ಟೋಕ್ಯೋ: ಚೀನಾ ದೇಶ ಆರ್ಥಿಕ ಬೆಳವಣಿಗೆಯಲ್ಲಿ ಇತ್ತೀಚಿನ ದಿನಗಳಲ್ಲಿ ಕುಸಿಯುತ್ತಿದ್ದು, ಬೇರೆ ದೇಶಗಳು ಆ ಸ್ಥಾನವನ್ನು ತುಂಬಲು ವಿಶ್ವ ಬಯಸುತ್ತಿದ್ದು, ಭಾರತ ವಿತ್ತೀಯ ಕೊರತೆಯನ್ನು ಹೋಗಲಾಡಿಸಲು ಯೋಜಿತವಾಗಿ ಮೂಲಭೂತ ಸೌಕರ್ಯಗಳಿಗೆ ಖರ್ಚು ಮಾಡಿದರೆ ಪ್ರಬಲ ಆರ್ಥಿಕ ರಾಷ್ಟ್ರವಾಗಿ ಹೊಮ್ಮಲು ಸಾಧ್ಯ ಎಂದು ಹಣಕಾಸು ಸಚಿವ ಅರುಣ್ ಜೇಟ್ಲಿ ಹೇಳಿದ್ದಾರೆ.
ಟೋಕ್ಯೋದಲ್ಲಿ ಅವರು ನಿಕ್ಕಿ ಇಂಕ್ ಆಯೋಜಿಸಿದ್ದ ಏಷ್ಯಾದ ಭವಿಷ್ಯ ಕುರಿತ ಸಮ್ಮೇಳನದಲ್ಲಿ ಮಾತನಾಡಿ, ಕಳೆದ ಕೆಲ ವರ್ಷಗಳಲ್ಲಿ ಜಗತ್ತಿನ ಶೇಕಡಾ 50ರಷ್ಟು ಆರ್ಥಿಕ ಬೆಳವಣಿಗೆ ಚೀನಾದಲ್ಲಿ ಆಗಿತ್ತು. ಆದರೆ ಈಗ ಅಲ್ಲಿ ಆರ್ಥಿಕ ಬೆಳವಣಿಗೆ ಕುಂಠಿತವಾಗುತ್ತಿದ್ದು, ಬೇರೆ ರಾಷ್ಟ್ರಗಳು ಅದರ ಸ್ಥಾನವನ್ನು ತುಂಬಬೇಕಾಗಿದೆ.
ನಮ್ಮ ದೇಶದಲ್ಲಿ ಮೂಲಭೂತ ಸೌಕರ್ಯ ಕೊರತೆಯಿದೆ. ಅದನ್ನು ಸುಧಾರಿಸಿ ಖರ್ಚುವೆಚ್ಚವನ್ನು ನಿಭಾಯಿಸಿಕೊಂಡರೆ ವಿಶ್ವದಲ್ಲಿಯೇ ಪ್ರಬಲ ಆರ್ಥಿಕ ದೇಶವಾಗಿ ಹೊರಹೊಮ್ಮಲು ಸಾಧ್ಯವಿದೆ ಎಂದರು.
6 ದಿನಗಳ ಜಪಾನ್ ಭೇಟಿಯಲ್ಲಿರುವ ಜೇಟ್ಲಿಯವರು, ಯಾವ ದೇಶವೂ ಇನ್ನೊಂದು ದೇಶವನ್ನು ಬದಲಿ ತುಂಬಲು ಸಾಧ್ಯವಿಲ್ಲ. ಪ್ರಮುಖ ಆರ್ಥಿಕತೆಯ ಹುಟ್ಟುವಿಕೆಗೆ ವಿಶ್ವದಲ್ಲಿ ಸಾಕಷ್ಟು ಅವಕಾಶವಿದೆ ಎಂದು ನುಡಿದರು.
