಳೂ ಭಾಗಿ
ಸಹ ಪೈಲಟ್‌ನ ವಿಚಾರಣೆಗೆ ನೆರವಾಗಲು ಇಸ್ರೇಲಿ ಗುಪ್ತಚರ ಮತ್ತು ಭದ್ರತಾ ಅಧಿಕಾರಿಗಳು ಸೌದಿ ಅರೇಬಿಯಾಗೆ ತೆರಳಿದ್ದಾರೆ ಎಂದು ಮತ್ತೊಬ್ಬ ಪ್ರಾದೇಶಿಕ ಅಧಿಕಾರಿ ತಿಳಿಸಿದ್ದಾರೆ.
ಶಂಕಿತನನ್ನು ತನಿಖೆಗಾಗಿ ಇಸ್ರೇಲ್‌ಗೆ ಕಳುಹಿಸುವಂತೆ ಇಸ್ರೇಲ್ ಮನವಿ ಮಾಡಿದೆ. ಆದರೆ ಈ ಮನವಿಯನ್ನು ಸೌದಿ ಅರೇಬಿಯಾ ಒಪ್ಪಿಕೊಳ್ಳುತ್ತದೆಯೇ ಎಂಬುದು ಸ್ಪಷ್ಟವಾಗಿಲ್ಲ.
ಸೌದಿ ಅರೇಬಿಯಾ ಮತ್ತು ಇಸ್ರೇಲ್ ನಡುವೆ ಅಧಿಕೃತ ರಾಜತಾಂತ್ರಿಕ ಸಂಬಂಧಗಳಿಲ್ಲ. ಆದರೂ ಭದ್ರತೆ ಮತ್ತು ಗುಪ್ತಚರ ವಿಚಾರಗಳಲ್ಲಿ ಉಭಯ ದೇಶಗಳು ಪರ್ಯಾಯ ಮಾರ್ಗಗಳ ಮೂಲಕ ಹಲವು ವರ್ಷಗಳಿಂದ ಸಹಕಾರ ನಡೆಸುತ್ತಿವೆ.
ಈ ನಡುವೆ ವಿಮಾನ ದಾಳಿಗೂ ಯಾವುದೇ ಭಯೋತ್ಪಾದಕ ಉದ್ದೇಶಕ್ಕೂ ಸಂಬಂಧವಿದೆಯೇ ಎಂಬುದನ್ನು ಪರಿಶೀಲಿಸಲು ಯುಎಇಯ ತನಿಖಾ ತಂಡವೂ ಕೆಲಸ ಆರಂಭಿಸಿದೆ. ವಿಮಾನ ಯುಎಇಯಲ್ಲಿ ನೋಂದಣಿಯಾಗಿರುವುದರಿಂದ ಮತ್ತು ವಿಮಾನದಲ್ಲಿನ ಅಪರಾಧಗಳಿಗೆ ಯುಎಇ ಕಾನೂನು ಅನ್ವಯಿಸುವುದರಿಂದ ತನಿಖೆಯಲ್ಲಿ ತನ್ನ ಅಧಿಕಾರವಿದೆ ಎಂದು ಯುಎಇ ಸರ್ಕಾರ ತಿಳಿಸಿದೆ.
ಇರಾನ್‌ನ ಯಾವುದೇ ಪಾತ್ರದ ಸುಳಿವು ಇದೆಯೇ ಎಂದು ನೆತನ್ಯಾಹು ಅವರನ್ನು ಕೇಳಿದಾಗ, ಈಗಲೇ ಎಲ್ಲವನ್ನೂ ಹೇಳಲು ಸಾಧ್ಯವಿಲ್ಲ ಎಂದು ತಿಳಿಸಿದ್ದಾರೆ.
ಟ್ರಂಪ್ ಕೂಡ ನೆತನ್ಯಾಹು ಅವರೊಂದಿಗೆ ಈ ಘಟನೆಯ ಕುರಿತು ದೀರ್ಘವಾಗಿ ದೂರವಾಣಿ ಮೂಲಕ ಚರ್ಚಿಸಿರುವುದಾಗಿ ಹೇಳಿದ್ದಾರೆ.
