ಬಾಲಿವುಡ್ ನಟಿ ದಿಯಾ ಮಿರ್ಜಾಗೆ ಹನಿಮೂನ್ ಗೂ ಸಮಯವಿಲ್ಲ

ನವದೆಹಲಿ: ತನ್ನ ಬಹುದಿನದ ಗೆಳೆಯ ಸಾಹಿಲ್ ಸಂಗ ರವರನ್ನು ಇತ್ತೀಚೆಗಷ್ಟೇ ಮದುವೆಯಾದ ದಿಯಾ ಮಿರ್ಜಾ ಮದುವೆಯ ನಂತರವೂ ಬ್ಯುಸಿ. ಈ ದಂಪತಿಗಳು ಈಗಾಗಲೇ ಪೂರ್ವನಿಯೋಜಿತ ಕೆಲಸಗಳಲ್ಲಿ ಕಾರ್ಯನಿರತರಾಗಿರುವುದರಿಂದ ತಮ್ಮ ಹನಿಮೂನ್ ಯೋಜನೆಯನ್ನು ಹಾಕಿಕೊಂಡಿಲ್ಲವಂತೆ.

೩೨ ವರ್ಷದ ನಟಿಯ ಪತಿಯಷ್ಟೇ ಅಲ್ಲದೆ ಸಾಹಿಲ್, ೨೦೧೧ ರಲ್ಲಿ ಪ್ರಾರಂಭವಾದ 'ಬಾರ್ನ್ ಫ್ರೀ ಎಂಟರ್ಟೈನ್ಮೆಂಟ್" ಎಂಬ ನಿರ್ಮಾಣ ಸಂಸ್ಥೆಯಲ್ಲಿ ದಿಯಾ ಮಿರ್ಜಾ ಅವರ ಪಾಲುದಾರ ಕೂಡ. ಈ ಸಂಸ್ಥೆಯಡಿ 'ಲವ್ ಬ್ರೇಕ್ ಅಪ್ಸ್ ಜಿಂದಗಿ' ಮತ್ತು 'ಬಾಬಿ ಜಾಸೂಸ್' ಎಂಬ ಎರಡು ಸಿನೆಮಾಗಳನ್ನು ಒಟ್ಟಿಗೆ ನಿರ್ಮಿಸಿದ್ದಾರೆ.

"ಯುವ ಜೋಡಿಗಳು ಕೆಲಸದಿಂದ ಸಮಯ ಬಿಡುವು ಮಾಡಿಕೊಂಡು ಹನಿಮೂನಿಗೆ ಹೋಗಬೇಕೆಂಬುದು ಜನರ ಒತ್ತಾಸೆ. ಆದರೆ ಸದ್ಯಕ್ಕೆ ನಾನು ಮತ್ತು ಸಾಹಿಲ್ ಕೆಲಸದಲ್ಲಿ ಒಳ್ಳೆಯ ಸಮಯ ಕಳೆಯುತ್ತಿದ್ದೇವೆ. ಇಬ್ಬರೂ ಉತ್ಸಾಹದಿಂದ ಇದ್ದೇವೆ. ಆದುದರಿಂದ ರಜೆಯ ಬಗ್ಗೆ ಯಾವುದೇ ಯೋಚನೆ ಸದ್ಯಕ್ಕಿಲ್ಲ" ಎಂದಿದ್ದಾರೆ ದಿಯಾ.