ಬೆಂಗಳೂರು: ರೈತರ, ಟೆಕ್ಕಿಗಳ, ಉದ್ದಿಮೆದಾರರ ಹಾಗೂ ಬೇರೆ ರಾಜ್ಯಗಳಿಂದ ಬಂದ ವಲಸಿಗರ ಹಾಗೆ ವೇಷ ತೊಟ್ಟ ಸಂಚಾರಿ ಪೊಲೀಸರು, ಮೋಸ ಮಾಡಿ ದುಡ್ಡು ಸುಲಿಯುವ ಆಟೋ ಚಾಲಕರನ್ನು ಸೋಮವಾರ ಹಿಡಿದಿದ್ದಾರೆ.
ಒಂದು ಇಡೀ ದಿನದ ಈ ಕಾರ್ಯಾಚರಣೆಯಲ್ಲಿ, ೫೬೪ ಜನ ಪೊಲೀಸರು ನಾಗರಿಕ ವೇಷ ತೊಟ್ಟು, ಪ್ರಯಾಣಿಕರೆಂದು ಹೇಳಿ ಆಟೋ ಚಾಲಕರನ್ನು ಹಿಡಿದಿದ್ದಾರೆ.
ಈ ಕಾರ್ಯಾಚರಣೆಯಲ್ಲಿ ಒಟ್ಟು ೫೧೭೨ ಪ್ರಕರಣಗಳನ್ನು ದಾಖಲಿಸಿದ್ದು, ೯೩೨ ಆಟೋಗಳನ್ನು ವಶಕ್ಕೆ ತೆಗೆದುಕೊಳ್ಳಲಾಗಿದೆ. ಸಾಮಾನ್ಯವಾಗಿ ಬೇರೆ ಊರುಗಳಿಂದ ಬಸ್ ಗಳು ನಗರಕ್ಕೆ ಬೆಳಗ್ಗೆ ಬರುವ ಹೊತ್ತು ೫ ಘಂಟೆಗೆ ಈ ಕಾರ್ಯಾಚರಣೆ ಪ್ರಾರಂಭವಾಗಿ, ಸಂಜೆ ಕಛೇರಿಗಳಿಂದ ಜನರು ಮನೆಗೆ ತೆರಳುವ ಸಮಯ ೬ ಘಂಟೆಯವರೆಗೂ ನಡೆದಿದೆ.
ಮೆಜೆಸ್ಟಿಕ್, ನಗರ ರೈಲ್ವೆ ನಿಲ್ದಾಣ, ಬಸ್ ನಿಲ್ದಾಣಗಳು ಮತ್ತು ಮಾಲ್ ಗಳ ಹತ್ತಿರ ಈ ಕಾರ್ಯಾಚರಣೆ ನಡೆದಿದೆ.
ಕೆಲವರು ಕೇಳಿದ ಕಡೆ ಬರಲು ನಿರಾಕರಿಸಿದರೆ, ಹಲವು ಚಾಲಕರು ದುಬಾರಿ ದುಡ್ಡಿಗೆ ಬೇಡಿಕೆಯಿಟ್ಟಿದ್ದಾರೆ. ಇನ್ನಿತರ ಅಪರಾಧಗಳು ಹೀಗಿವೆ: ಮೀಟರ್ ಹಾಕದೆ ಇರುವುದು, ವಾಹನ ಚಾಲಕನ ಗುರತಿನ ಚೀಟಿಗಳನ್ನು ಪ್ರದರ್ಶಿಸದಿರುವುದು, ಸಮವಸ್ತ್ರ ತೊಡದೆ ಇರುವುದು, ಸಾರಿಗೆ ನಿಯಮಗಳನ್ನು ಮುರಿದಿರುವುದು. "ಸಾಮಾಜಿಕ ಜಾಲತಾಣಗಳಲ್ಲಿ ಹೆಚ್ಚೆಚ್ಚು ಜನ ದೂರು ಹಾಕುತ್ತಿರುವುದು ಅಲ್ಲದೆ ನಮ್ಮ ಸಹಾಯವಾಣಿಗೆ ಹಲವಾರು ಕರೆಗಳು ಬರುತ್ತಿದ್ದವು" ಎಂದ ಹಿರಿಯ ಪೊಲೀಸ್ ಅಧಿಕಾರಿ "ಆದುದರಿಂದ ನಾವು ಈ ಕಾರ್ಯಾಚರಣೆ ನಡೆಸಿ ಕೆಟ್ಟದಾಗಿ ವರ್ತಿಸುವ ಹಲವಾರು ಚಾಲಕರನ್ನು ಹಿಡಿದಿದ್ದೇವೆ" ಎಂದಿದ್ದಾರೆ. ಈ ತಪಾಸಣೆ ವೇಳೆಯಲ್ಲಿ ಸರಿಯಾದ ದಾಖಲೆಗಳಿಲ್ಲದ ೯೩೨ ಆಟೋಗಳನ್ನು ವಶ ಪಡಿಸಿಕೊಂಡಿದ್ದಾರೆ. ಇವರಲ್ಲಿ ಹಲವರು ವಾಹನ ಚಾಲನೆ ಪರವಾನಗಿ ಕೂಡ ಹೊಂದಿರಲಿಲ್ಲ. "ಕೂಡಲೇ ಇವರ ನೊಂದಣಿಯನ್ನು ರದ್ದು ಮಾಡುವಂತೆ ರಸ್ತೆ ಸಾರಿಗೆ ಅಧಿಕಾರಿಗಳಿಗೆ ಸೂಚಿಸಿದ್ದೇವೆ. ನಮ್ಮ ಕಾರ್ಯಾಚರಣೆ ಇನ್ನೂ ಕೆಲವು ದಿನ ಮುಂದುವರೆಯುತ್ತದೆ" ಎಂದಿದ್ದಾರೆ.
ಜಯನಗರದಲ್ಲಿ ಕೆಲ ಆಟೋ ಚಾಲಕರು ಪ್ರತಿಭಟನೆ ನಡೆಸಿ, ವಶ ಪಡಿಸಿಕೊಂಡಿರುವ ತಮ್ಮ ಆಟೋಗಳನ್ನು ಹಾಗು ದಾಖಲೆಗಳನ್ನು ಹಿಂದಿರುಗಿಸುವಂತೆ ಆಗ್ರಹಿಸಿದರು. ಆದರೆ ಪೊಲೀಸರು ದಾಖಲೆಗಳನ್ನು ನ್ಯಾಯಾಲಯಕ್ಕೆ ನೀಡಿರುವುದನ್ನು ತಿಳಿದು ಪ್ರತಿಭಟನೆ ಹಿಂತೆಗೆದುಕೊಂಡಿದ್ದಾರೆ.
