ಮೈಕೋಲೈವ್: ಅಮೆರಿಕದ ಪ್ರಥಮ ಮಹಿಳೆ ಮೆಲಾನಿಯಾ ಟ್ರಂಪ್ ನೇತೃತ್ವದ ಮಾನವೀಯ ನೆರವು ಕಾರ್ಯಾಚರಣೆಗೆ ಅವಕಾಶ ಕಲ್ಪಿಸುವ ಉದ್ದೇಶದಿಂದ ರಷ್ಯಾ ಮತ್ತು ಉಕ್ರೇನ್ ನಡುವಿನ ಸ್ಥಳೀಯ ಕದನ ವಿರಾಮ ಮಂಗಳವಾರ ಮುಂಜಾನೆ ಜಾರಿಗೆ ಬಂದಿದೆ. ಆದರೆ, ಇದೇ ಸಂದರ್ಭದಲ್ಲಿ ಉಕ್ರೇನ್ ರಾಜಧಾನಿ ಕೀವ್ ಮೇಲೆ ಮತ್ತೆ ಕ್ಷಿಪಣಿ ದಾಳಿಗಳು ನಡೆದಿವೆ.
ಉಕ್ರೇನ್ ಕಾಲಮಾನ ಪ್ರಕಾರ ಮಂಗಳವಾರ ಮುಂಜಾನೆ 3 ಗಂಟೆಯಿಂದ ಸ್ಥಳೀಯ ಕದನ ವಿರಾಮ ಆರಂಭವಾಗಿದೆ.
ರಷ್ಯಾ ಆಕ್ರಮಿತ ದಕ್ಷಿಣ ಉಕ್ರೇನ್‌ನ ಒಲೇಶ್ಕಿ ಪಟ್ಟಣಕ್ಕೆ ಈ ವಾರದ ಕೊನೆಯಲ್ಲಿ ಮಾನವೀಯ ನೆರವು ತಲುಪಿಸಲು ಅವಕಾಶ ಕಲ್ಪಿಸುವುದು ಇದರ ಉದ್ದೇಶವಾಗಿದೆ.
ಮೆಲಾನಿಯಾ ಟ್ರಂಪ್ ಅವರು ವಿಶ್ವಸಂಸ್ಥೆಯ ಅಧಿಕಾರಿಗಳನ್ನು ಭೇಟಿಯಾಗಿ, ಒಲೇಶ್ಕಿ ಪಟ್ಟಣದ ಪರಿಸ್ಥಿತಿಯ ಕುರಿತು ಮಾಹಿತಿ ಪಡೆದಿದ್ದರು. ಬಳಿಕ ರಷ್ಯಾ ಮತ್ತು ಉಕ್ರೇನ್‌ನ ನಾಗರಿಕ ಸಂಧಾನಕಾರರೊಂದಿಗೆ ಮಾತುಕತೆ ನಡೆಸಿದ್ದರು ಎಂದು ಅವರ ಕಚೇರಿ ತಿಳಿಸಿದೆ.
ನಾಲ್ಕೂವರೆ ವರ್ಷಕ್ಕೂ ಹೆಚ್ಚು ಕಾಲದಿಂದ ನಡೆಯುತ್ತಿರುವ ಯುದ್ಧವನ್ನು ಅಂತ್ಯಗೊಳಿಸುವ ಉದ್ದೇಶದಿಂದ ಮುಂದಿನ ತಿಂಗಳು ರಷ್ಯಾ ಮತ್ತು ಉಕ್ರೇನ್ ನಡುವೆ ಅಮೆರಿಕದ ಮಧ್ಯಸ್ಥಿಕೆಯಲ್ಲಿ ಮತ್ತೊಂದು ಸುತ್ತಿನ ಮಾತುಕತೆ ನಡೆಯುವ ನಿರೀಕ್ಷೆಯಿದೆ.
