ಮುಂಬೈ: ಮಂಗಳೂರಿನ ಬೆಡಗಿ, ಬಾಲಿವುಡ್ ತಾರೆ, ಮಾಜಿ ವಿಶ್ವಸುಂದರಿಯಾದ ಐಶ್ವರ್ಯಾ ರೈ ಬಚ್ಚನ್ ಇಂದು 44ನೇ ಹುಟ್ಟು ಹಬ್ಬ ಆಚರಿಸಿಕೊಳ್ಳುತ್ತಿದ್ದಾರೆ. ಕಳೆದ ಮಾರ್ಚ್ ನಲ್ಲಿ ತಂದೆ ಕೃಷ್ಣ ರಾಜ್ ರೈ ನಿಧನರಾದ ಹಿನ್ನೆಲೆಯಲ್ಲಿ ಐಶ್ವರ್ಯ ಈ ಬಾರಿ ಅದ್ದೂರಿ ಹುಟ್ಟು ಹಬ್ಬ ಆಚರಣೆ ಮಾಡುವುದಿಲ್ಲ ಎನ್ನಲಾಗಿದೆ.
ಇಂದು ಇಡೀ ದಿನವನ್ನು ಐಶ್ವರ್ಯ ತಮ್ಮ ತಾಯಿ ಹಾಗೂ ಕುಟುಂಬದವರೊದನೆ ಕಳೆಯಲಿದ್ದಾರೆ ಎಂದು ಅವರ ಆಪ್ತ ವಲಯ ತಿಳಿಸಿದೆ. ಪತಿ ಅಭಿಷೇಕ್ ಹಾಗೂ ಮಗಳು ಆರಾಧ್ಯ, ಐಶ್ವರ್ಯ ಗಾಗಿ ಕೇಕ್ ತರಿಸಲಿದ್ದು ಸಂಜೆ ವೇಳೆಗೆ ಐಶ್ವರ್ಯ ಕೇಕ್ ಕತ್ತರಿಸಿ ತಮ್ಮ ಹುಟ್ಟು ಹಬ್ಬವನ್ನು ಸರಳ ರೀತಿಯಲ್ಲಿ ಆಚರಿಸಿಕೊಳ್ಳಲಿದ್ದಾರೆ.
ನ.1 1973ರಂದು ಮಂಗಳೂರಿನಲ್ಲಿ ಕೃಷ್ಣರಾಜ್ ರೈ ಮತ್ತು ತಾಯಿ ಬೃಂದಾ ರೈದಂಪತಿಗಳ ಮಗಳಾಗಿ ಜನಿಸಿದ ಐಶ್ವರ್ಯ ಮುಂಬೈ ನ ರೂಪಾರೆಲ್ ಕಾಲೇಜ್ ಮತ್ತು ಆರ್ಯ ವಿದ್ಯಾ ಕಾಲೇಜಿನಲ್ಲಿ ವಿದ್ಯಾಭ್ಯಾಸ ನಡೆಸಿದ್ದರು. ತಾವು 9ನೇ ತರಗತಿಯಲ್ಲಿದ್ದಾಗ ಕ್ಯಾಮೆಲಿನ್ ಸಂಸ್ಥೆಗೆ ಮಾಡೆಲ್ ಆಗಿ ಆಯ್ಕೆಯಾಗಿದ್ದ ಈಕೆ 1994ರಲ್ಲಿ ವಿಶ್ವ ಸುಂದರಿ ಪ್ರಶಸ್ತಿ ಗಳಿಸಿ ಪ್ರಸಿದ್ದರಾದರು. ಅನೇಕ ಬಾಲಿವುಡ್ ಚಿತ್ರಗಳಲ್ಲಿ ನಟಿಸಿದ್ದ ಐಶ್ವರ್ಯ 2007ರಲ್ಲಿ ಬಾಲಿವುಡ್ ನಟ ಅಭಿಷೇಕ್ ಬಚ್ಚನ್ ಅವರನ್ನು ವಿವಾಹವಾಗಿ 2011ರ ನ.16ರಂದು ಆರಾಧ್ಯಳಿಗೆ ತಾಯಿಯಾಗಿದ್ದಾರೆ.
