ಕೆಜಿಎಫ್ ಗೆ ಫಿದಾ ಆದ ಸ್ಯಾಂಡಲ್ ವುಡ್ ನಟಿಯಿಂದ ಒಮ್ಮೆಲೇ 25 ಟಿಕೆಟ್ ಬುಕ್!

ಬೆಂಗಳೂರು: ಭಾರತೀಯ ಚಿತ್ರರಂಗದಲ್ಲಿ ತನ್ನದೇ ಆದ ಅಲೆ ಎಬ್ಬಿಸಿರುವ ಕೆಜಿಎಫ್ ಚಿತ್ರ ಹವಾ ಮುಂದುವರೆದಿರುವಂತೆಯೇ ಸ್ಯಾಂಡಲ್ ವುಡ್ ನ ಖ್ಯಾತ ನಟಿಯೊಬ್ಬರು ಒಮ್ಮೆಲೇ 25 ಟಿಕೆಟ್ ಬುಕ್ ಮಾಡಿ ಚಿತ್ರತಂಡಕ್ಕೆ ಬೆಂಬಲ ವ್ಯಕ್ತಪಡಿಸಿದ್ದಾರೆ.

ಅಭಿಮಾನಿಗಳ ಮನಸೂರೆಗೊಂಡಿರುವ ಕೆಜಿಎಫ್ ಚಿತ್ರಕ್ಕೆ ಬರೀ ಅಭಿಮಾನಿಗಳಷ್ಟೇ ಅಲ್ಲದೆ ಸಿನಿ ಸ್ಟಾರ್ ಗಳು ಕೂಡ ಮನ ಸೋತಿದ್ದು, ಚಿತ್ರವನ್ನು ಹಾಡಿ ಹೊಗಳಿದ್ದಾರೆ. ಇದೀಗ ಈ ಪಟ್ಟಿಗೆ ಗಜಕೇಸರಿ ನಟಿ ಅಮೂಲ್ಯ ಕೂಡ ಸೇರ್ಪಡೆಯಾಗಿದ್ದು, ಕೆಜಿಎಫ್ ಚಿತ್ರಕ್ಕೆ ಮನಸೋತಿರುವ ನಟಿ ಬರೊಬ್ಬರಿ 25 ಟಿಕೆಟ್ ಗಳನ್ನು ಬುಕ್ ಮಾಡಿ ಈ ವಿಚಾರವನ್ನು ಟ್ವಿಟರ್ ನಲ್ಲಿ ಶೇರ್ ಮಾಡಿದ್ದಾರೆ.

ಕೆಜಿಎಫ್ ಚಿತ್ರವನ್ನು ಅದ್ಬುತ ಎಂದು ಬಣ್ಣಿಸಿರುವ ಅಮೂಲ್ಯ ತಮ್ಮ ಕುಟುಂಬಸ್ಥರಿಗಾಗಿ 25 ಟಿಕೆಟ್ ಗಳನ್ನು ಬುಕ್ ಮಾಡಿ ಟಿಕೆಟ್ ಗಳ ಚಿತ್ರವನ್ನು ಶೇರ್ ಮಾಡಿದ್ದಾರೆ. 'ರಾಖಿ ಭಾಯ್ ರಾಕಡ್ ಎವೆರಿ ಸಿಂಗಲ್ ಫ್ರೇಮ್, ಪ್ರತಿಯೊಂದು ಸೀನ್ ನಲ್ಲಿಯೂ ರಾಖಿ ಭಾಯ್ ಮಿಂಚಿದ್ದಾರೆ.. ಇಡೀ ಕೆಜಿಎಫ್ ಚಿತ್ರತಂಡಕ್ಕೆ ಹ್ಯಾಟ್ಸ್ ಆಫ್.. ಕನ್ನಡ ಸಿನಿಮಾವನ್ನು ಬೇರೆ ಲೆವೆಲ್ ಗೆ ಕೊಂಡೊಯ್ದಿದ್ದಕ್ಕಾಗಿ ಧನ್ಯವಾದ.. ನಾವು ಹೆಮ್ಮೆ ಪಡುವಂತೆ ಕೆಜಿಎಫ್ ಮಾಡಿದೆ.. ಕೆಜಿಎಫ್೨ ಗೆ ಕಾಯುತ್ತಿದ್ದೇನೆ ಎಂದಿದ್ದಾರೆ..