ಸರ್ಕಾರಿ ಗೌರವಗಳೊಂದಿಗೆ ಡಿಕೆ ರವಿ ಅಂತ್ಯಸಂಸ್ಕಾರ

ತುಮಕೂರು: ದಕ್ಷ ಐಎಎಸ್ ಅಧಿಕಾರಿ ಡಿ.ಕೆ ರವಿ ಅವರ ಅಂತ್ಯಸಂಸ್ಕಾರ ಅವರ ಹುಟ್ಟೂರಾದ ದೊಡ್ಡಕೊಪ್ಪಲು ಗ್ರಾಮದಲ್ಲಿ ನಡೆಯಿತು. ಸಕಲ ಸರ್ಕಾರಿ ಗೌರವಗಳೊಂದಿಗೆ ರವಿ ಅವರ ಪಾರ್ಥಿವ ಶರೀರವನ್ನು ಮಣ್ಣು ಮಾಡಲಾಯಿತು.

ಬೆಂಗಳೂರಿನಿಂದ ವಿಶೇಷ ಅಂಬುಲೆನ್ಸ್ ನಲ್ಲಿ ಡಿ.ಕೆ. ರವಿಯವರ ಪಾರ್ಥಿವ ಶರೀರವನ್ನು ದೊಡ್ಡಕೊಪ್ಪಲು ಗ್ರಾಮಕ್ಕೆ ತರಲಾಗಿದ್ದು, ದಾರಿಯುದ್ದಕ್ಕೂ ನೆರೆದಿದ್ದ ಜನತೆ ದಕ್ಷ ಅಧಿಕಾರಿ ರವಿಯವರಿಗೆ ತಮ್ಮ ಅಂತಿಮ ನಮನ ಸಲ್ಲಿಸಿದರು.

ರವಿಯವರ ಪಾರ್ಥಿವ ಶರೀರವಿದ್ದ ವಾಹನ ಹುಲಿಯೂರು ದುರ್ಗ ಪ್ರವೇಶಿಸುತ್ತಿದ್ದಂತೆಯೇ ಸಂಬಂಧಿಗಳ ಆಕ್ರಂದನ ಮುಗಿಲು ಮುಟ್ಟಿದೆ. ರವಿಯವರ ಸ್ವಂತ ಜಮೀನಿನಲ್ಲಿ ಅವರ ಅಣ್ಣನ ಮಗ ಅಂತ್ಯ ಸಂಸ್ಕಾರದ ಅಂತಿಮ ವಿಧಿ ವಿಧಾನಗಳನ್ನು ನೆರವೇರಿಸಿದರು.