ಇಂಗ್ಲೆಂಡ್ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದಲ್ಲಿ ಅಮೋಘ ಶತಕ ಬಾರಿಸಿ, ಏಕಾಂಗಿಯಾಗಿ ಭಾರತ ತಂಡದ ನೆರವಿಗೆ ಬಂದ ನಾಯಕ ವಿರಾಟ್ ಕೊಹ್ಲಿ, ಈ ಶತಕದ ಮೂಲಕ ತಮ್ಮ ಮೇಲಿನ ಅತಿಯಾದ ಒತ್ತಡವನ್ನು ಕಡಿಮೆ ಮಾಡಿಕೊಂಡಿದ್ದಾರೆ. 2014ರ ಇಂಗ್ಲೆಂಡ್ ಪ್ರವಾಸದ ವೇಳೆ ಅಲ್ಲಿನ ಪರಿಸ್ಥಿತಿಗಳಿಗೆ ಹೊಂದಿಕೊಳ್ಳುವಲ್ಲಿ ಎಡವಿದ್ದ ಕೊಹ್ಲಿ, ಇಂಗ್ಲಿಷ್ ವೇಗದ ದಾಳಿ ಎದುರು ತತ್ತರಿಸಿದ್ದರು. ಅದರಲ್ಲೂ ಜೇಮ್ಸ್ ಆಂಡರ್ಸನ್ಗೆ ನಾಲ್ಕು ಬಾರಿ ಬಲಿಯಾಗುವ ಮೂಲಕ, ಸುದೀರ್ಘ ಇನಿಂಗ್ಸ್ ಆಡುವ ತಮ್ಮ ಟೆಂಪರಮೆಂಟ್ ಕುರಿತಾಗಿಯೇ ಪ್ರಶ್ನೆಗಳು ಏಳುವ ಮಟ್ಟಿಗೆ ಕೊಹ್ಲಿ ವಿಫಲರಾಗಿದ್ದರು.