ವಿಧಾನಪರಿಷತ್: ಘೋಷಣೆ, ಗದ್ದಲ, ವಾಕ್ಸಮರಗಳ ನಡುವೆಯೇ ಕರ್ನಾಟಕ ಪಂಚಾಯತ್ ರಾಜ್ (2ನೇ ತಿದ್ದುಪಡಿ) ವಿಧೇಯಕ ಸೇರಿದಂತೆ ಒಟ್ಟಾರೆ 4 ವಿಧೇಯಕಗಳ ಬಗ್ಗೆ ಚರ್ಚೆ ನಡೆಯದೇ ಮೇಲ್ಮನೆಯಲ್ಲಿ ಅಂಗೀಕಾರವಾದವು.
ಸಚಿವ ಆಂಜನೇಯ ರಾಜಿನಾಮೆಗೆ ಆಗ್ರಹಿಸಿ ಬಿಜೆಪಿ ಧರಣಿ ನಡೆಸುತ್ತಿರುವಾಗಲೇ ವಿಧೇಯಕಗಳು ಅನುಮೋದನೆಗೊಂಡವು. ಜೆಡಿಎಸ್ ಸದಸ್ಯರು ಮೂಕ ಪ್ರೇಕ್ಷಕರಂತೆ ವೀಕ್ಷಿಸುತ್ತಿದ್ದರು. ಚರ್ಚಿಸಲು ಅವಕಾಶ ಕೊಡಿ ಎಂಬ ಜೆಡಿಎಸ್ ಬೇಡಿಕೆಗೆ ಆಡಳಿತ ಪಕ್ಷ ಸೊಪ್ಪು ಹಾಕಲಿಲ್ಲ.
ಸಚಿವ ಆಂಜನೇಯ ಕಮಿಷನ್ ದಂಧೆ ಪ್ರಕರಣದಲ್ಲಿ ಭಾಗಿಯಾಗಿದ್ದು, ರಾಜಿನಾಮೆ ನೀಡಬೇಕು. ಭ್ರಷ್ಟ ಸಚಿವರನ್ನು ರಕ್ಷಿಸುತ್ತಿರುವ ಸಿಎಂ ಸಹ ರಾಜಿನಾಮೆ ನೀಡಬೇಕೆಂದು ಬಿಜೆಪಿ ಧರಣಿ ನಡೆಸಿತು. ಧರಣಿ ನಡುವೆ ಚರ್ಚೆಗೆ ಅವಕಾಶ ನೀಡದೆ ಕರ್ನಾಟಕ ಪಂಚಾಯತ್ ರಾಜ್ (2 ನೇ ತಿದ್ದುಪಡಿ)ವಿಧೇಯಕ, ಕರ್ನಾಟಕ ಕೈಗಾರಿಕೆಗಳ (ಸೌಲಭ್ಯ) (ತಿದ್ದುಪಡಿ) ವಿಧೇಯಕ, 2015, ಕರ್ನಾಟಕ ಅರಣ್ಯ (ತಿದ್ದುಪಡಿ) ವಿಧೇಯಕ, 2015, ಕರ್ನಾಟಕ ಧನ ವಿನಿಯೋಗ(ಸಂಖ್ಯೆ:5) ವಿಧೇಯಕಗಳು ಅಂಗೀಕೃತಗೊಂಡಿವೆ. ಕರ್ನಾಟಕ ಜಲಸಾರಿಗೆ ಮಂಡಳಿ ವಿಧೇಯಕವನ್ನು ವಾಪಸ್ ಪಡೆಯಲಾಗಿದೆ.
