ಮುಂಬೈ: ಜಗತ್ತಿನ ಅತೀ ಶ್ರೀಮಂತ ಕ್ರಿಕೆಟ್ ಸಂಸ್ಥೆ ಬಿಸಿಸಿಐಗೆ ಇದೀಗ ಹೊಸ ತಲೆನೋವು ಶುರುವಾಗಿದ್ದು, ಇದೇ ಮೊದಲ ಬಾರಿಗೆ ಟೀಂ ಇಂಡಿಯಾಗೆ ಟೈಟಲ್ ಸ್ಪಾನ್ಸರ್ ಹುಡುಕಲು ಹರಸಾಹಸ ಪಡಲಾಗುತ್ತಿದೆ.
ಅಚ್ಚರಿಯಾದರೂ ಇದು ಸತ್ಯ.. ಭಾರತ ಕ್ರಿಕೆಟ್ ತಂಡದ ತವರಿನ ಪಂದ್ಯಗಳಿಗೆ ಹೊಸ ಟೈಟಲ್ ಸ್ಪಾನ್ಸರ್ ಹುಡುಕಾಟದಲ್ಲಿ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (BCCI)ಗೆ ಹಿನ್ನಡೆಯಾಗಿರುವಂತೆ ಕಾಣುತ್ತಿದೆ. ಟೈಟಲ್ ಸ್ಪಾನ್ಸರ್ ಶಿಪ್ ಗೆ ಬಿಡ್ ಮಾಡಲು ಅಂತಿಮ ಗಡುವು ಮುಗಿದಿದ್ದರೂ ಯಾವುದೇ ಸಂಸ್ಥೆಗಳೂ ಬಿಡ್ ಗೆ ಮುಂದಾಗದಿರುವುದು ಬಿಸಿಸಿಐಗೆ ತೀವ್ರ ಹಿನ್ನಡೆಯನ್ನುಂಟು ಮಾಡಿದೆ.
ಮೂಲಗಳ ಪ್ರಕಾರ ಬಿಸಿಸಿಐ ಪ್ರತಿ ಪಂದ್ಯಕ್ಕೆ ₹4.75 ಕೋಟಿ ಮೂಲ ಬೆಲೆ ನಿಗದಿಪಡಿಸಿರುವುದರಿಂದ ಹಕ್ಕುಗಳನ್ನು ಪಡೆಯಲು ಕಂಪನಿಗಳಿಂದ ನಿರೀಕ್ಷಿತ ಮಟ್ಟದ ಆಸಕ್ತಿ ತೋರುತ್ತಿಲ್ಲ ಎಂದು ವರದಿಗಳು ತಿಳಿಸಿವೆ. BCCI ಜುಲೈ 20ರಂದು ಟೈಟಲ್ ಸ್ಪಾನ್ಸರ್ಶಿಪ್ ಹಕ್ಕುಗಳಿಗಾಗಿ ಆಹ್ವಾನ ಹೊರಡಿಸಿತ್ತು. ಟೆಂಡರ್ ದಾಖಲೆಗಳನ್ನು ಖರೀದಿಸಲು ಆಗಸ್ಟ್ 4 ಕೊನೆಯ ದಿನವಾಗಿತ್ತು. ಆಗಸ್ಟ್ 5ರವರೆಗೆ ಬಿಡ್ಗಳಿಗೆ ಸಂಬಂಧಿಸಿದ ಸ್ಪಷ್ಟೀಕರಣಗಳನ್ನು ಕೇಳಲು ಅವಕಾಶ ನೀಡಲಾಗಿತ್ತು.
ಆಗಸ್ಟ್ 13ರಂದು ಬಿಡ್ ಸಲ್ಲಿಕೆಗೆ ಅಂತಿಮ ಗಡುವು ಮುಗಿದಿದ್ದರೂ, BCCIಗೆ ನಿರೀಕ್ಷಿತ ಸಂಖ್ಯೆಯ ಬಿಡ್ಗಳು ಬಂದಿಲ್ಲ ಎನ್ನಲಾಗಿದೆ. ಕೆಲವು ಬಿಡ್ಗಳು ಬಂದಿದ್ದರೂ ಮಂಡಳಿಯ ನಿರೀಕ್ಷಿತ ದರವನ್ನು ತಲುಪಿಲ್ಲ ಎಂಬ ಮಾತುಗಳೂ ಕೇಳಿಬಂದಿವೆ.