ಸಹ ಪೈಲಟ್ “ಭಯೋತ್ಪಾದಕನಾಗಿರಬಹುದು ಅಥವಾ ಮಾನಸಿಕವಾಗಿ ಅಸ್ಥಿರ ವ್ಯಕ್ತಿಯಾಗಿರಬಹುದು” ಎಂದು ಅವರು ತಿಳಿಸಿದ್ದಾರೆ.
ಓಮನ್ ಸರ್ಕಾರ ಈ ಕುರಿತು ಯಾವುದೇ ಅಧಿಕೃತ ಪ್ರತಿಕ್ರಿಯೆ ನೀಡಿಲ್ಲ. ಇಸ್ರೇಲ್‌ಗೆ ದಾಳಿಯ ಕುರಿತು ಯಾವುದೇ ನಿರ್ದಿಷ್ಟ ಮುನ್ನೆಚ್ಚರಿಕೆ ಮಾಹಿತಿ ಬಂದಿರಲಿಲ್ಲ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಇತ್ತೀಚಿನ ದಿನಗಳಲ್ಲಿ ಇಸ್ರೇಲ್‌ನಲ್ಲಿ ಭದ್ರತಾ ಬೆದರಿಕೆ ಹೆಚ್ಚಾಗಿರುವ ಬಗ್ಗೆ ನೆತನ್ಯಾಹು ಎಚ್ಚರಿಕೆ ನೀಡಿದ್ದರು. ಆದರೆ ನಿರ್ದಿಷ್ಟ ದಾಳಿಯ ಬಗ್ಗೆ ಯಾವುದೇ ಮುನ್ನೆಚ್ಚರಿಕೆ ಮಾಹಿತಿ ಬಂದಿರಲಿಲ್ಲ ಎಂದು ಅವರು ಸಿಎನ್‌ಎನ್‌ಗೆ ತಿಳಿಸಿದ್ದಾರೆ.
ಹಮಾಸ್ ನೇತೃತ್ವದ 2023ರ ಅಕ್ಟೋಬರ್ 7ರ ದಾಳಿಯ ವಾರ್ಷಿಕೋತ್ಸವಕ್ಕೆ ಇಸ್ರೇಲ್ ಸಿದ್ಧವಾಗುತ್ತಿರುವ ಸಂದರ್ಭದಲ್ಲೇ ಈ ಘಟನೆ ನಡೆದಿದೆ. ಈ ದಾಳಿಯ ಬಳಿಕ ಗಾಜಾದಲ್ಲಿ ಯುದ್ಧ ಆರಂಭವಾಗಿತ್ತು.
ವಿಮಾನದಲ್ಲಿದ್ದವರಲ್ಲಿ ಬಹುತೇಕರು ಇಸ್ರೇಲಿಯರಾಗಿದ್ದು, ಭಾರತ ಮತ್ತು ಯುಎಇಯ ಪ್ರಯಾಣಿಕರೂ ಇದ್ದರು ಎಂದು ಇಸ್ರೇಲ್ ವಿದೇಶಾಂಗ ಸಚಿವಾಲಯ ತಿಳಿಸಿದೆ. ನಾಲ್ವರು ಪ್ರಯಾಣಿಕರು ಅಮೆರಿಕದ ನಾಗರಿಕರಾಗಿದ್ದರು ಎಂದು ಅಮೆರಿಕದ ವಿದೇಶಾಂಗ ಇಲಾಖೆ ತಿಳಿಸಿದೆ.
ಘಟನೆಯ ಬಳಿಕ ಇಸ್ರೇಲ್‌ಗೆ ತೆರಳುವ ಮತ್ತು ಅಲ್ಲಿಂದ ಹೊರಡುವ ತನ್ನ ವಿಮಾನ ಸೇವೆಗಳನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸುವುದಾಗಿ ಫ್ಲೈದುಬೈ ತಿಳಿಸಿದೆ. ದುಬೈನಲ್ಲಿ ಸಿಲುಕಿರುವ ಇಸ್ರೇಲಿಯರನ್ನು ಸ್ವದೇಶಕ್ಕೆ ಕರೆತರಲು ವ್ಯವಸ್ಥೆ ಮಾಡುವುದಾಗಿ ನೆತನ್ಯಾಹು ಹೇಳಿದ್ದಾರೆ.
