ರಾಕೆಟ್ ಸೇರಿದಂತೆ ನಾಳೆ ನಾಲ್ಕು ಚಿತ್ರಗಳ ಬಿಡುಗಡೆ

ಬೆಂಗಳೂರು: ಸಿನೆಮಾ ಬಿಡುಗಡೆಯ ದೀಪಾವಳಿ ಈ ವಾರವೂ ಮುಂದುವರೆದಿದೆ. ಕಳೆದ ಎರಡು ವಾರಗಳಲ್ಲಿ ೧೦ ಚಿತ್ರಗಳು ಬಿಡುಗಡೆಯಾಗಿದ್ದು ಈ ವಾರವೂ ಕನಿಷ್ಠ ೪ ಚಿತ್ರಗಳು ಬಿಡುಗಡೆಗೆ ಸಿದ್ಧವಾಗಿವೆ. ರಾಕೆಟ್, ದ ಪ್ಲ್ಯಾನ್, ಅಲೋನ್ ಮತ್ತು ಫರ್ಸ್ಟ್ ರ್ಯಾಂಕ್ ರಾಜು ಬಿಡುಗಡೆಯಾಗುತ್ತಿರುವ ಚಿತ್ರಗಳು.

ರಾಕೆಟ್: ಮೊದಲ ಬಾರಿಗೆ ನೀನಾಸಿಂ ಸತೀಶ್ ನಿರ್ಮಾಣಕ್ಕೆ ಇಳಿದಿರುವ ಚಿತ್ರವಿದು. ಶಿವಶಶಿ ನಿರ್ದೇಶನದ ಈ ಆಕ್ಷನ್-ರೊಮ್ಯಾಂಟಿಕ್ ಚಿತ್ರದಲ್ಲಿ ಸತೀಶ್ ಜೊತೆ ಐಶಾನಿ ಶೆಟ್ಟಿ ನಟಿಸಿದ್ದು, ಪೂರ್ಣಚಂದ್ರ ತೇಜಸ್ವಿ ಅವರ ಸಂಗೀತ ಇದೆ.

ದಿ ಪ್ಲ್ಯಾನ್: ಅನಂತನಾಗ್ ಅವರಿಗೆ ಇದು ಪರ್ವ ಕಾಲ. ಹಲವಾರು ಸಿನೆಮಾಗಳಲ್ಲಿ ಮುಖ್ಯ ನಟರಾಗಿ ಕಾಣಿಸಿಕೊಳ್ಳುತ್ತಿರುವ ಸಮಯದಲ್ಲಿ ಮತ್ತೀಗ ಜೈಲ್ ಬ್ರೇಕ್ ಸಿನೆಮಾವೊಂದರಲ್ಲಿ ಕಾಣಿಸಿಕೊಂಡಿದ್ದಾರೆ. ಹೊಸಬರ ತಂಡವೇ ಈ ಚಿತ್ರದ ಹೊಣೆ ಹೊತ್ತಿದ್ದು ಕೀರ್ತಿ ಈ ಸಿನೆಮಾದ ನಿರ್ದೇಶಕ.

ಫರ್ಸ್ಟ್ ರ್ಯಾಂಕ್ ರಾಜು: ಬಾಲಿವುಡ್ ನಲ್ಲೂ ಮಿಂದೆದ್ದು ಬಂದ ದಿಗಂತ್ ಮತ್ತೆ ಕನ್ನಡ ಸಿನೆಮಾದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರೆ. ಸಾಫ್ಟ್ವೇರ್ ಎಂಜಿನಿಯರ್ ನರೇಶ್ ಕುಮಾರ್ ಸಿನೆಮಾ ನಿರ್ದೇಶಕರಾಗಿ ಹೊರಹೊಮ್ಮಿದ್ದಾರೆ. ಹಾಸ್ಯಪ್ರಧಾನ ಈ ಚಿತ್ರಕ್ಕೆ ಗೋವರ್ಧನ್ ನಾಯಕ ನಟ.

ಅಲೋನ್: ಸಿಮ್ರನ್ ಪೊಲೀಸ್ ಪಾತ್ರದಲ್ಲಿ ಕಾಣಿಸಿಕೊಂಡಿರುವ ಅಲೋನ್ ಚಿತ್ರದ ನಿರ್ದೇಶಕ ಜೆ ಕೆ ಎಸ್. ವಸಿಷ್ಠ ನಾಯಕನಟ. ಸುಜಿತ್ ಶೆಟ್ಟಿ ಸಂಗೀತ ಸಂಯೋಜನೆಯ ಈ ಚಿತ್ರ ಕೂಡ ನಾಳೆ ಬಿಡುಗಡೆಯಾಗಲಿದೆ.