ದರವೇ ಅಡ್ಡಿ?
ಪ್ರಸ್ತುತ ಟೀಂ ಇಂಡಿಯಾದ ಹೋಮ್ ಮ್ಯಾಚ್ಗಳ ಟೈಟಲ್ ಸ್ಪಾನ್ಸರ್ ಆಗಿರುವ IDFC First Bank ಪ್ರತಿ ಪಂದ್ಯಕ್ಕೆ 4.2 ಕೋಟಿ ರೂ ಪಾವತಿಸುತ್ತಿದೆ. ಆದರೆ ಹೊಸ ಟೆಂಡರ್ನಲ್ಲಿ BCCI ಮೂಲ ಬೆಲೆಯನ್ನು 4.75 ಕೋಟಿ ರೂಗೆ ಹೆಚ್ಚಿಸಿರುವುದು ಸಂಭಾವ್ಯ ಬಿಡ್ಡರ್ಗಳಿಗೆ ದೊಡ್ಡ ಅಡ್ಡಿಯಾಗಿದೆ ಎಂದು ವರದಿಯಾಗಿದೆ.
ಹೊಸ ಒಪ್ಪಂದದ ಅವಧಿಯನ್ನು ಎರಡು ವರ್ಷಗಳಿಗೆ ನಿಗದಿಪಡಿಸಲಾಗಿದೆ. ಇದು 2023ರಲ್ಲಿ IDFC First Bank ಪಡೆದ ಮೂರು ವರ್ಷಗಳ ಒಪ್ಪಂದಕ್ಕಿಂತ ಕಡಿಮೆ ಅವಧಿಯಾಗಿದೆ. BCCI ತನ್ನ ಟೆಂಡರ್ ದಾಖಲೆಗಳಲ್ಲಿ ಹಕ್ಕುಗಳ ಅವಧಿಯಲ್ಲಿ ಸುಮಾರು 35 ಪಂದ್ಯಗಳು ನಡೆಯುವ ನಿರೀಕ್ಷೆ ಹೊಂದಿರುವುದಾಗಿ ತಿಳಿಸಿದೆ. ಆದರೆ ಅಂತಿಮ ಪಂದ್ಯಗಳ ಸಂಖ್ಯೆ BCCI ನಿರ್ಧರಿಸುವ ವೇಳಾಪಟ್ಟಿಯನ್ನು ಅವಲಂಬಿಸಿರಲಿದೆ ಎಂದು ಸ್ಪಷ್ಟಪಡಿಸಿದೆ.
Google Gemini ಸೇರಿದಂತೆ ಹಲವು ಕಂಪನಿಗಳೊಂದಿಗೆ ಮಾತುಕತೆ
ಟೈಟಲ್ ಸ್ಪಾನ್ಸರ್ ಹುಡುಕಾಟದಲ್ಲಿ BCCI ಹಲವು ಸಂಭಾವ್ಯ ಬ್ರ್ಯಾಂಡ್ಗಳೊಂದಿಗೆ ಮಾತುಕತೆ ನಡೆಸುತ್ತಿದೆ ಎನ್ನಲಾಗಿದೆ. Google Gemini ಈ ಚರ್ಚೆಯಲ್ಲಿರುವ ಪ್ರಮುಖ ಬ್ರ್ಯಾಂಡ್ಗಳಲ್ಲಿ ಒಂದಾಗಿದೆ ಎಂದು ವರದಿಗಳು ತಿಳಿಸಿವೆ. ಇದಲ್ಲದೆ Spinny ಮತ್ತು SBI Life ಕೂಡ BCCI ಜತೆ ಮಾತುಕತೆ ನಡೆಸುತ್ತಿವೆ ಎನ್ನಲಾಗಿದೆ. ಆದರೆ ಈ ಮಾತುಕತೆಗಳು ಅಂತಿಮ ಒಪ್ಪಂದಕ್ಕೆ ತಲುಪಿದೆಯೇ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ.