ಕಾಕ್‌ಪಿಟ್‌ನಿಂದ ತುರ್ತು ಸಂಕೇತ
ವಿಮಾನ ಅಸ್ಥಿರವಾಗಿ ಹಾರುತ್ತಿದ್ದ ಸಂದರ್ಭದಲ್ಲಿ ಕಾಕ್‌ಪಿಟ್‌ನಿಂದ ಎರಡು ನಾಲ್ಕಂಕಿಯ ತುರ್ತು ಸಂಕೇತಗಳನ್ನು ರಹಸ್ಯವಾಗಿ ಕಳುಹಿಸಲಾಗಿತ್ತು ಎಂದು ಫ್ಲೈಟ್‌ರಾಡಾರ್24 ವರದಿ ಮಾಡಿದೆ.
ಮೊದಲ ಸಂಕೇತ “7700” ಆಗಿದ್ದು, ಇದು ಸಾಮಾನ್ಯ ತುರ್ತು ಪರಿಸ್ಥಿತಿಯ ಸಂಕೇತವಾಗಿದೆ. ಬಳಿಕ “7500” ಸಂಕೇತ ಕಳುಹಿಸಲಾಗಿದ್ದು, ಇದು ವಿಮಾನದಲ್ಲಿ ಅಕ್ರಮ ಹಸ್ತಕ್ಷೇಪ ಅಥವಾ ಸಂಭವನೀಯ ಅಪಹರಣವನ್ನು ಸೂಚಿಸುತ್ತದೆ.
ರೇಡಿಯೋ ಮೂಲಕ ಮಾತನಾಡಲು ಸಾಧ್ಯವಾಗದ ಅಥವಾ ಮಾತನಾಡುವುದು ಸೂಕ್ತವಲ್ಲದ ಸಂದರ್ಭಗಳಲ್ಲಿ ಪೈಲಟ್‌ಗಳು ಇಂತಹ ಸಂಕೇತಗಳನ್ನು ಬಳಸುತ್ತಾರೆ.
ವಿಮಾನದಲ್ಲಿದ್ದ ಪ್ರಯಾಣಿಕರೊಬ್ಬರ ಪ್ರಕಾರ, ಪ್ರಯಾಣಿಕರಾಗಿ ವಿಮಾನದಲ್ಲಿದ್ದ ಇಬ್ಬರು ಪೈಲಟ್‌ಗಳು ಅಂತಿಮವಾಗಿ ವಿಮಾನವನ್ನು ಇಳಿಸಿದರು. ಅವರು ಆರನೇ ಸಾಲಿನಲ್ಲಿ ಕುಳಿತಿದ್ದರು ಮತ್ತು ಏಳನೇ ಸಾಲಿನಲ್ಲಿ ತಾನು ಕುಳಿತಿದ್ದೆ ಎಂದು ಪ್ರಯಾಣಿಕ ಯಾನಿವ್ ಹಯೂನ್ ತಿಳಿಸಿದ್ದಾರೆ.
ಆದರೆ, ವಿಮಾನವನ್ನು ಯಾರು ಇಳಿಸಿದರು ಎಂಬುದರ ಕುರಿತು ಫ್ಲೈದುಬೈ ನಿಖರ ವಿವರ ನೀಡದೆ, “ವಿಮಾನದಲ್ಲಿದ್ದ ಇತರರು” ವಿಮಾನ ಇಳಿಸಲು ನೆರವಾದರು ಎಂದು ಮಾತ್ರ ಹೇಳಿದೆ.
