ಬೆಂಗಳೂರು: ಕನ್ನಡ ಚಿತ್ರರಂಗದ ಗೆಲುವಿನ ಕುದುರೆ ಎಂದೇ ಖ್ಯಾತರಾದ ನಟ ರಾಕಿಂಗ್ ಸ್ಟಾರ್ ಯಶ್ ಅವರ ಹೊಸ ಸಿನೆಮಾ ಘೋಷಣೆಯಾಗಿದೆ. ನೃತ್ಯನಿರ್ದೇಶಕರಾಗಿದ್ದು ಈಗ ನಿರ್ದೇಶಕರಾಗಿರುವ ಎ ಹರ್ಷ ಈ ನೂತನ ಚಿತ್ರದ ನಿರ್ದೇಶಕ. ಶರಣ್ ಅಭಿನಯದ 'ಜೈ ಮಾರುತಿ 800' ನಂತರ ತಣ್ಣಗಾಗಿದ್ದ ಹರ್ಷ ಈಗ ಹೊಸ ಚಿತ್ರವನ್ನು ಹರ್ಷೋದ್ಘಾರದಿಂದ ಘೋಷಿಸಿದ್ದಾರೆ.
ಈ ಹೊಸ ಚಿತ್ರದ ಹೆಸರು 'ರಾಣಾ'. ಯಶ್ ಅವರ ಜನ್ಮ ದಿನವಾದ ಜನವರಿ 8 2017 ಕ್ಕೆ ಈ ಚಿತ್ರದ ಮುಹೂರ್ತ ನೆರವೇರಲಿದೆಯಂತೆ. ಸಿಂಹಾದ್ರಿ ಪ್ರೊಡಕ್ಷನ್ ನ ರಮೇಶ್ ಕಶ್ಯಪ್ ಈ ಸಿನೆಮಾವನ್ನು ನಿರ್ಮಿಸಲಿದ್ದಾರೆ.
ನಿರ್ದೇಶನದ ಜೊತೆಗೆ ಕಥೆ, ಚಿತ್ರಕಥೆ ಮತ್ತು ನೃತ್ಯ ನಿರ್ದೇಶನ ಕೂಡ ಹರ್ಷ ಅವರದ್ದೇ. ಆಕ್ಷನ್, ಸೆಂಟಿಮೆಂಟ್ ಹಾಡುಗಳು ಎಲ್ಲವನ್ನು ಒಳಗೊಳ್ಳಲಿರುವ ಈ ಸಿನೆಮಾದ ತಾರಾಗಣ ಘೋಷಣೆಯಾಗಬೇಕಿದೆ.
