ಬೆಂಗಳೂರು: ಹೊರಗೆ ಚುಮು ಚುಮು ಚಳಿ, ತುಂತುರು ಮಳೆ, ಮೋಡಕವಿದ ವಾತಾವರಣ. ಆದರೆ, ಆಡಿಟೋರಿಯಂ ಒಳಗೆ ಪ್ರೇಕ್ಷಕರ ನಗುವಿನ ಅಲೆ. ದೈನಂದಿನ ಜಂಜಾಟಗಳಿಂದ ಮುಕ್ತಿ ಹೊಂದಿದ ಭಾವ ಪ್ರೇಕ್ಷಕರ ಮೊಗದಲ್ಲಿ ಕಾಣುತಿತ್ತು.
ವೇದಿಕೆಯಲ್ಲಿ ಸಿಡಿಯುತ್ತಿದ್ದ ಪ್ರತಿಯೊಂದು ಹಾಸ್ಯ ಚಟಾಕಿಗೂ ನಗು, ಕರತಾಡನದಿಂದಲೇ ಪ್ರತಿಕ್ರಿಯಿಸುತ್ತಿದ್ದರು. ಅಂತರಂಗ ಸಂಸ್ಥೆ ಜೆ.ಪಿ.ನಗರದ ಆರ್.ವಿ.ಡೆಂಟಲ್ ಕಾಲೇಜಿನ ಸಭಾಂಗಣದಲ್ಲಿ ಭಾನುವಾರ ಏರ್ಪಡಿಸಿದ್ದ `ನಗುವಿಗೇಕೆ ರೇಷನ್?' ಹಾಸ್ಯಮೇಳದಲ್ಲಿ ಪ್ರೇಕ್ಷಕರ ನಗೆ ಬುಗ್ಗೆ ಉಕ್ಕಿ ಹರಿಯಿತು.
ಎಸ್.ಷಡಕ್ಷರಿ, ಎಂಎಸ್. ನರಸಿಂಹಮೂರ್ತಿ, ಪ್ರೊ.ಕೃಷ್ಣೇಗೌಡ, ವೈ.ವಿ.ಗುಂಡೂರಾವ್, ಸಂಧ್ಯಾ ಶೆಣೈ ಹಾಗೂ ಅಚ್ಯುತರಾವ್ ಪದಕಿ ಅವರು ತಮ್ಮ ನವಿರಾದ ಹಾಸ್ಯಗಳ ಮೂಲಕ ಸಭಾಂಗಣದ ದೊಡ್ಡ ಪ್ರೇಕ್ಷಕ ಸಮೂಹವನ್ನು ನಗುವಿನ ಲೋಕಕ್ಕೆ ಕರೆದೊಯ್ದರು.