33 ಸಾವಿರ ಅಡಿಯಿಂದ 17 ಸಾವಿರ ಅಡಿಗೆ ಕುಸಿತ
ಘಟನೆ ಆರಂಭವಾದ ಸುಮಾರು ಎರಡೂವರೆ ಗಂಟೆಗಳ ಬಳಿಕ ವಿಮಾನವು ಸುಮಾರು 33,000 ಅಡಿ ಎತ್ತರದಿಂದ ಕೇವಲ ಒಂದು ನಿಮಿಷದಲ್ಲಿ 17,000 ಅಡಿಗೆ ಕುಸಿದಿತ್ತು ಎಂದು ಫ್ಲೈಟ್‌ರಾಡಾರ್24 ತಿಳಿಸಿದೆ.
ಬಳಿಕ ಸೌದಿ ಅರೇಬಿಯಾ ಮತ್ತು ಜೋರ್ಡಾನ್ ಗಡಿಯ ಸಮೀಪ ವಿಮಾನ ಅಸ್ಥಿರವಾಗಿ ಸುತ್ತು ಹೊಡೆದು, ಕೊನೆಗೆ ಸೌದಿ ಅರೇಬಿಯಾದ ತಬೂಕ್‌ನಲ್ಲಿ ಇಳಿಯಿತು.
ವಿಮಾನವನ್ನು ಇಂತಹ ತೀವ್ರ ವೇಗದ ಇಳಿಕೆಗೆ ವಿನ್ಯಾಸಗೊಳಿಸಲಾಗಿಲ್ಲ. ಆದರೂ ಅದು ಸಂಪೂರ್ಣವಾಗಿ ಛಿದ್ರವಾಗದೆ ಸುರಕ್ಷಿತವಾಗಿ ಇಳಿದಿರುವುದು “ಪವಾಡದಂತಿದೆ” ಎಂದು ಭಾರತೀಯ ಕ್ಯಾಪ್ಟನ್ ತರಬೇತಿ ಪಡೆದ ನ್ಯೂಜಿಲೆಂಡ್‌ನ ವಿಮಾನ ತರಬೇತಿ ಶಾಲೆಯ ಮುಖ್ಯಸ್ಥ ಫಿಲಿಪ್ ಕೀನ್ ಹೇಳಿದ್ದಾರೆ.
ವಿಮಾನ ಇಳಿಸಲು ಸೂಕ್ತ ಸ್ಥಳ ಹುಡುಕುವ ವೇಳೆ ಸೌದಿ ಅರೇಬಿಯಾ ಮತ್ತು ಜೋರ್ಡಾನ್ ವಿಮಾನಕ್ಕೆ ಇಳಿಯಲು ಅವಕಾಶ ನೀಡಲಿಲ್ಲ ಎಂದು ವಿಮಾನ ನಿಯಂತ್ರಣ ಸಂವಹನವನ್ನು ಆಲಿಸಿದ್ದ ವ್ಯಕ್ತಿಯೊಬ್ಬರು ತಿಳಿಸಿದ್ದಾರೆ. ಕೊನೆಗೆ ಪ್ರಯಾಣಿಕರ ಕಿರುಚಾಟದ ನಡುವೆ ವಿಮಾನ ಸೌದಿ ಅರೇಬಿಯಾದ ತಬೂಕ್‌ನಲ್ಲಿ ಇಳಿಯಿತು.
ವಿಮಾನದಿಂದ ಪೈಲಟ್‌ನ ಧ್ವನಿ ನಡುಗುತ್ತಿದ್ದು, ಅವರು “ಮೇಡೇ” ಎಂದು ಕೂಗಿ ವಿಮಾನ ಅಪಹರಣ ನಡೆಯುತ್ತಿದೆ ಎಂದು ವಾಯು ಸಂಚಾರ ನಿಯಂತ್ರಣಕ್ಕೆ ಮಾಹಿತಿ ನೀಡಿದ್ದರು ಎಂದು ಆ ವ್ಯಕ್ತಿ ತಿಳಿಸಿದ್ದಾರೆ. ವಿಮಾನ ಇಳಿಯಲು ಸೌದಿ ಅರೇಬಿಯಾ ಮತ್ತು ಜೋರ್ಡಾನ್ ಏಕೆ ನಿರಾಕರಿಸಿದ್ದವು ಎಂಬುದು ತಕ್ಷಣಕ್ಕೆ ಸ್ಪಷ್ಟವಾಗಿಲ್ಲ.