ಒಲೇಶ್ಕಿಯಲ್ಲಿ ಸುಮಾರು 2,000 ಜನರು ಆಹಾರ ಮತ್ತು ಔಷಧಗಳ ಕೊರತೆಯ ನಡುವೆ ಸಿಲುಕಿಕೊಂಡಿದ್ದು, ಆ ಪ್ರದೇಶದಲ್ಲಿ ಸ್ಫೋಟಕ ನೆಲಬಾಂಬ್‌ಗಳು ಹಾಗೂ ಡ್ರೋನ್ ದಾಳಿಗಳ ಅಪಾಯ ಇರುವುದರಿಂದ ಅವರಿಗೆ ಅಲ್ಲಿಂದ ಹೊರಬರಲು ಸಾಧ್ಯವಾಗುತ್ತಿಲ್ಲ ಎಂದು ತಿಳಿದುಬಂದಿದೆ.
ಕದನ ವಿರಾಮ ಜಾರಿಗೆ ಬಂದಿದೆ ಎಂದು ರಷ್ಯಾ ಮತ್ತು ಉಕ್ರೇನ್‌ನ ಸಂಧಾನಕಾರರು ಪ್ರತ್ಯೇಕ ಹೇಳಿಕೆಗಳಲ್ಲಿ ದೃಢಪಡಿಸಿದ್ದಾರೆ.
ಉಭಯ ದೇಶಗಳ ನಡುವಿನ ತೀವ್ರ ಅಪನಂಬಿಕೆಯಿಂದಾಗಿ ಈ ಹಿಂದಿನ ಕದನ ವಿರಾಮ ಪ್ರಯತ್ನಗಳು ವಿಫಲವಾಗಿದ್ದರೂ, ಈ ಬಾರಿ ಸ್ಥಳೀಯ ಕದನ ವಿರಾಮ ಶನಿವಾರದವರೆಗೆ ಅಥವಾ ಅದಕ್ಕಿಂತ ಹೆಚ್ಚಿನ ಅವಧಿಗೆ ಮುಂದುವರಿಯುವ ನಿರೀಕ್ಷೆಯಿದೆ.
ಆದರೆ, ಕದನ ವಿರಾಮ ಆರಂಭವಾದ ಕೆಲವೇ ನಿಮಿಷಗಳಲ್ಲಿ ಕೀವ್‌ನಲ್ಲಿ ಹಲವು ಬ್ಯಾಲಿಸ್ಟಿಕ್ ಕ್ಷಿಪಣಿಗಳು ಸ್ಫೋಟಗೊಂಡಿವೆ. ದೇಶದ ವಿವಿಧ ಭಾಗಗಳಲ್ಲಿ ವಾಯುದಾಳಿ ಎಚ್ಚರಿಕೆಗಳು ಮೊಳಗಿವೆ ಎಂದು ವರದಿಗಳಿಂದ ತಿಳಿದುಬಂದಿದೆ.
ಸೋಮವಾರ ತಡರಾತ್ರಿಯೂ ಕೀವ್ ಮೇಲೆ ದಾಳಿ ನಡೆದಿತ್ತು. ರಷ್ಯಾದ ಬ್ಯಾಲಿಸ್ಟಿಕ್ ಕ್ಷಿಪಣಿಗಳು ನಗರದ ವಿಶ್ವವಿದ್ಯಾಲಯವೊಂದರ ಆವರಣಕ್ಕೆ ಹಾನಿ ಮಾಡಿದ್ದು, ಹಲವರು ಗಾಯಗೊಂಡಿದ್ದರು.
ಈ ದಾಳಿಯ ಬಳಿಕ ಆನ್‌ಲೈನ್‌ನಲ್ಲಿ ಪ್ರತಿಕ್ರಿಯಿಸಿದ ಉಕ್ರೇನ್ ಅಧ್ಯಕ್ಷ ವೊಲೊಡಿಮಿರ್ ಝೆಲೆನ್‌ಸ್ಕಿ, “ರಷ್ಯಾ ಕೊಲ್ಲುವ ಮತ್ತು ಯುದ್ಧವನ್ನು ಮುಂದುವರಿಸುವ ಬಯಕೆಯನ್ನು ಮಾತ್ರ ಹೊಂದಿದೆ ಎಂಬುದನ್ನು ಜಗತ್ತು ನೋಡುವುದು ಮುಖ್ಯ ಎಂದು ಬರೆದಿದ್ದಾರೆ.
