ಈ ಸಾಧನೆ ಮಾಡಿದ ಏಷ್ಯಾದ ಮೊದಲ ಕ್ರಿಕೆಟಿಗ ಎಂಎಸ್ ಧೋನಿ..!

ದುಬೈ: ಇತ್ತೀಚೆಗೆಷ್ಟೇ 200 ಪಂದ್ಯಗಳಿಗೆ ಸಾರಥ್ಯ ವಹಿಸುವ ಮೂಲಕ ದಾಖಲೆ ನಿರ್ಮಾಣ ಮಾಡಿದ್ದ ಭಾರತದ ಕೂಲ್ ಕ್ಯಾಪ್ಟನ್ ಮಹೇಂದ್ರ ಸಿಂಗ್ ಧೋನಿ ಹೆಸರಿಗೆ ಮತ್ತೊಂದು ದಾಖಲೆ ಸೇರ್ಪಡೆಯಾಗಿದೆ.

ಬಾಂಗ್ಲಾದೇಶ ಎದುರಿಗಿನ ಫೈನಲ್​ ಪಂದ್ಯದಲ್ಲಿ ಧೋನಿ 800ನೇ ಸ್ಟಂಪ್​ ಔಟ್​ ಮಾಡುವ ಮೂಲಕ ಅಂತಾರಾಷ್ಟ್ರೀಯ ಪಂದ್ಯಗಳಲ್ಲಿ ಅತ್ಯಂತ ಹೆಚ್ಚು ಸ್ಟಂಪ್​ ಔಟ್​ ಮಾಡಿದ ಏಷ್ಯಾದ ಮೊದಲ ಕ್ರಿಕೆಟರ್​ ಎಂಬ ಖ್ಯಾತಿಗೆ ಭಾಜನರಾದರು. ಪಂದ್ಯದ 43ನೇ ಓವರ್​ನಲ್ಲಿ ಕುಲದೀಪ್​ ಯಾದವ್​ ಅವರ ಬೌಲಿಂಗ್​ನಲ್ಲಿ ಮಶ್ರಫೆ ಮೊರ್ತಾಜಾ ಅವರ ಸ್ಟಂಪ್​ ಎಗರಿಸುವ ಮೂಲಕ ಧೋನಿ  ಈ ಸಾಧನೆ ಮಾಡಿದರು.

ಕ್ರಿಕೆಟ್ ​ನ ಮೂರೂ ಪ್ರಕಾರಗಳಾದ ಟೆಸ್ಟ್​, ಏಕದಿನ, ಟಿ20ಯ ಅಂತಾರಾಷ್ಟ್ರೀಯ ಪಂದ್ಯಗಳಲ್ಲಿ ಅತಿ ಹೆಚ್ಚು ಸ್ಟಂಪ್​ ಔಟ್​ ಮಾಡಿದ ವಿಶ್ವದ ವಿಕೆಟ್​ ಕೀಪರ್​ಗಳ ಪಟ್ಟಿಯಲ್ಲಿ ಧೋನಿ ಈಗ ಮೂರನೇ ಸ್ಥಾನದಲ್ಲಿದ್ದಾರೆ. ಧೋನಿ     ಟೆಸ್ಟ್​ ನಲ್ಲಿ  294, ಏಕದಿನದಲ್ಲಿ 419 ಮತ್ತು ಟಿ20ಯಲ್ಲಿ 87 ಸ್ಟಂಪೌಟ್ ಮಾಡಿದ್ದಾರೆ.

ಇನ್ನು 998 ಸ್ಟಂಪ್​ ಎಗರಿಸಿ ದಕ್ಷಿಣ ಆಫ್ರಿಕಾದ ಮಾರ್ಕ್​ ಬೌಚರ್​ ಮೊದಲ ಸ್ಥಾನದಲ್ಲಿದ್ದರೆ, 905 ಸ್ಟಂಪ್​ ಔಟ್​ ಮಾಡುವ ಮೂಲಕ ಆಸ್ಟ್ರೇಲಿಯಾದ ವಿಕೆಟ್​ ಕೀಪರ್​ ಆ್ಯಡಮ್​ ಗಿಲ್​ಕ್ರಿಸ್ಟ್​ ಎರಡನೇ ಸ್ಥಾನದಲ್ಲಿದ್ದಾರೆ.

ಏಷ್ಯಾಕಪ್​ನ ಈ ಟೂರ್ನಿಯಲ್ಲಂತೂ ಧೋನಿ ಅದಾಗಲೇ ಎರಡು ಸಾಧನೆ ಮಾಡಿದ್ದರು. ಒಂದು, ಭಾರತೀಯ ಕ್ರಿಕೆಟರ್​ಗಳ ಪೈಕಿ ಅತ್ಯಂತ ಹೆಚ್ಚು ಅಂತಾರಾಷ್ಟ್ರೀಯ ಕ್ರಿಕೆಟ್​ ಆಡಿದ ಆಟಗಾರರ ಪಟ್ಟಿಯಲ್ಲಿ ಧೋನಿ ಎರಡನೇ ಸ್ಥಾನಕ್ಕೇರಿದ್ದರು.