ITG ಆಸ್ತಿಗೆ ಕೆಲವು ಬಿಡ್ದಾರರು
ಮತ್ತೊಂದೆಡೆ, BCCIಯ ITG ಆಸ್ತಿಗಾಗಿ ಕೆಲವು ಸಂಭಾವ್ಯ ಪ್ರಾಯೋಜಕರು ಬಿಡ್ ಪ್ರಕ್ರಿಯೆಯಲ್ಲಿ ಭಾಗವಹಿಸಿದ್ದಾರೆ ಎನ್ನಲಾಗಿದೆ. ಈ ಟೆಂಡರ್ ದಾಖಲೆಗಳ ಮರುಪಾವತಿಯಾಗದ ಶುಲ್ಕವನ್ನು 1 ಲಕ್ಷಕ್ಕೆ ನಿಗದಿಪಡಿಸಲಾಗಿತ್ತು. GroupM, ITW ಮತ್ತು Sporty Solutions ಟೆಂಡರ್ ದಾಖಲೆಗಳನ್ನು ಖರೀದಿಸಿವೆ ಎಂದು ವರದಿಯಾಗಿದೆ.
Associate Partner ಹಕ್ಕುಗಳೂ ಇನ್ನೂ ಬಾಕಿ
ಇದೇ ವೇಳೆ BCCI ತನ್ನ ಕಾರ್ಯಕ್ರಮಗಳ Associate Partner Rights ಗಾಗಿ Request for Quotation (RFQ) ಕೂಡ ಬಿಡುಗಡೆ ಮಾಡಿದೆ. ಟೈಟಲ್ ಸ್ಪಾನ್ಸರ್ಶಿಪ್ ಹಕ್ಕುಗಳನ್ನು ಪಡೆಯುವ ಬ್ರ್ಯಾಂಡ್ಗೆ Associate Partner Rights ಪಡೆಯಲು ಅವಕಾಶ ಇರುವುದಿಲ್ಲ.
ಮೊದಲು ಟೈಟಲ್ ಸ್ಪಾನ್ಸರ್ ಅಂತಿಮಗೊಂಡ ಬಳಿಕವಷ್ಟೇ Associate Partner ಹಕ್ಕುಗಳನ್ನು ಅಂತಿಮಗೊಳಿಸಲಾಗುತ್ತದೆ. RFQ ದಾಖಲೆ ಖರೀದಿಸಲು ಆಗಸ್ಟ್ 14 ಕೊನೆಯ ದಿನವಾಗಿತ್ತು. ಸ್ಪಷ್ಟೀಕರಣಗಳನ್ನು ಕೇಳಲು ಆಗಸ್ಟ್ 16ರವರೆಗೆ ಅವಕಾಶ ನೀಡಲಾಗಿತ್ತು. ಕೊಟೇಷನ್ ದಾಖಲೆಗಳನ್ನು ಸಲ್ಲಿಸಲು ಆಗಸ್ಟ್ 25 ಅಂತಿಮ ಗಡುವಾಗಿದೆ.
ಹೀಗಾಗಿ ಟೀಂ ಇಂಡಿಯಾದ ತವರಿನ ಪಂದ್ಯಗಳ ಟೈಟಲ್ ಸ್ಪಾನ್ಸರ್ಶಿಪ್ಗೆ BCCI ನಿಗದಿಪಡಿಸಿರುವ ₹4.75 ಕೋಟಿ ಬೆಲೆ ಮಾರುಕಟ್ಟೆಯಲ್ಲಿ ಎಷ್ಟರ ಮಟ್ಟಿಗೆ ಸ್ವೀಕಾರವಾಗಲಿದೆ ಎಂಬುದು ಇದೀಗ ಕುತೂಹಲ ಮೂಡಿಸಿದೆ.