ಒಲೇಶ್ಕಿ ಪಟ್ಟಣವು ಭಾಗಶಃ ಆಕ್ರಮಿತ ಖೆರ್ಸನ್ ಪ್ರದೇಶದಲ್ಲಿದ್ದು, ಉಕ್ರೇನ್ ರಾಜಧಾನಿ ಕೀವ್‌ನಿಂದ ಸುಮಾರು 550 ಕಿಲೋಮೀಟರ್ ಆಗ್ನೇಯದಲ್ಲಿದೆ. ಡ್ನಿಪ್ರೊ ನದಿ ಈ ಪ್ರದೇಶದಲ್ಲಿ ರಷ್ಯಾ ಮತ್ತು ಉಕ್ರೇನ್ ಪಡೆಗಳನ್ನು ಪ್ರತ್ಯೇಕಿಸುತ್ತದೆ.
2022ರಲ್ಲಿ ಉಕ್ರೇನ್ ಮೇಲೆ ರಷ್ಯಾ ಪೂರ್ಣ ಪ್ರಮಾಣದ ಆಕ್ರಮಣ ಆರಂಭಿಸಿದ ಮೊದಲ ದಿನವೇ ಒಲೇಶ್ಕಿಯನ್ನು ರಷ್ಯಾ ಪಡೆಗಳು ವಶಪಡಿಸಿಕೊಂಡಿದ್ದವು. 2023ರ ಜೂನ್‌ನಲ್ಲಿ ಅಣೆಕಟ್ಟು ಒಡೆದ ಪರಿಣಾಮ ಪ್ರವಾಹ ಉಂಟಾಗಿ ಪಟ್ಟಣಕ್ಕೆ ಮತ್ತೊಂದು ಭಾರಿ ಸಂಕಷ್ಟ ಎದುರಾಗಿತ್ತು.
ಒಲೇಶ್ಕಿ, ಖೆರ್ಸನ್ ಪ್ರದೇಶದ ಆಡಳಿತ ಕೇಂದ್ರವಾಗಿರುವ ಖೆರ್ಸನ್ ನಗರದ ಎದುರು ಡ್ನಿಪ್ರೊ ನದಿಯ ಆಚೆ ಇದೆ. 2022ರ ಆಕ್ರಮಣದ ಆರಂಭಿಕ ಹಂತದಲ್ಲಿ ರಷ್ಯಾ ಪಡೆಗಳು ಖೆರ್ಸನ್ ನಗರವನ್ನು ವಶಪಡಿಸಿಕೊಂಡಿದ್ದವು. ಆದರೆ, ಕೆಲವು ತಿಂಗಳ ಬಳಿಕ ನದಿಯ ಆಚೆಗೆ ಹಿಂತಿರುಗಿದ್ದವು.
ಮಾನವೀಯ ನೆರವು ಕಾರ್ಯಾಚರಣೆಯಲ್ಲಿ ಪಾಲ್ಗೊಳ್ಳುವ ಸಂಧಾನಕಾರರ ಪ್ರಕಾರ, ಒಲೇಶ್ಕಿಗೆ ವೈದ್ಯರು, ಔಷಧಗಳು, ಆಹಾರ ಸಾಮಗ್ರಿಗಳು ಮತ್ತು ಕುಡಿಯುವ ನೀರನ್ನು ತಲುಪಿಸಲಾಗುತ್ತದೆ. ಬಳಿಕ ಅಲ್ಲಿನ ಜನರನ್ನು ಸುರಕ್ಷಿತವಾಗಿ ಸ್ಥಳಾಂತರಿಸಲು ಮಾರ್ಗಗಳನ್ನು ತೆರೆಯುವ ಯೋಜನೆ ಇದೆ ಎಂದು ತಿಳಿಸಿದ್ದಾರೆ.